Энэ сарын 20-22-ны өдрүүдэд Гүржийн нийслэл Тбилиси хотод жүдогийн Их Дуулга тэмцээн болох билээ. Өнөөдөр эхлэх уг тэмцээнд Монгол Улсыг төлөөлөн есөн жүдоч өрсөлдөхөөр болсон. 

Тодруулбал, эрэгтэйчүүдийн 60 кг-ын жинд Б.Сүхбат, Н.Мэндсайхан, 66 кг-ын жинд Дэлхийн Аварга Шалгаруулах Тэмцээн (ДАШТ)-ий хүрэл медальт К.Ёолк, Ө.Жанцандорж, 73 кг-ын жинд олимпын хүрэл, дэлхийн аварга, Монгол Улсын Гавьяат тамирчин Ц.Цогтбаатар, эмэгтэйчүүдийн 48 кг-ын жинд А.Мишээл, 57 кг-ын жинд М.Цэндбазар, 63 кг-ын жинд дэлхийн хошой хүрэл медальт, Монгол Улсын Гавьяат тамирчин Л.Энхрийлэн, -78 кг-ын жинд Ж.Урангоо нар зодоглох юм.

Тэгвэл өнөөдөр тэмцээний эрэгтэйчүүдийн 60 кг, 66 кг, эмэгтэйчүүдийн  -48 кг, -52 кг, -57 кг-ын жингийн өрсөлдөөн болно. Өнөөдөр манайхаас, 

• 60 кг - Б.Сүхбат,
• 60 кг - Н.Мэндсайхан, 
• 66 кг - К.Ёолк,
• 66 кг - Ө.Жанцандорж, 
• -48 кг - А.Мишээл
• -52 кг - М.Цэндбазар нар зодоглоно. 

К.Ёолкийн хувьд өнгөрсөн ДАШТ-ээс медаль хүртсэнээс хойш оролцох хоёр дахь тэмцээн нь энэ аж. Тэрбээр өнгөрсөн оны сүүлээр Парисын Их Дуулгад оролцсон аж. Гэмтлийн улмаас хэсэг хугацаанд барилдаагүй Ц.Цогтбаатар саяхан улсын аваргадаа түрүүлсэн юм. Тэр хамгийн сүүлд 2024 оны тавдугаар сард Казахстаны Их Дуулгад өрсөлдсөн юм.

Л.Баяр