24tsag.mn "GenZ-ийн нүдээр улстөрчид" буланд тавтой морил. Энэ удаад УИХ-ын гишүүн "Босоо" хочит С.Ганбаатарын тухай өгүүллээ. GenZ-д түүний тухай эргэцүүлэл байна. 

Улс төрийн намыг хүний, өөрийн гэж ялгалгүй сиймхий байвал шургаж, босго байвал гололгүй элээж явдаг "Босоо" хочит С.Ганбаатар бол биелэгдэшгүй мөрөөдөл тээгч нэгэн. Тэр мөрөөдлөөсөө хэзээ ч ичиж, эмээж байсангүй. Ямар сайндаа л Монгол Улсын Ерөнхийлөгч болохыг хүсэж, зүүд зэрэглээн дундаа 20 жил гацах вэ дээ. Ер нь А.Гитлерийг шүтдэг гэж байсан нөхөр юу эсэхийг мөрөөдөх билээ. 

Тэр бараг л хамгийн олон "экс" Ерөнхийлөгчтэй хөтлөлцөж үзсэн ганц улстөрч байх. Парламентын чуулган дээр босож зогсож байгаад үгээ хэлдэг нь одоо бол зарим нэгний элэг доог, улиг болсон.

Улс төрийн "гүйдэл"-ийн чилийсэн урт жилүүдэд буюу 2012 оноос хойш нэгхэн удаа сонгуульд ялагдаж босоогоороо өвдөг шороодсон нь бас л галзуу CV юм даа. Дагзаараа савуулсан ч багалзуурт нь тээглээд унтуулдаггүй төрийн сэнтийг мөрөөдөхөө Ганбаа болиогүй. Аягүй л бол ирэх сонгуулиар нэрээ дэвшүүлж мэдэх л хүн. Чухамдаа "дур эзнээ голохгүй, дунд чөмөг сүүжээ голохгүй" гэдгийн үлгэр юм.  

Тэрбээр Ерөнхийлөгч асан Н.Энхбаяраас эхлээд ХҮН намын Т.Доржхандтай хүртэл хөл гар, хүзүү сээрээ холбоод, саяхан Ерөнхийлөгч асан Х.Баттулгатай туг өргөлцөж гүйгээд сүйд болсон санагдана. Нам, намын гишүүн болж гарч орсоор хөлд нь салхи суусан С.Ганбаатарыг одоо ч эх оронч гэж харах хүмүүс байдаг гэлцэх.

Шашинлагийн туйл болсон тэрбээр "хоосон чанар"-т нэгэнт нэвтэрсэн нь өөрийн гэсэн зарчимгүй, улс төрдөө л үлдэж байвал улаан коммунизмд хэдэн ч удаа хайр зарлаж, ардчилалд хэдэн ч удаа "дунд хуруу" өгч чадах мэт харагдах ч шиг.

Үнэндээ тэр аль эрт үхсэн. Учир нь үхсэн ч орохгүй гэж байсан МАН, АН-ынхаа батлахыг өвөртөлчихсөн юм билээ. 

Одоо түүнийг АТГ эргүүлдээд бөөн юм болж байгаа. Ямар нэг "но" байгаа болохоор л хууль хүчнийхэн хөдөлж байгаа гэж бодох ёстой ч тэр өөрийгөө Ерөнхийлөгчөөс болж шалгуулж байгаа гэж бодож яваа. Эцэст нь цаг хугацаа бүхнийг харуулна. Парламентийн “босоо” улстөрч асан тэрбээр өлсөгч, тэмцэгчийн тодорхойлолтоос салхины аясаар намирч байдаг “Дарцаг” нэрийг зүүх алдрын замд нэгэнт хөл тавьсан. Дарцаг аль зүгт хийсэхээ өөрөө шийдэхгүй, түүнийг залуурдагч нь зөвхөн салхи. 

Би лав Монгол Улсын ард түмний эв найрамдлын бэлгэ тэмдэг нь С.Ганбаатар болно гэж төсөөлж ч чадахгүй. Салхинд хийсэж  зүг бүрд таталдсан дарцаг мэт хүний санааг хэн ч удирдаж мэднэ шүү дээ. 

М.Гал