МҮБХ-ны Ёс зүй, сахилга хариуцлагын зөвлөлийн хурал өнгөрсөн лхагва гарагт болж, уг хурлаар Улсын арслан Р.Пүрэвдагва, Говь-Алтай аймгийн Эрдэнэ сумын харьяат, аймгийн арслан Я.Бумбаяр нарын ёс зүйн зөрчлийг хэлэлцсэн. Улмаар арслан Р.Пүрэвдагвын барилдах эрхийг таван сараар, Аймгийн арслан Я.Бумбаярын цолыг нэг сараар тус тус хасжээ. 

Р.Пүрэвдагва арслангийн хувьд өнгөрсөн ням гарагт болсон Өмнөговь аймгийн Манлай сумын харьяат, БНМАУ-ын арслан Г.Дэмүүлийн нэрэмжит, Наадмын сорилго барилдааны тавын даваанд Улсын начин Б.Сосорбарамд унах үедээ доороос нь цохих оролдлого хийсэн. Харин Я.Бумбаярын хувьд дүү Сумын начин Я.Буянтогтохыг нь эмч бие дээр нь гарсан тууралтын улмаас барилдуулах гэж шийдвэрлэхэд маргасан гэх яриа байна. 

Тэгвэл уг асуудлаар олон нийтийн сүлжээнд маргаан өрнөж байна. МҮБХ-ны Ёс зүйн хорооны гишүүд бөх мэддэг хүн байдаггүй гэх яриа ч олны чихийг дэлсэв. Тэгвэл уг зөвлөлд доорх зургаан гишүүн байдаг. Эдгээр хүмүүс дээрх бөхчүүдийг барилдах эрхийг хасах шийдвэр гаргажээ.

• Өмгөөлөгч - П.Цолмонбаатар
• Хүний их эмч - Ш.Цэрэнсамбуу
• Эрх зүйч - П.Мөнхжаргал
• Эрх зүйч - Д.Золбаяр
• Хуульч - М. Минжин
• Хуульч - Д. Майцэцэг

Ёс зүй, сахилга хариуцлагын зөвлөл нь барилдаан, тайлбар, зохион байгуулалттай холбоотой гомдол, маргааныг дүрэм журмын хүрээнд хянан хэлэлцэж, зөрчил гарсан тохиолдолд дүгнэлт, зөвлөмж гарган ажиллах үүрэгтэй ажээ.

Л.Баяр