"Монь-Ивээл" ХХК-ийн "Ивээл" хотхоны 41А гэж шинээр ашиглалтанд орсон байрны оршин суугчид манай сайтад хандлаа.  Эл байранд халуун усыг тооцож авахдаа Эрчим хүчний зохицуулах газрын 2011 оны 95 тоот тогтоолыг зөрчиж аваад байгаа талаар тэд мэдээлсэн юм. Оршин суугчдын хэлж буйгаар, нэгдүгээрт усны тоолууртай айлаас халуун, хүйтэн усны заалтыг нэмж нэг ханшаар үржүүлж мөнгө авдаг хэрнээ ус халаасны мөнгө нэрээр усыг тоолуургүй айлаас задгайгаар тооцсон тарифаар ам бүлийн тоогоор үржүүлж авч байгаа аж.  Өөрөөр хэлбэл нэг хүн 1410 төгрөг төлөх замаар илүү мөнгө аваад байгаа аж. Уг нь Эрчим хүчний зохицуулах газрын 95 тоот тогтоолоор халаалтын улиралд халуун усны тоолуурын 1м3 770 төгрөг, халаалтын бус улиралд 1155 төгрөгөөр тооцох ёстой байдаг байна.

Хоёрдугаарт, НИТХ-ын 182 тоот тогтоолоор баталсан орон сууцны айлаас сард 2000 төгрөг гэсэн ханшаар биш 2500 төгрөгөөр тооцож авч байгаа аж.

Гуравдугаарт, Халаалтын үнийг тооцохдоо балконы талбай зэрэг халаалтгүй талбайг хасалгүй нийт талбайд үржүүлэх замаар илүү мөнгө авч байгаа гэнэ.

Дөрөвдүгээрт, СӨХ байгуулаагүй хэрнээ СӨХ-ийн мөнгө нэрээр үндэслэлээ тайлбарлалгүй байрны нийт талбайг 300 төгрөгөөр үржүүлсэн үнэ нэхэж байгаа юм байна. Энэ үнэ гурван жилийн дараа 40 хувь нэмэгдэж, 500 төгрөг болно гэсэн бичигтэй цаасан дээр оршин суугчдыг гарын үсэг зуруулахаар айл бүрийн хүнийг дуудаж ятгаж байгаа зэрэг хууль бус үйлдэл гаргаж байгаа аж.  Энэ мэт зөрчил маш их илэрч оршин суугчдыг хохироосоор байгаа талаар тэд мэдээлсэн юм. Оршин суугдын зүгээс энэхүү гомдол, хүсэлтээ ШӨХТГ-т ч уламжлаад байгаа юм байна.