Манай сайтын цоо шинэ булан болох "Долоо хоногийн онцлох хүн" буланд уншигч та бүхэн тавтай морилно уу. Бид энэхүү буландаа тухайн долоо хоногт олны анхаарлыг татсан нэгнийг онцлох юм.
Энэ долоо хоногт Хөгжлийн банкны хэргийн шүүх хуралдааныг онцолж байна.
Хөгжлийн банкны хэргийн гэм буруугийн шүүх хуралдаанд нийт 80 хүн, дөрвөн хуулийн этгээд яллагдагчаар татагдан оролцов.
НЭГДҮГЭЭРТ: ХӨГЖЛИЙН БАНКНЫ ЭРХ МЭДЭЛТЭЙ ТОМ ЗАХИРЛУУД ЯЛАА ХӨНГӨЛҮҮЛЭХИЙГ ХҮСЭВ
Хөгжлийн банкны хэргийн шүүх хуралдааны эхний өдөр хэрэгт холбогдогчдын өмгөөлөгчид үг хэлсэн. Ингэхдээ 44 хэрэгт холбогдогчдын өмгөөлөгчид өөрийн үйлчлүүлэгчийг уг хэрэгт ямар ч холбогдолгүй гэж цагаатгуулах хүсэлт тавив. Эдгээр 44 хүний олонх нь Ардчилсан намын гаралтай, хөгжлийн банкны ажилтнууд байв. Харин үлдсэн нь ялаа хөнгөрүүлэхийг хүсжээ. Ялаа хөнгөлүүлэхийг хүссэн хүмүүс нь ихэвчлэн Хөгжлийн банкны том захирлууд буюу 2016 оноос хойш зээл авсан хүмүүс байв. Өөрөөр хэлбэл, ялаа хөнгөрүүлье гэдэг нь нэг ёсондоо хэргээ хүлээсэн гэсэн үг.
ХОЁРДУГААРТ: ХӨГЖЛИЙН БАНКНЫ ХЭРЭГ БОЛ ХЭДЭН ИХ НАЯД ТӨГРӨГ БУС БРЭНДИЙН ХЭТЭВЧ, ҮНЭРТЭЙ УСНЫ ХАХУУЛИАС ЭХЭЛСЭН
Хөгжлийн банкны хэргийн шүүх хуралдааны хоёр дахь өдөр прокурор 300 хуудас яллах дүгнэлтийг уншиж танилцуулсан.
Энэ дүгнэлтэд Хөгжлийн банкны дэд ерөнхийлөгч асан Я.Сод-Эрдэнэ, Хөгжлийн банкны Эрсдэлийн газрын захирал асан, одоогийн Монголбанкны тэргүүн дэд ерөнхийлөгч Г.Дөлгөөн нарын нэр хамгийн их дурдагдсан.
Гэсэн ч тэд Хөгжлийн банкны гэх энэ дуулиант хэрэгт яллагдагчаар татагдаагүй. Энэ нь нэг ёсондоо хамгийн том хэрэгтнүүд нь хэргийн гадна үлдэж, жараахайнууд нь шүүгдэж байна хэмээн яригдах үндэс болжээ. Тухайлбал, уг дуулиант хэргийг ард иргэд томоор төсөөлж, хэдэн их наядын тухай бодож суугаа. Гэвч яг үнэндээ энэ 84 хэрэг дотор “Montblanc” брэндийн хэтэвч, оргилуун дарс, нэг ширхэг үнэртэй ус бэлгэнд авсан, хамаатных нь хүүхэд хурдан морь авсан зэрэг хэргүүд бий.
ГУРАВДУГААРТ: ЯЛЛАГДАГЧААР ТАТАГДСАН 44 ХҮН ЦАГААТГУУЛАХ ХҮСЭЛТ ГАРГАВ
Хөгжлийн банкны хэргийн шүүх хуралдааны гурав дахь өдөр цагаатгуулах хүсэлт гаргасан 44 хэрэгт холбогдогчид шүүх танхимд үг хэлсэн. Тухайлбал, Эдийн засгийн хөгжлийн сайд асан Н.Батбаяр, Хөгжлийн банкны гүйцэтгэх захирал байсан Н.Мөнхбат, Д.Даваасамбуу нар цагаатгуулах хүсэлт гаргажээ.
Н.Батбаяр “Хөгжлийн банкны луйвар хулгай гэж байхгүй. Хөгжлийн банкин дээр өгч байгаа, авч байгаа хүмүүс нь хоорондоо тохиролцоод, гэрээ хийгээд авсан. Энэ бол буух эзэнтэй, буцах хаягтай зүйл. Хулгай дээрэм биш. Би хэзээ хаана ямар хэрэг хийснийг тодорхой болгож өгнө үү, Яллах дүгнэлтэд бусдад давуу байдал олгосон гэж байна. Яаж олгосон бэ” гэсэн юм. Түүний асуултад прокурор хариулахдаа “Засгийн газрын тогтоолыг УИХ-аар батлуулах ёстой байсан. Засгийн газрын тогтоол гарсан өдрөөс эхлээд гэмт хэрэг эхэлж байна” гэсэн нь шүүмжлэл дагуулаад буй.
Харин Хөгжлийн банкны гүйцэтгэх захирал байсан Н.Мөнхбат “Гүйцэтгэх захирлаар ажилласан гурван жилийн хугацаанд Хөгжлийн банк ашигтай ажиллаж байсан. Намайг Н.Батбаяр, Н.Алтанхуяг сайдуудтай хуйвалдсан хэмээн яллах дүгнэлтэд бичсэн. Би үүнийг хүлээн зөвшөөрөхгүй байна. Зээлийн хороог хуралдуулсандаа хүртэл буруутгагдаж байна. Яллах талыг хэт баримталсан байгад гомдолтой байгаа” гэсэн юм.
ДӨРӨВДҮГЭЭРТ: ЗАСГИЙН ГАЗРЫН ТОГТООЛЫГ ШҮҮХ НЬ БУРУУ ЖИШИГ
Хөгжлийн банкны хэргийн гэм буруугийн шүүх хуралдааны дөрөв дэх өдөр Хөгжлийн банкнаас зээл авсан дарааллаар нь хэлэлцсэн. Хамгийн эхэнд Ерөнхий сайд асан Н.Алтанхуяг, Эдийн засгийн хөгжлийн сайд асан Н.Батбаяр, Хөгжлийн Банкны ТУЗ-ын дарга Б.Шинэбаатар нарын холбогдсон “Говийн зам” ХХК хэргийг хэлэлцэв. “Говийн зам” ХХК-ийн барьж байгуулсан хатуу хучилттай авто замыг Засгийн газрын 2013 оны “Нүүрсний экспортыг дэмжих талаар авах зарим арга хэмжээний тухай” 299 дүгээр тогтоолоор уг хатуу хучилттай авто замын өмчлөлийг “Эрдэнэс Монгол” ХХК-д шилжүүлэхээр болсон байдаг. Үүнд УИХ-ын гишүүн Н.Алтанхуяг, Эдийн засгийн хөгжлийн сайд асан Н.Батбаяр нар эрх мэдэл, албан тушаалын байдлаа урвуулан ашиглаж, хууль бусаар оролцсон хэмээн яллагдагчаар татаад буй. Гэвч энэ бол Засгийн газрын тогтоол. Энэ мэт Засгийн газрын тогтоолыг шүүх нь маш буруу жишиг тогтоож байна.
Д.Батчулуун
