Голомт банкны олон улсын зах зээлд гаргасан 300 сая ам.долларын бонд IFR Asia Awards 2024-ын оны шилдгүүдийн нэгээр тодорч, “Frontier Markets Deal”-ээр өргөмжлөгдлөө.
Энэхүү шагналыг “International Financing Review Asia” сэтгүүлээс жил бүр Азийн бүс нутагт амжилттай хэрэгжсэн хөрөнгө оруулалт, санхүүгийн хэлцлүүдэд олгодог бөгөөд Голомт банк ийнхүү олон улсын томоохон банкнуудтай эн зэрэгцлээ.
Тодруулбал тус сэтгүүлээс Голомт банкны олон улсын зах зээлд 2024 онд гаргасан 300 сая ам.долларын бонд нь 2012 оноос хойш Монголын арилжааны банкнуудаас анхдагч бөгөөд Монгол улсын санхүүгийн салбарын нэр хүндийг өргөхөд чухал хувь нэмэр оруулсан хэмээн онцолж, шилдгээр тодруулж буй юм.
Тус олон улсын бондыг Reg S/144A форматаар гаргасан ба андеррайтераар нь Deutsche Bank AG, J.P. Morgan Securities PLC, Korea Investment & Securities Asia Ltd. зэрэг дэлхийн томоохон хөрөнгө оруулалтын банкнууд болон Frontier Strategies Pte Ltd. зөвлөх үйлчилгээ үзүүлж хамтран ажилласан билээ.
Уг үйл явдал нь Голомт банк олон улсын зах зээлээс хөрөнгө оруулалт болон санхүүжилт татах өндөр босгыг давж, мэргэжлийн хөрөнгө оруулагчдын итгэлийг даах найдвартай үйл ажиллагаатайг илэрхийлэл болсон юм.
Голомт банк харилцагч, хувьцаа эзэмшигч, хөрөнгө оруулагчдадаа урт хугацааны үнэ цэнийг бий болгох амлалтаа бэхжүүлж, олон улсын санхүүгийн зах зээл дэх хамтын ажиллагаа, оролцоогоо нэмэгдүүлэхэд онцгой анхааран ажиллаж байна.
