Сингапур улс цахилгаан тамхи (вейп)-тай хийх тэмцлээ эрс чангатгаж, дэлхий дахины анхаарлыг татаж байна. 2018 оноос хойш вейпийг бүрэн хориглосон тус улсад сүүлийн жилүүдэд нууцаар хил дамнан, ялангуяа мансууруулах бодис агуулсан “K-под” нэртэй вейпүүд олноор тархах болсон нь эрх баригчдыг илүү хатуу арга хэмжээ авахад хүргэжээ.

Эдгээр K-под нь кетаминтай төстэй нөлөөтэй мэдээ алдуулагч бодис агуулдаг бөгөөд залуус олон нийтийн газар ухаан алдах, хяналтаа алдах бичлэгүүд цахим орчинд тархсанаар нийгэм даяар цочрол үүсгэсэн юм.

Үүний хариуд Сингапурын засгийн газар вейпийг зүгээр нэг эрүүл мэндийн асуудал бус, хар тамхины ноцтой аюул гэж үзэн өргөн хүрээтэй  цахилгаан тамхины эсрэг дайн зарлалаа. Одоо вейп хэрэглэж байгаад баригдсан хүн торгууль төлөхөөс гадна шоронд хоригдох, албадан нөхөн сэргээх эмчилгээнд хамрагдах, бүр олны өмнө ташуурдуулж шийтгэгдэх ч боломжтой болсон байна. Мансууруулах бодис агуулсан цахилгаан тамхийг  худалдаалж борлуулсан тохиолдолд 20 жил хүртэл хорих ял, 15 удаа ташуурдах ял оногдуулах гэнэ. Сургуулиудад ч мөн адил сахилга батын хатуу шийтгэл хэрэгжихээр болжээ.

Мөн вейпийг сайн дураараа хаях зориулалттай хогийн савуудыг хот даяар байршуулж, нийтийн тээвэр, гудамж талбайд шалгалт хийх нь энгийн үзэгдэл болжээ. Үүнээс гадна вейп хэрэглэж буй хүнийг мэдээлэх тусгай утас нээсэн бөгөөд эхний есөн долоо хоногт л гэхэд 2,600 гаруй дуудлага ирсэн байна. Үүнийг дагаад төрөөс хэрэгжүүлж буй вейпийн эсрэг сурталчилгаа телевиз, сошиал медиа, гудамж талбайг бүрхэж, цахилгаан тамхины сөрөг нөлөөг агуулсан бодит тохиолдлуудыг харуулж байгаа нь онцлог юм.

Энэхүү хатуу бодлогыг Сингапурын олонх иргэн дэмжиж байгаа ч бүх иргэд санал нийлэхгүй нь тодорхой. Зарим вейп хэрэглэгчид ердийн вейпийг хар тамхитай адилтган бүрэн хориглосон нь шударга бус гэж үзэж байна. Тэдний зарим нь дахин улам хортой тамхи руу шилжихээс өөр аргагүй болсон хэмээн ярьжээ. Харин эсрэг байр суурьтай хүмүүсийн зүгээс “нэг муу жишээнээс болж бүхэл бүтэн зах зээлийг хориглох нь зайлшгүй, учир нь залуусыг хамгаалах нь нэн тэргүүний асуудал” гэж үзэж байна.

Сингапурын энэ арга барилыг ДЭМБ “дэлхийн тамхи, мансууруулах бодлогын дараагийн арван жилд нөлөөлөх эргэлтийн цэг” хэмээн үнэлсэн ч бүх улс ижил замаар явах эсэх нь тодорхойгүй хэвээр байна. Зарим орон вейпийг тамхинаас гарахад тустай, харьцангуй бага эрсдэлтэй гэж үздэг бол Сингапурын хувьд “эртнээс таслан зогсоох” нь хамгийн зөв шийдэл гэж үзжээ. Гэсэн ч жижиг нутаг дэвсгэр, хүчирхэг төрийн эрх мэдэлгүй улс орнууд ийм хэмжээний хатуу хоригийг удаан хугацаанд хэрэгжүүлж чадах эсэх нь нээлттэй асуулт хэвээр байна.

Эх сурвалж: BBC