Энэ сарын 16 буюу өнгөрсөн пүрэв гарагт АНУ-ын Виржиниа мужийн дэд захирагч асан Жастин Фэйрфакс эхнэрээ буудаж хөнөөгөөд, дараа нь өөрийнхөө амийг егүүтгэсэн тухай тус мужийн цагдаагийн газар мэдэгдэв.
Мужийн цагдаагийн дарга Кевин Дэвисийн хэлснээр, тэдний өсвөр насны хүү шөнө дундад 911 рүү дуудлага өгчээ. Цагдаа нарыг очиход тэд хоёул нас барсан байдалтай олдсон. Мөн хэрэг явдал хүүхдүүдийнх нь нүдэн дээр болсон аж. Цагдаа нарын хэлснээр, Жастин Фэйрфакс өнгөрсөн нэгдүгээр сард эхнэр Серина Фэйрфаксыгаа нь өөрт нь халдсан гэж цагдаа руу дуудлага өгч байжээ. Гэсэн ч цагдаа нар гэрийн доторх камерын бичлэгийг шалгасны дараа худал мэдээлэл байсныг нь тогтоосон байна.
Урьдчилсан дүгнэлтээр, хосууд салалтын маргаантай байсан нь хэрэг гарах гол шалтгаан болсон. Шүүхийн баримтад тэд 2024 онд салсан бөгөөд өнгөрсөн жил салалтын мэдэгдэл гаргасан гэжээ.
Нью-Йорк хотын Колумбын Их Сургуулийг хуулийн чиглэлээр төгссөн Фэйрфакс нь Ардчилсан намын улс төрийн янз бүрийн кампанит ажилд идэвхтэй байв. Тэрээр Виржиниа мужийн дэд захирагч болохоосоо өмнө АНУ-ын Сенатын шүүхийн хороонд ажиллаж байсан нэгэн.
Тэрээр 2017 оны 11 дүгээр сард мужийн 41 дэх дэд захирагчаар сонгогдсон бөгөөд энэ албан тушаал нь захирагчийн дараа орох эрх мэдэл юм.
Дьюкийн Их Сургуульд оюутан байхдаа танилцсан хосууд 2006 онд гэр бүл болжээ. Хосуудын салах болсон шалтгаан нь Фэйрфаксын 2019 ил болсон 2000, 2004 онд үйлдсэн бэлгийн хүчирхийлэл үйлдсэн хэргээс нь үүдэлтэй. Хэргийн дараа тэд санхүүгийн бэрхшээлтэй тулгарсан бөгөөд энэ нь түүнийг нэр хүндтэй хуулийн фирмийн түншийн албан тушаалаасаа огцроход хүргэсэн байна. Мөн тухайн үед түүнийг албан тушаалаасаа буухыг олон нийт шаардсан боловч бүрэн эрхийн хугацаагаа дуустал албаа хашжээ. Татварын алба түүнд 91 мянга гаруй ам.долларын төлөөгүй татварын барьцааны нэхэмжлэл гаргасан боловч 2021 онд өрөө барагдуулсан байна.
Эхнэр 49 настай Серина Фэйрфакс нь Виржиниа мужийн хойд хэсэгт шүдний эмнэлэг ажиллуулдаг байсан бөгөөд Дюкийн их сургууль болон Виржиниа мужийн Хамтын нөхөрлөлийн их сургуульд мэргэшжээ.
Түүний шүдний эмнэлгийн вэбсайт дээрх нүүр хуудсанд түүнийг аялах, йогоор хичээллэх, Визсла үүлдрийн нохойтойгоо хамт гүйх, "гайхалтай гэр бүлтэйгээ цагийг өнгөрөөх" дуртай, ном уншигч гэж тодорхойлжээ.
Л.Баяр
