УИХ-ын 2024 оны хаврын чуулган буюу энэ парламентын сүүлийн чуулган өнгөрсөн долоо хоногт нээлтээ хийсэн. Чуулган эхлэхтэй зэрэгцэн Монголын улс төрийн амьдрал сэргэж, өдөр бүр сенсацтай өнгөрөх нь гарцаагүй биз ээ. Мөн 2024 он бол сонгуулийн жил. Тиймдээ ч энэ парламентаас хэн, хэн дахин нэр дэвших бол гэдэг нь олны анхаарлын төвд буй.
МАН-ын тухайд "Авлигын хэрэгт холбогдсон улстөрчдийг 2024 оны сонгуульд нэр дэвшүүлэхгүй" хэмээн ЗГХЭГ-ын дарга Д.Амарбаясгалан мэдэгдсэн юм.
Иймд уншигч та бүхэнд энэ дугаарт МАН-аас сонгогдсон гишүүд энэ дөрвөн жилд ямар хэрэгт нэр холбогдсоныг тоймлон хүргэж байна.
УИХ-ын гишүүн асан Т.Аюурсайхан
Тэрбээр Чингэлтэй дүүргээс сонгогдсон. Түүнийг нүүрсний гэх хэрэгт зохион байгуулалттай гэмт бүлэг байгуулах, үндэслэлгүйгээр хөрөнгөжсөн гэдэг үндэслэлээр яллагдагчаар татагдсан.
УИХ-ын гишүүн Ц.Анандбазар
Тэрбээр Булган аймгаас сонгогдсон. Хүчингийн хэрэг, нүүрсний хэрэгт холбогдсон. Гэсэн ч яллагдагчаар татагдаагүй юм.
УИХ-ын гишүүн, Шадар сайд С.Амарсайхан
Тэрбээр Багануур, Багахангай, Налайх дүүргээс сонгогдсон. Түүний хүү А.Энххүслэн нь Боловсролын зээлийн сангаас Английн Бристолын Их сургуульд сурах сургалтын төлбөр хэмээн 77,4 сая төгрөгийн зээл авсан нь ил болсон.
УИХ-ын гишүүн П.Анужин
Тэрбээр Сонгинохайрхан дүүргээс сонгогдсон. Түүнийг АТГ-аас эрх мэдэл албан тушаалаа урвуулан ашигласан гэх үндэслэлээр шалгаж байв.
УИХ-ын гишүүн Б.Баттөмөр
Тэрбээр Дархан-Уул аймгаас сонгогдсон. Түүнийг нүүрсний хэрэгт холбогдуулан шалгаж байгааг АТГ зарласан. Харин тэрбээр шалгуулж, буруугүй нь нотлогдсон аж.
УИХ-ын гишүүн Ё.Баатарбилэг
Тэрбээр Архангай аймгаас сонгогдсон. Түүнийг Хөгжлийн банкны гэх хэрэгт улс төрд нөлөө бүхий этгээд үндэслэлгүй хөрөнгөжсөн, хахууль авсан гэмт хэрэгт яллагдагчаар татсан.
УИХ-ын гишүүн С.Бямбацогт
Тэрбээр Ховд аймгаас сонгогдсон. Түүний дүү С.Балжинням хөгжлийн банкнаас 2019 онд 28 сая ам.долларын зээл авсантай холбогдуулан түүнийг шалгаж байв.
УИХ-ын гишүүн Г.Дамдинням
Тэрбээр Дархан-Уул аймгаас сонгогдсон. Тэр эрх мэдэл албан тушаалаа урвуулан ашигласан гэх үндэслэлээр шалгагдаж байсан. Мөн Канадын Бритиш Колумбиа их сургуульд БЗС-гаас 32 мянган ам.долларын зээл авч сурсан.
УИХ-ын гишүүн Ц.Даваасүрэн
Тэрбээр Хөвсгөл аймгаас сонгогдсон. Боловсролын сангийн зээлийн асуудалд нэр холбогдсон.
УИХ-ын гишүүн Б.Дэлгэрсайхан
Тэрбээр Дорноговь аймгаас сонгогдсон.Түүнийг эрх мэдэл, албан тушаалаа урвуулан ашиглаж, өөрийн хамаарал бүхий компанид давуу эрх олгож байж болзошгүй хэмээн АТГ шалгаж байсан.
УИХ-ын гишүүн, Сангийн сайд Б.Жавхлан
Тэрбээр Дархан-Уул аймгаас сонгогдсон. УИХ-ын гишүүн Б.Жавхлан, С.Даваасүрэн нар Төрийн ордонд бие биенийхээ хулгай луйврыг, нэгнийхээ үйлдсэн эрүүгийн гэмт хэргийн талаар ноцтой мэдэгдлийг хийсэн. Гэсэн ч шалгагдсан эсэх нь тодорхойгүй.
УИХ-ын гишүүн Б.Чойжилсүрэн
Тэрбээр Увс аймгаас сонгогдсон. 2016-2017 онд Сангийн сайдаар ажиллаж байсан бөгөөд сангийн яам хуулийн дагуу Хөгжлийн банкны чанаргүй зээлд хяналт тавих үүрэгтэй байв.
УИХ-ын гишүүн Ц.Сэргэлэн
Тэрбээр Дорнод аймгаас сонгогдсон. Тэр нүүрсний гэх хэрэгт нэр холбогдсон ч АТГ-аас түүнийг яллагдагчаар татан шалгаагүй юм.
УИХ-ын гишүүн Б.Саранчимэг
Тэрбээр Баянзүрх дүүргээс сонгогдсон. Тэр АНУ-ын Гавайн Пасифик их сургуульд БЗС-гаас 32580 ам.долларын зээл авч сурсан.
УИХ-ын гишүүн Ж.Сүхбаатар
Тэрбээр Чингэлтэй дүүргээс сонгогдсон. Тэр “Ногоон автобус”-ны хэрэгт холбогдож яллагдагчаар татагдсан.
УИХ-ын гишүүн асан Ж.Мөнхбат
Тэрбээр Архангай аймгаас сонгогдсон. Түүнийг нүүрсний гэх хэрэгт улс төрд нөлөө бүхий этгээд албан тушаалын байдлаа урвуулан ашиглаж, бусдад давуу байдал бий болгож, хохирол учруулсан, мөн үндэслэлгүйгээр хөрөнгөжсөн үндэслэлээр яллагдагчаар татсан. Тэрбээр өөрийн хүсэлтээр УИХ-ын гишүүний бүрэн эрхээсээ татгалзсан.
УИХ-ын гишүүн Х.Ганхуяг
Тэрбээр Баянгол дүүргээс сонгогдсон. Хөгжлийн банкны гэх хэрэгт хамаарал бүхий компани нь тус банкнаас 33 тэрбум төгрөгийн зээл гэх хэргээр татагдаад байсан ч цагаадсан юм.
УИХ-ын гишүүн Н.Наранбаатар
Тэрбээр Өмнөговь аймгаас сонгогдсон бөгөөд анх удаа УИХ-д сонгогдсон улстөрч. Түүнийг нүүрсний гэх хэрэгт улс төрд нөлөө бүхий этгээд албан тушаалын байдлаа урвуулан ашиглаж, бусдад давуу байдал бий болгож, хохирол учруулсан үндэслэлээр яллагдагчаар татагдан шалгуулж буй.
УИХ-ын гишүүн Ш.Раднаасэд
Тэрбээр Говь-Алтай аймгаас сонгогдсон. Түүнийг нүүрсний гэх хэрэгт улс төрд нөлөө бүхий этгээд албан тушаалын байдлаа урвуулан ашиглаж, бусдад давуу байдал бий болгож, хохирол учруулсан үндэслэлээр яллагдагчаар татсан.
УИХ-ын гишүүн Б.Энх-Амгалан
Тэрбээр Говь-Алтай аймгаас сонгогдсон. Түүнийг улс төрд нөлөө бүхий этгээд албан тушаалын байдлаа урвуулан ашиглаж, бусдад давуу байдал бий болгож, хохирол учруулсан зэрэг үндэслэлээр яллагдагчаар татсан.
Сэтгэгдэл (2)