"Иргэн бол хүч" залуусын санаачилгаас УИХ-ын хаврын чуулганаар хэлэлцэх хуулиудын талаар УИХ-д шаардлага хүргүүлсэн талаар мэдээлж байна. Энэ үеэр тус санаачилгын үүсгэн байгуулагчид мэдээлэл өглөө.
Мэдээлэлдээ "Энэ хаврын чуулганаар Нийгмийн даатгалын багц хуулийг хэлэлцэн батална. Энэ хууль зөвхөн өндөр настнуудтай холбоотой биш. Бидэнд ч хамаатай. Бид сар бүр нийгмийн даатгалын шимтгэл төлдөг. Гэтэл нийгмийн даатгалын сан алдагдалтай, өртэй болсон. Нэг хүн хавдар тусаад байр, машинаа зарж, хамаг мөнгөө эмчилгээндээ зарцуулдаг. Иймд энэ хуулийн төсөлд хөгшин залуу гэлгүй бүгд хамрагдах шаардлагатай байна. Улсын их хурлын гишүүд үндсэн ажлаа хийж, хуулийн төслийн талаар мэдээллийг иргэд сонгогчдод өгөх үүргээ биелүүлэх хэрэгтэй.
АНУ-д 19 сая иргэн хар арьст иргэн Флойд цагаан арьст цагдаагийн буруутай үйлдлийн улмаас амиа алдсаныг эсэргүүцсэн. Ийм олон хүн саналаа өгсөн тул шүүх амиа алдсан иргэний талд шийдвэр гаргасан. Иргэд нэгдэхээр ийм хүчтэй байдаг.
УИХ иргэдийн санал бодлыг шийдвэрлэх ажлаа хангалтгүй буюу 39 хувьтай биелүүлж байна. Иргэн санал гомдол гаргахад алга болчихдог, хэн хүлээн авсан, яаж шийдвэрлэсэн нь мэдэгдэлгүй, замхардаг. Иргэд Сүхбаатарын талбайд гарч жагсахаараа л хүчтэй болдоггүй. Бид байнгын оролцоотой байснаар хүчтэй байна. Бид заавал гадаа даарч хөрөн, жагсах шаардлагагүй. Цахимаар саналаа өгөх алтан боломжийг ашиглая.
Мөн Гэрийн тэжээвэр амьтны тухай хуулийн төсөлд анхаарахыг, хуулийн төслүүдэд цахимаар саналаа өгч, идэвхтэй оролцоотой байхыг уриалж байна" гэв.
