АНУ-ын шилдэг хувийн их сургуулиудын нэг болох Корнеллийн их сургуулийн оюутнуудын 2024 онд бүлэглэн үйлдсэн хүчингийн хэрэг олон нийтэд ил болж томоохон шуугианыг тариад байна. Ташрамд дурдахад Монгол улсын иргэн Э.Билгүүн 2024 онд тус сургуульд суралцаж байх хугацаандаа хүчингийн хэрэгт буруутгагдаж найман жилийн хорих ял сонсож, шийтгэлээ хүлээж байгаа билээ.
Бүлэг хүчингийн хэргийн тухай дурдахад, тус хэргийг Корнеллийн их сургуулийн “Чи Пи” гэх эрэгтэй оюутнуудын нийгэмлэгийн долоон гишүүн оюутан 2024 оны аравдугаар сарын 19-20-ны шилжих шөнө болсон үдэшлэгийн үеэр 20 настай эмэгтэй оюутанд хүчээр мансууруулах бодис өгч, өөрийгөө хянах чадваргүй болсон үед нь бүлэглэн хүчиндсэн гэх хэргийг хохирогч талаас энэ оны есдүгээр сарын 28-ны өдөр олон нийтэд зарласан байна. Одоогийн байдлаар тус долоон этгээдэд ямар нэгэн эрүүгийн хэрэг үүсээгүй байгаа боловч тус хэрэг болсон дүүргийн прокурор уг хэргийг тангарагтны шүүхэд (grand jury) танилцуулж хэргийн мөрдлөгийг эхлүүлнэ гэдгээ мэдэгдсэн байна.
Жэйн Доу гэх нэрээр мэдэгдэл гаргасан хохирогчийн мэдүүлгийг хүргэхэд тэрбээр хэрэг гардаг 2024 оны аравдугаар сарын 19-ний шөнө бага зэргийн согтууруулах ундаа хэрэглэсэн байсан үедээ Чи Пи гэх оюутны нийгэмлэгийн байранд найзтайгаа уулзахаар очсон байна. CBS News болон Fox 8 сувгийн мэдээлснээр, тус нийгэмлэгийн хоёр гишүүн түүнд кетамин гэх бодис хэрэглэхийг шахаж, албадсан байна. Цаашлаад түүнд марихуан, согтууруулах ундаа өгснөөр хохирогч биеэ удирдах чадвараа алдаж, бүрэн ухаангүй болжээ. Шөнийн 1:42 цагийн орчимд нэгэн гишүүн нийгэмлэгийн снапчат дээрх групп чат руу “үнэгүй бэлгийн харьцаанд орох хүмүүс хүрээд ир” гэх утгатай бүдүүлэг мессеж илгээсэн баримт нь олон нийтэд тархаад байгаа бөгөөд бүлэг хүчингийн хэрэг шөнийн 5:45 хүртэл үргэлжилсэн гэж хохирогч тал мэдээлээд байгаа юм.
Хэвлэл мэдээллийн байгууллагууд энэ үйл явдлыг 6-7 цаг орчим үргэлжилсэн гэж мэдээлжээ. Хохирогч тал Корнеллийн их сургуулийн эсрэг гаргасан нэхэмжлэлдээ хайхрамжгүй байдал, хараа хяналтгүй байдал, сургууль сурагчийн хоорондын гэрээний зөрчил, түүнчлэн мужийн хүний эрх, боловсролын хуулийг зөрчсөн зэрэг гомдлуудыг багтааж тодорхой хэмжээний нөхөн төлбөр (үнийн дүн олон нийтэд ил болоогүй) хүсэмжилсэн байна.
Хэрэг үйлдсэн гэх долоон этгээдийн хувьд хэн нь ч хуулийн хариуцлага хүлээгээгүй бөгөөд энэ хэрэгтэй холбоотой зөвхөн нэг этгээдийн өмгөөлөгч олон нийтэд хандаж хариу тайлбар өгсөн байна. Корнеллийн их сургуулийн лавлах сангаас авсан мэдээллийн дагуу уг долоон этгээдийг нэрлэхэд Мэттью Ингаллс, Жонатан Ньюэлл, Уинстон Ли, Жиллио Лопес, Диего Сарабиа, Скотт Норрис, Скотт Кретчмар. Эдгээд долоон оюутнуудаас Уинстон Ли болон Жиллио Лопес нар одоо хүртэл Корнеллийн их сургуульд суралцсаар байгаа юм байна. Уинстон Лигийн хувьд БНСУ-ын иргэн бөгөөд жинхэнэ нэр нь Ли Жүн-Ёнг. Тэрбээр хэрэг гарснаас хойш БНСУ руу буцаж цэргийн алба хаасан бөгөөд энэ жилээс буцаж сургуульдаа сурж байгаа гэх албан бус эх сурвалжийн мэдээллүүд байна.
Хохирогчийн хувьд энэ хэрэг үйлдэгдсэнээс ойролцоогоор гурван долоо хоногийн дараа Корнеллийн их сургуулийн цагдаад мэдэгджээ. 2024 оны 11-р сард Корнеллийн цагдаагийн газраас Томпкинс тойргийн прокурорын газарт мөрдөн байцаалтынхаа талаар мэдэгдэж, "Жэйн Доугийн гаргасан мэдүүлгийг хянаж, түүний гомдол нь Нью-Йорк мужийн хуулийн дагуу гэмт хэрэгт тооцогдох эсэхийг тогтоож өгөхийг" хүсжээ. Гэвч ямар ч хэрэг үүсгээгүй байна.
Тойргийн прокурор Мэттью Ван Хаутен тухайн үед түүний өгсөн мэдүүлэгт "бүлэглэн хүчиндүүлсэн эсвэл мансууруулах бодис өгсөн гэх ямар ч гомдол гараагүй" гэж мэдэгджээ. Тэрбээр мэдүүлэгт дурдсан үйлдлийг "сайн дурын, ухамсартай, харилцан зөвшөөрсөн" шинжтэй байсан гэж тодорхойлсныг албан ёсны эх сурвалжууд мэдээлж байна. Түүнчлэн прокурорын газар нь бие даан мөрдөн байцаалт явуулаагүй гэдгийг мэдэгдсэн байна.
Уг хэрэг нь СУИС-ийн оюутнуудын үйлдсэн гэгдэх хэрэгтэй тун төстэй бөгөөд дэлхий даяар олон сая хүний анхаарлын төвд байна. Одоогийн байдлаар эрүүгийн болон иргэний хэргүүд нээгдэж мөрдөн байцаах үйл ажиллагаа зэрэгцэн явагдаж байгаа бөгөөд Корнеллийн их сургуулиас "хуулийн үйл явцын хүрээнд дэлгэрэнгүй хариу өгнө" гэж мэдэгджээ.
