Украины Ерөнхийлөгч Владимир Зеленский болон Европын бусад долоон удирдагч АНУ-ын Ерөнхийлөгч Доналд Трамп, ОХУ-ын Ерөнхийлөгч Владимир Путинтай Баасан гарагт Аляскад хийсэн дээд хэмжээний уулзалтын ард буюу өнгөрсөн даваа гарагт "Цагаан ордон"-д богино хугацааны шуурхай айлчлал хийлээ.
Трамп, Зеленский нарын уулзалтад Европын удирдагчдыг оролцуулсан нь дайныг нэг тийш нь болгох гэсэн АНУ-ын үзэл баримтлалыг тод харуулж байгаа. 2022 оны 2-р сард ОХУ-ын бүрэн хэмжээний түрэмгийллээр эхэлсэн Украины гурван жил хагас үргэлжилсэн дайныг зогсоох арга замыг хайж олох зорилготой уг уулзалтын хүрээнд ямар үйл явдал өрнөв?
Боломжит гурван талт уулзалт: Трамп олон нийтийн сүлжээнд Путин, Зеленский нарын уулзалтыг зохион байгуулах болсноо мэдэгджээ. Хоёр талын уулзалт болсны дараа гурван талт уулзалт дээр ажиллахаа мэдэгдлээ. Украины ерөнхийлөгч хэвлэлийн бага хурал дээр Оросын ерөнхийлөгчтэй "ямар ч хэлбэрээр" уулзахад бэлэн гэдгээ мэдэгдэв.
Аюулгүй байдлын баталгаа: Өнөөдрийн хэлэлцүүлэгт Украины аюулгүй байдлын баталгааны хүрээнд Европын санхүүжилтээр 90 тэрбум ам.долларын америк зэвсэг худалдан авах төлөвлөгөө багтсан гэж Зеленский хэллээ. Баталгаажуулалтын өөр нэг хэсэг нь Украины үйлдвэрлэсэн нисгэгчгүй онгоцуудыг багтаах бөгөөд заримыг нь АНУ худалдаж авах болно. Энэ асуудал яригдаж байгаа бөгөөд албан ёсны тохиролцоонд хүрээгүй байна. Ирэх долоо хоног буюу 10 хоногийн дотор гэрээг албан ёсоор баталгаажуулах юм байна.
Украины хил хязгаарыг дахин зурах: Зеленский Трамптай Украины Оросуудад булаалгасан газар нутгийг харуулсан Зууван танхимд байрлуулсан газрын зургийн талаар удаан ярилцсанаа мэдэгдэв. Гэсэн хэдий ч Украины нутаг дэвсгэрийг дахин төлөвлөх асуудлыг хэлэлцээгүй гэж НАТО-гийн тэргүүн мэдэгдээд, удирдагчид үүнийг ОХУ-ын оролцоотой гурван талт уулзалтаар хэлэлцэх асуудал гэдэгт санал нэгдсэн ажээ.
АНУ-ын Төрийн нарийн бичгийн дарга Марко Рубио хэлэхдээ, Трампын засаг захиргаа Украины ерөнхийлөгч Владимир Зеленский, ОХУ-ын ерөнхийлөгч Владимир Путин нарын хооронд "урьд өмнө байгаагүй" уулзалт зохион байгуулахаар ажиллаж байна. Хэрэв энэ уулзалт үр дүнд хүрвэл Доналд Трамп, Путин, Зеленский нарын гурвалсан уулзалт болно гэж тэр хэлэв.
Л.Баяр
