Тед Тернер нэрээрээ олны танил болсон CNN агентлагийг үндэслэгч Роберт Эдвард Тернер 2026 оны тавдугаар сарын 6-нд 87 насандаа Флорида дахь гэртээ таалал төгсжээ. Түүний үхлийг гэр бүлийнхэн болон "Turner Enterprises" компани албан ёсоор мэдэгдсэн байна. Тернер 2018 онд өөрийгөө "Lewy body dementia" гэх мэдрэлийн доройтлын өвчтэй болсноо олон нийтэд зарлаж байсан юм.

Тед Тернерийг дэлхийн хэвлэл мэдээллийн салбарыг үндсээр нь өөрчилсөн хүн хэмээдэг. Тэрээр 1980 онд CNN Official Site сувгийг байгуулснаар дэлхийд анх удаа 24 цагийн турш тасралтгүй мэдээ дамжуулдаг телевизийн сүлжээг бий болгосон юм. Энэ шийдвэр тухайн үедээ маш эрсдэлтэй алхамд тооцогдож байсан ч хожим дэлхийн бүх телевизийн салбарын жишиг болсон билээ.

CNN нь Персийн булангийн дайн, Берлиний хана нурсны дараах үйл явдал, Тяньаньмэний талбайн эсэргүүцэл зэрэг дэлхийн түүхэн мөчүүдийг шууд дамжуулснаар асар их нөлөөтэй хэвлэл мэдээллийн байгууллага болсон юм. Тернерийн байгуулсан 24 цагийн мэдээний цикл нь хүмүүсийн мэдээлэл хүлээн авах хэв маягийг бүрэн өөрчилсөн гэж судлаачид үздэг.

1938 онд АНУ-ын Охайо мужийн Цинциннати хотод төрсөн Тернер эцгийнхээ сурталчилгааны самбарын бизнесийг залгамжлан авч, дараа нь телевизийн салбарт хүч түрэн орж иржээ. Тэрээр Атланта хотын жижиг телевизийн сувгийг худалдан авч, улмаар TBS “superstation”-ийг байгуулсан нь кабелийн телевизийн шинэ эрин үеийг эхлүүлсэн гэж үздэг. Хожим TNT, Cartoon Network, Turner Classic Movies зэрэг сувгуудыг ч байгуулсан байна.

Тед Тернер зөвхөн медиа салбарт бус спорт, байгаль хамгаалал, хүмүүнлэгийн үйл ажиллагаагаараа алдартай байв. Тэрээр бейсболын "Atlanta Braves" баг болон NBA-ийн "Atlanta Hawks" багийг эзэмшиж байсан бөгөөд 1977 онд Америкийн алдарт America’s Cup дарвуулт завины тэмцээнд түрүүлж байжээ.

Мөн тэрээр НҮБ-ын үйл ажиллагааг дэмжих зорилгоор 1 тэрбум ам.долларын хандив өгч, United Nations Foundation-ийг байгуулсан нь тухайн үеийн хамгийн том хувийн хандивуудын нэгт тооцогдож байв.

Түүний шулуун шударга, этгээд өнгө аястай зан араншин нь “Mouth of the South”, “Captain Outrageous” гэх хочийг хүртэл авчирч байсан бөгөөд өөрөө нэгэнтээ “Надад жаахан даруу зан байсан бол би төгс хүн байх байлаа” хэмээн хэлж байсан нь олон нийтийн дунд домог мэт яригддаг.

    Тед Тернерийн нас барсан тухай мэдээ гарсны дараа дэлхийн хэвлэл мэдээллийн салбарынхан түүнийг “орчин үеийн мэдээллийн ертөнцийг бүтээсэн хүн” хэмээн хүндэтгэн дурсаж байна. CNN сувгийн удирдлагууд түүнийг “айдасгүй сэтгэгч, мэдээллийн салбарын хувьсгалч” байсан гэж мэдэгджээ.

Л.Баяр