Монгол оронд сүүлийн үед цөмийн энергийн холбогдолтой олон төсөл төлөвлөгөөнүүд яригдах хэрэгжих болсон билээ. Ямар ч аюул осол, хор хөнөөлгүй гэж сурталчлагдаж ирсэн цөмийн энергийн салбар өрөмдлөгийн үе шатнаасаа эхлүүлээд өчнөөн зөрчил, сөрөг нөлөө гаргаж эхлэв. Энэ сэдвээр өнөөдөр цөмийн эсрэг үзэлтнүүд мэдээлэл хийлээ.

Цөмийн эсрэг үзэлтнүүд ярихдаа "Дорноговь аймгийн Улаанбадрах суманд олонтаа гарах болсон зөрчлүүд, ялангуяа малчин Д.Норсүрэнгийн 22 тугалын гэнэтийн үхэл юм. УМАЭЦТЛ-ийн 3-р сарын 11-ний дүгнэлт, 1111 албаны мэдээлэлд тус лабораториос өгөгдсөн хариу зэрэг нь "цацрагийн хордлогоос болж, тугалууд эндсэн" гэсэн утгатай байсан бөгөөд, үүний мөрөөр Ерөнхий сайдын ажлын хэсэг тухайн нутагт 2012.3.24-4.2-нд ажилласан. 4.11-нд гарах ёстой байсан ажлын хэсгийн дүгнэлт 5.1-нд гарсан ч, шаардлага хангахааргүй болжээ. Тугалуудын цаг бусын хорогдол цацраг, уран, халдварт өвчнөөс болоогүй гэснээс бус, ямар шалтгаанаас болсныг тогтоосонгүй. Селен, зэс, сурьмагийн хордлого байх магадлалтай гэсэн магадлал л гаргажээ. Хэдэн арван төрийн байгууллага бүтэн хагас сар онцгой комисс байгуулан онц байдалтай ажиллаад, ямар ч тодорхой үр дүнд хүрээгүй нь тун харамсалтай байна" гэсэн юм. Тэд мөн "Үүнээс үзэхэд, цөмийн энергийн салбарын үйл ажиллагааг төр гүйцэд хянан ажиллаж чадахгүй байна. Мэдэхгүй гэх үгээр мянган үгийн таглаа хийх нь ээ гэсэн түгшүүр төрж байна. Монголын байгаль орчны иргэний зөвлөл (МБОИЗ) 2012 оны 6-р сард намуудтай Санамж бичиг байгуулсан агаад, үүнд цөмийн хөнөөлийн эсрэг үзэл санаа орсон. Гэтэл, Санамж бичгийг үзэглэсэн АН, ИЗНН-ын төлөөлөл орсон ЗГ мөрийн хөтөлбөртөө, цөмийн энергийн салбарыг шар нунтаг үйлдвэрлэх шатыг багтаан хөгжүүлнэ гэж тусган ажиллаж байгаа болно. Цөмийн энергийн салбарт хяналт тавьж чадахгүй байгаа өнөөгийн нөхцөлд ураны хайгуул, туршилтын олборлолт, шар нунтаг үйлдвэрлэл зэргийг таслан зогсоож, цацрагт эрдсийн хайгуул, ашиглалтын лицензүүдийг хүчингүй болгож, Монгол улсыг цөмийн хөнөөлгүй орон болгох шаардлагатай байгаа юм. Энэ чиглэлээр эрх баригчид анхааран ажиллаж, Санамж бичгээ санаж явах эрүүл ой тогтоолттой байхыг уриалж байна" гэлээ.