Боловсрол, шинжлэх ухааны сайд Л.Гантөмөр өчигдөр Хан-Уул дүүргийн ЕБС, цэцэрлэгийн багш нартай уулзаж, тэдний санаа бодлыг сонслоо. Үйлдвэрчний эвлэлийн соёлын төвийн концертийн танхимийг дүүргэн цугласан 1000 гаруй багш боловсролын салбарт хийх шинэчлэлийг дуу нэгтэй дэмжиж байв. БШУЯ-аас баталсан Авьяас, Ном, Багшийн хөгжил хөтөлбөрүүдийг сургуулиуд хэрхэн хэрэгжүүлж, ямар үр дүнд хүрч байгаа нь энэ үеэр дэлгэсэн үзэсгэлэнгээс харагдаж байлаа. Сурагчдын урласан хувцас, уран зураг, хайчилбар модон эдлэл, нисэх онгоцны загвар гээд төрөл зүйлийн бүтээлүүд тэнд цугласан зочид болон бусад багш нарын бахдлыг төрүүлж байсан юм. “Авьяас хөтөлбөр хаа нэгтээгээс гоц авьяастан төрүүлэхдээ гол нь биш, хүүхэд бүр ямар нэг авьяастай учир түүнийг нь нээж, хөгжүүлэх.

 Улмаар эцэг эхчүүд хүүхдийнхээ чадварт итгэж, хүүхдийнхээ боловсролд анхаардаг болох. Хүүхэд нь өөрийнхөө сонирхлын дагуу сурч боловсрон, ирээдүйд боловсролтой чадварлаг бие хүн болж төлөвших гол зорилготой. Авьяасаа дагасан хүн л амжилтанд хүрдэг. Тиймээс хүүхэд бүр өөрийнхөө сонирхлыг, өөрийгөө олоход нь багш нар туслах хэрэгтэй” хэмээн салбарын сайд нь багш нартаа захисан юм. Нэг цаг гаруй хугацаанд чанарын шинэчлэлийн бодлогоо сайдаараа тайлбарлуулсан багш нар баярлаж, дэмжиж байгаагаа илэрхийлээд “Бидэнд итгэж чадвал бид хүүхэд нэг бүрийг хөгжүүлж чадна” гэж дуу нэгтэйгээр амласан юм.

 Уулзалтын төгсгөлд багш нар салбарын сайд, дүүргийн засаг дарга, нийслэл, дүүргийн Боловсрол, соёлын хэлтсийн дарга нартаа сургалт явуулахад бэрхшээлтэй байгаа асуудлуудаа хэлж, шийдэж өгөхийг хүссэн юм. Тухайлбал, сургуулийн байр муудсан, сургуулийн ойр хүүхдийн аюулгүй байдлыг хангасан явган хүний гарц байдаггүй, хичээлийн хэрэглэгдэхүүн хангалтгүй, цэцэрлэгт хүүхдийн тоглоом хэрэгтэй, цэцэрлэг, сургуулийн багш нар орой бүр тайлан бичиж, дараа нь түүнийгээ шалгуулж, олон удаагийн шалгалтуудад бэлдсээр хүүхэд хөгжүүлэх цаг гардаггүй... гэх зэрэг шийдэх шаардлагатай гэсэн бүхнээ хэлэв.

БШУ-ны сайд эдгээр асуулт, саналуудад “Сургуулийн байр, барилга муудсан болон өшөө нэмэх хэрэгцээ шаардлага маш их байгааг бид мэдэж байгаа. Бид анх шинэчлэлийн бодлого, хөтөлбөрөө боловсруулж байхдаа сургуулийн байрны чанар, тоог нэмэгдүүлэх тухай тусгасан. Төсөв нь шийдэгдвэл бид аюулгүй, цэвэр, олон ээлжгүй сургуульд хүүхдээ сургах болно. Дүүргүүд өөрсдөө төсөв захиран зарцуулах эрхтэй болсон. Тиймээс сургуулиудынхаа эргэн тойрны авто замуудыг явган хүний гарцтай болгох хэрэгтэй.

Дээр нь сургуулиуддаа, өөрөөр хэлбэл боловсролдоо хөрөнгө оруулах хэрэгтэй. Хими, физикийн хичээл үзэж байгаа хүүхдүүдэд харж, мэдэрч, барьж үзэх хичээлийн хэрэглэгдэхүүн алга. Тэгэхээр яаж ойлгох билээ. Тэр бүхнийг нь бололцоогоороо шийдэх хэрэгтэй. Сургууль, цэцэрлэгийн багш нарын тухайд одооноос эхлэн та бүхнээс конспект авахгүй. Тэр олон цааснаас илүү бидэнд хүүхдийн бодитой хөгжил чухал учир одоо та бүхэн тайлан, конспект бичхэд биш хүүхдээ хөгжүүлэхэд цагаа зарцуулах хэрэгтэй” хэмээн хариулсан юм. Гурван цагийн турш үргэлжилсэн уулзалт тун үр дүнтэй боллоо гэж ирсэн багш нар дүгнэж байв. БШУ-ны сайд Л.Гантөмөр Монголынхоо нийт багш нартай наад зах нь жилд нэг удаа уулзаж байх бодолтой байгаагаа энэ үеэр хэлсэн. Тэрээр өнөөдөр 17:00 цагаас “UB palace”-т Чингэлтэй дүүргийн багш нартай уулзана.