Энэ сарын 10-нд Баянзүрх дүүргийн 11 дүгээр хороонд 46 настай иргэн Д өөрийн таван настай хүү заазуурдаж бэртээсэн хэрэг гарсан. Тэгвэл хүүгийн юу болж байна?

  Өнөөдрийн хүүгийн асуудлаар ярих хэвлэлийн хуралд ээж нь оролцов.

 "Лантуун дохио" бүлгэмийн зүгээс өнөөдөр эцэгтээ яргалуулсан 5 настай хүүгийн талаар албан ёсны мэдээлэл өглөө.  Хэвлэлийн хуралд 5 настай хүүгийн талаар анхдагч мэдээллийг өгч нийгэмд түгээсэн 103 түргэн тусламжийн эмч Батсүх, одоог хүртэл хүү болон түүний гэр бүлд эмнэлгийн болон хууль эрх зүйн хамгаалалтын тусламжийг үзүүлж байгаа Лантуун дохио ТББ, Хүчирхийллийн эсрэг үндэсний төвийнхөн оролцсон юм. Мөн нэр хүндээ бодоод хэвлэлийнхэнд яриа өгөхгүй гэж байсан ээж нь өөрийнхөө нэр хүндийг үл ойшоон хувь хүнийхээ зүгээс багагүй зориг гарган мэдээлэл хийсэн билээ.

Хурал дээр хүүгийн ээж О.Болормаа "Нөхөртэйгээ найман жил өмнө нэг гэрт амьдарч эхэлсэн. Нөхөр маань хэрцгий догшин авир гаргаж, гэр бүлийнхнээ хүчирхийлэх нь хоёр жил гаруйн өмнөөс эрс ихэссэн. Тэр архи уух болгондоо “Та нарыг бүгдийг чинь ална”, “Чамайг салах юм бол хаа байгаа газар чинь очиж хорооно”, “Надад цагдаад танил бий” гэх зэргээр байнга дарамталдаг. Олон жилийн турш нөхрийнхөө зүй бус үйлдлийг тэвчин нууж байсныхаа төлөө үр хүүхдээ ийм байдалд хүргэчихлээ” хэмээн ярилаа.

     Хүүгийн биеийн байдал сайн байна

 Хүүгийн биеийн байдал сайн байгаа талаар бид өмнө нь мэдээлсэн.  "Лантуун дохио” ТББ, Хүчирхийллийн эсрэг үндэсний төв ТББ мөн эмнэлгийн хамт эхийн хүсэлтийн дагуу өнөөдрийг хүртэл түүнийг хамгаалалтанд авч, эмнэлэгт сахиж байсан юм. Хүү Цэргийн төв госпиталийн эмнэлэгт хэвтэн эмчлүүлж нуруундаа оёдол тавиулсанаар гэртээ эмчилгээ хийлгэж байгаа.

Хоёр настай дүү нь сувилалд хэвтэж ах нь хамгаалалтад байгаа

Түүний дүү хоёр настай дүүгийн хүүхдийн сувилалд хэвтүүлээд байгаа билээ. Зургаан настай хүүг  Хүчирхийллийн эсрэг үндэсний төв хамгаалалтад авсан юм. Ах, дүү хоёрыг эрүүл мэндийн шинжилгээнд оруулахад хоёр настай охин тураалтай, хоол тэжээлийн дутагдалтай мөн аав нь тогооруу шидсэнээс болж долир болсон байжээ. Харин ах, ээж нь зодуурны шарх сорив, хазуулсан ул мөр ихтэй байсан. 

Гэр бүлийн хүчирхийлэл үйлдсэн аавын хэрэг юу болж байна

Төрсөн хүүгээ заазуурдан гэмтээсэн 40 гаруй насны иргэн Д нь хэргийг үйлдэх үедээ согтуу байсан бөгөөд өмнө нь гэр бүлээ дарамталж, хүүхдүүдээ зодож танхайрч байсан 10 гаруй үйлдэл нь цагдаагийн байгууллагад тэмдэглэгдсэн байна. Хэргийг үйлдсэн Д-г эрүүлжүүлж улмаар амралтын өдөр гэрт нь буцааж гаргасан бөгөөд энэ үедээ тэрбээр эхнэр, хүүхдээ дахин дарамталсан. Улмаар хууль хяналтын байгууллагууд, хүүхдийн эрхийг хамгаалах холбогдох хүмүүс ажиллаж хүүгийн эцгийг дахин саатуулсан. Өдгөө эцгийг нь  цагдан хорих 461 дүгээр ангид саатуулан шалгаж байна.  Түүнд эрүүгийн хуулийн 181,3-аар таван жилийн ял өгөх боломжтой ч байнга хүчирхийлж байсан гэдгээр нь ялын зүйл анги нэмүүлэхээр хүчирхийллийн эсрэг үндэсний төвөөс мэргэжлийн өмгөөлөгч гарч ажиллаж байна.

Сайн санаат хүмүүсийн тусламж
Хүмүүс хүүхдэд туслахыг хүссэн. Тусгай байр гаргаж эд барааны тусламжийг хүлээж авч байгаа. Хандивын  тусгай данс зарлаж мөнгөн хандивыг бас хүлээж авч байна.
Ах дүү гурав гурвуулаа тэжээлийн дутагдалтай, сульдаатай, өсөлт нь зогссон. Эрүүл мэнд болоод ар гэр, сургуульд суралцахад нь цугласан мөнгө зарцуулагдана.

Twitter-чид нэгдсэн нь
Twitter-чид  эл гэр бүлийнхэнд зориулж мөнгө цуглуулсан.  Жиргээчдийн зүгээс нэг сая 500 мянган төгрөгийг цуглуулаад байгаа.

Төрийн байгууллагуудын худал хуурмаг байдал

  Төрөөс ганц хэвлэлийн бага хурал хийгээд л өнгөрсөн.  Эцэгтээ яргалуулсан таван настай хүүг  асарсан, анхааралдаа авсан гээд байгаа төрийн байгууллагууд бодит байдал дээр түүнтэй уулзсан уу? Зөв буруу мэдээллүүдийн аль нь бодитой вэ ? гэдэг асуултад хариулт өгсөн юм. Лантуун дохио бүлгэмийн тэргүүн Ч.Ганжавхлан "Нийслэлийн хүүхдийн төлөө газар, Хүний эрхийн үндэсний комисс болон БЗД-ийн Засаг даргын орлогч Т.Баясах нарын хүмүүс “Хохирогч хүүг сувилалд хэвтүүлсэн”, “Тэднийг хамгаалалтад авсан” зэрэг өөрсдийн хийгээгүй ажлаа хийсэн болгож ярьсан" гэв.  “Лантуун дохио” ТББ, Хүчирхийллийн эсрэг үндэсний төв ТББ мөн эмнэлгийн хамт эхийн хүсэлтийн дагуу өнөөдрийг хүртэл түүнийг хамгаалалтанд авч, эмнэлэгт сахиж байсан юм. Гэтэл сургаар ажил хийдэг, хүүхдийн төлөө гэсэн сайхан тодотголтой төрийн байгууллагууд хүүхдийг нэрийг барьж өөрсдийнхөө албан ажлыг сурталчлаад байгаа аж. Очсон, эргэсэн, тусалсан гэх мэтээр ярьсаар, цуурсаар.... "Лантуу дохио" бүлгэмийн тэргүүн Ч.Ганжавхлан  "эл төрийн байгууллагуудын үнэн нүүр царайг харуулах цаг болсон. Хүний эрх, хүүхдийн төлөө гэсэн нэртэй төрийн байгууллагуудын хэтэрхий арчаагүй, худал хуурмаг загнаж байгааг нууж хааж чадахгүй" гэлээ.