Кино шүүмжлэгчид болон үзэгчдийг анхаарлыг татаад буй "Ацаахийморь" олон ангит УСК-ны гол дүрийн жүжигчин, дуу оруулагч Ч.Булгантай ярилцлаа. Тэрбээр уг кинонд Мөнх-Аз гэх хошуучийн дүр дээр ажилласан юм. 

-Танд энэ өдрийн мэндийг хүргэе. Үзэгчдийн хүртээл болоод буй "Ацаахийморь" киноны талаар яриагаа эхэлье. Та уг кинонд Мөнх-Аз гэх хошуучийн дүрд ажилласан шүү дээ. Дүрийн саналыг хэрхэн хүлээж авсан бэ? 

-Баярлалаа. "Ацаахийморь" бол миний олон ангит киноны анхны гол дүр. Анх дүрийн саналаа баяртайгаар хүлээн авсан. Киноны баг хамт олон их чадварлаг, мөн киноны зохиол таалагдсан учир энэ уран бүтээл дээр ажиллахаар шийдсэн. 

-Уг кино дарк комеди жанрын кино гэдгээрээ онцлог шүү дээ. Кино зохиол танд ямар сэтгэгдэгдэл төрүүлсэн бэ? 

-Нийгэмд болоод байгаа асуудлуудыг егөөдөж хүргэж байгаа нь дарк комеди төрлийн онцлог гэж бодсон. Кинон дээр гарч буй үйл явдал яг л манай улсын өнөөгийн нөхцөл байдлыг харуулж байгаа. Зохиолыг уншихад үзэгчдэд хэлэх гээд байгаа ерөнхий санаа нь эрчүүдийн төлөө дугарсан, анхааруулсан мессеж өгч байгаа юм шиг санагдсан. Бид дандаа л эмэгтэйчүүдийн эрх ашиг гэж ярьдаг. Харин эрэгтэйчүүдэд ч мөн эрх ашиг гэж бий шүү дээ. 

-Дарк комеди кино таны өмнө тоглож байсан кинонуудаа юугаараа өөр байсан бэ? 

-Дарк комеди кинонд анх удаа тоглосон л доо. Бараг манай кино энэ төрлийн хамгийн анхны Монгол кино ч байж магадгүй юм. Бид эхний хоёр ангиа кино багаараа сууж байгаад үзсэн. Тэгэхэд хачин их инээдтэй л санагдаад байсан. Бид "Өөрсдөө гараад байгаа болохоор инээгээд байна гэж баймааргүй юм" гээд л инээлдээд ярьж байлаа. Харин кино үзэгчдийн хүртээл болсны дараа "Тоглолтын хувьд энгийн хэр нь хөгжилтэй байж чадаж байна" гэх үгсийг их сонссон.

Бид киноныхоо ерөнхий жанрыг дөхүүлсэн болов уу гэж бодож байна. 

-Дүрийн сонголтын хувьд олны танил жүжигчид маш цөөхөн байсан. Энэ нь киног илүү үнэмшилтэй байдал руу хөтөлж байна гэх яриа ч гарсан. Дүрийн сонголт танд ямар санагдсан бэ? 

-Тийм ээ. Дүрийн сонголт надад ч их таалагдсан. Шинэ жүжигчид олон байсан учир жүжиглэлтийн хувьд үзэгчдэд их ойр байсан байх. 

-"Ацаахийморь" кинонд танаас эхлээд орчуулгын киноны жүжигчид тоотой хэд харагдсан. Орчуулгын киноны хэдэн хүн уг кинонд тоглосон юм бэ? 

-Би энэ талаар найруулагчаас асуусан л даа. Манай орчуулгын киноныхон энэ тэнд кинонд тоглодог. Харин энэ кинонд яагаад нэлээн хэдээрээ байгаа юм бэ гээд сонирхоод асуусан юм. Гэтэл туршлагатай хэр нь олны танил биш жүжигчид хайхад орчуулгын кинонд л байдаг юм байна гэсэн. Манайхаас тав, зургаан жүжигчин тоглосон. 

-Та жүжигчин, дуу оруулагч мэргэжилтэй хүн. Ер нь дуу оруулах, камерын өмнө дүр бүтээх хоёрын аль нь илүү ойр санагддаг вэ? 

-Аль аль нь л үнэн байхыг шаарддаг. Мөн мэдрэмж, дуу хоолой чухал. Манай мэргэжлийн хүмүүс л энэ хоёр ажлыг хийх чадвартай гэж хардаг.

Дуу оруулагч гэхээр өөр мэргэжил гэж ойлгоод байдаг. Үгүй л дээ. Царай нь дэлгэцээр гарахгүй байгаа болохоос жүжигчны ажлыг байнга хийдэг.  

-Та мэргэжлээ хэрхэн сонгож байв? 

-Жүжигчин мэргэжил бол цаанаасаа л татах увидастай мэргэжил гэж боддог. Яагаад ч юм энэ мэргэжлийг сонгож, төгссөн. Яагаад энэ мэргэжлийн сонгосноо мэдэхгүй ч гэсэн энэ мэргэжил намайг аз жаргалтай амьдруулах мэргэжил гэдэгт нэг өдөр ч эргэлзэж байгаагүй. 

-Орчуулгын кинонд хэзээнээс дуу оруулж эхэлсэн юм бэ? 

-Орчуулгын кинонд оюутан байхаасаа ажиллаж эхэлсэн. Анх дуу оруулж эхлэхэд чадахгүйн бэрхшээлүүд их гарсан л даа. Гэхдээ дуртай ажил минь болохоор үүнийг хурдан сурах юмсан гэх хүсэл нь их байсан. 2015 оноос Хятадын кинонуудын орчуулгын жүжигчнээр ажиллаж байна. Одоогоор таван мянга гаруй ангид ам барьж, дуу оруулсан байна гэж 10 жилийн ойгоор яригдаж байсан. 

-Хүмүүс таныг дуу хоолойгоор тань таних тохиолдол их гарна биз? 

-Тийм ээ. Юу хийдэг хүн бэ тод ярих юм гэдэг үгийг их сонсож байсан. Зарим хүмүүс сонссон хоолой байна, танил хүн шиг байна гэдэг. Тэгэхээр хүмүүст танил мэдрэмж төрүүлдэг юм шиг байгаа юм. 

-Ярилцсанд баярлалаа. 

Д.Батчулуун