Виртуал хөрөнгийн үйлчилгээ үзүүлэгчийн тухай хууль эцэслэн батлагдах хүртэл зах зээлд шинэ койн гаргахыг Санхүүгийн зохицуулах хорооноос хориглолоо. Тус хорооноос гаргасан албан мэдэгдэлд Виртуал хөрөнгийн үйлчилгээ үзүүлэгчийн тухай хууль батлагдах хүртэл шинэ койн зарлах, арилжаа зохион байгуулах, зуучлах үйл ажиллагаа эрхэлвэл тухайн байгууллага учирсан хохирлыг бүрэн хариуцах болохыг сануулжээ.
Дээрх мэдэгдэлтэй холбогдуулан Дижитал хөрөнгийн бирж болох COINHUB "Крипто биржээр дамжуулан олон нийтээс хөрөнгө татан төвлөрүүлэх ажиллагаа”-г түр зогсоож буйгаа зарлалаа. COINHUB-ийн мэдэгдэлд
"Эрх бүхий байгууллагаас ирүүлсэн мэдэгдлийн дагуу COINHUB бирж нь IEO-Initial Exchange Offering буюу “Крипто биржээр дамжуулан олон нийтээс хөрөнгө татан төвлөрүүлэх ажиллагаа”-г түр зогсоож байна. Тус мэдэгдэлд ВИРТУАЛ ХӨРӨНГИЙН ҮЙЛЧИЛГЭЭ ҮЗҮҮЛЭГЧИЙН ТУХАЙ хууль батлагдаж, хэрэгжих хүртэл IEO хийхийг түр зогсоох чиглэл ирүүлсэн болно. Тиймээс бид COINHUB бирж дээр төлөвлөгдөж байсан Гэрэгэ Системс ХХК-ийн “Devita-Life token” болон Ворлд Плас Дижитал ХХК-ийн “World Plus” IEO-уудыг түр хугацаанд хойшлуулж буйг үүгээр мэдэгдэж тус байгууллагуудаас болон хэрэглэгч та бүхнээс хүлцэл өчиж байна" гэжээ.
Үүний өмнө Монголбанк, Санхүүгийн зохицуулах хорооноос хамтарсан мэдэгдэл гаргаж виртуал хөрөнгөөс үүдэлтэй ирээдүйд учирч болзошгүй эрсдэл, хохирлыг төр аливаа хэлбэрээр хариуцахгүй болохыг анхааруулж байв.
