Нийслэлийн Засаг даргын 2012 оны А/601, А/688 тоот захирамжаар, зөвшөөрөлгүй баригдсан барилгыг нураахаар шийдвэрлэсэн. Үүнтэй холбогдуулж орон сууц захиалж хохирсон иргэд хэвлэлийнхэнд хандлаа.

Нийслэлийн иргэд Улаанбаатар хотыг утаагүй болгох мөн орон сууцжуулах хөтөлбөрт хувь нэмрээ оруулах зорилгоор  орон сууцны захиалга өгч гэрээ хийх нь ихэссэн. Тэгвэл гэрээ хийсэн иргэд хохирч байгаа талаар өнөөдөр иргэд байр сууриа илэрхийллээ.

Сонгинохайрхан дүүргийн 18 дугаар хороо, Таван шард Б.Эрдэнэчимэг захиралтай “Тэмүүлэнбаатар” компанийн долоон давхар орон  сууцыг  2012 оны есдүгээр сард Мэргэжлийн хяналт, Нийслэлийн газрын албаас ажлын хэсэг шалгаж үзээд газрын хэмжээ хэтрүүлсэн гэдэг үндэслэлээр үйл ажилгааг нь зогсоожээ. Тэгвэл тус байранд захиалга өгсөн иргэд өдгөө ихээхэн хэмжээний хохирол амсаад байгаа юм.

Иргэд 2011 оны долдугаар сард тус байранд захиалгаа өгч хамгийн анхныхаа гэрээг  хийжээ. Энэ гэрээний дараа тэд урьдчилсан төлбөр болох 1 тэрбум 700 сая төгрөгний төлбөр хийсэн  аж. Ингэхдээ тэд янз бүрийн зээлийн шугамаар урьдчилгаа төлбөрөө өгчээ. Тодруулбал, банкнаас зээл авсан 16 захиалагч, хашаа байшингаа зарж төлбөр төлсөн 12 иргэн, цалингийн зээл авсан 16 иргэн гэх мэт цөөнгүй иргэд хохирчээ . Гэтэл энэхүү орон сууц баригдаж байх явцад Нийслэлийн засаг даргын 2012 оны тавдугаар сарын 5-ны А/601 захирамжийн дагуу эл барилгын үйл ажиллагааг түр зогсоосон байна. Тухайн үед Улаанбаатар хотын захирагч Э.Бат-Үүл эл орон сууцны зөрчил нь хууль хяналтынхан болон төрийн албан тушаалтнууд ажилдаа хайнга, хяналтгүй байдлаас болсон. Үүнээс болж иргэд хохирч байна. Энэ хохирлыг төр хариуцна гэж амалж байсан тухай оршин суугчид ярьж байв. Гэтэл өнөөдрийн байдлаар Засаг дарга болоод төрийн эрх бүхий байгууллагууд иргэдийг хохиролгүй болгох ямар нэг арга хэмжээ аваагүй байгаа аж.

Мөн Энэ асуудал үүссэнээс хойш удаа дараа төрийн эрх бүхий байгууллага, албан тушаалтанд өргөдөл гомдлоо захиалагчдын зүгээс гаргасан байна. Тухайлбал, Монгол Улсын Ерөнхийлөгчид хоёр удаа, Ерөнхий сайдал хоёр удаа, Хүний эрхийн комисс, ШӨХТГ, Иргэдийн эрхийг хамгаалах газар, Нийслэлийн засаг дарга гээд л яваагүй газар гэж байхгүй аж. Гэтэл өнөөдрийг хүртэл асуудал шийдэгдэхгүй байгаа юм. Тэд удахгүй та бүгдийн асуудал шийдэгдэнэ гэх хариултыг л өгдөг байна.

Тиймээс хуралд төлөөлөл болж ирсэн иргэд "Энэ сарын 25-ны өдрийн ИТХ-аар энэхүү асуудлыг шийлвэрлэж өгөх"-ийг  хүссэн юм.

    Хохирсон иргэд юуг өгүүлэв?

Иргэн: Би олон хүүхэдтэй өрх толгойлсон эх. Хашаа байшингаа зараад энэ байранд захиалга өгсөн. Одоо түрээсийн байранд амьдарч байгаа. Ер нь нийслэлийн ард иргэдээс сонгогдсон иргэдийн хурлын төлөөлөгч нар энэхүү асуудлыг шийдэж өгч бидэнд яаралтай туслах хэрэгтэй байна. Хэн нэгний тухай заргалдаж, хэн нэгний буруутгахдаа гол нь биш. Гагцхүү өчнөөн мөнгөө өгчихөөд байгаа иргэдийн эрх ашгийг бодолцож үзэхийг Засаг дарга, төрийн өндөрлөгүүдээс хүсч байна.

Хохирогчийн охин: Манай ээж дөрвөн хүүхдээ тэжээдэг өрх толгойлсон эмэгтэй байсан. "Нарантуул" зах дээр арав гаруй жил наймаа хийж байгаа. Хүүхдүүдийнх нь гурав нь  оюутан. Ээж маань "Монголын нэг ч гэсэн иргэн утаагүй амьдаръя" гэсэн төрийн өндөрлөгүүдийн энэ уриалгаас болоод  байр захиалсан. Ингээд захиалсан байрных нь үйл ажиллагааг зогсоосоноос болоод хэсэг захиалагчид нь жагсаал цуглаан хийсэн. Тэр дунд нь ээж маань явж байгаад зүрх нь гэнэт хаагдаж нас барсан. Банкнаас өндөр хэмжээний зээл авсан, гурван хүүхэд нь оюутан хүнд ийм асуудал тохиосон болохоор тэвдэж сандрах нь аргагүй. Тэгэхээр бидэнд хууль дүрэм яриад явах бэлтгэл ч алга. Энэхүү асуудлыг даруй шийдэж өгөхийг л төр засгаасаа хүсч байна.