Газрын тосны баялаг ихтэй гэгддэг Монгол улс ганцхан Дорнод аймгаас газрын тосоо олборлож байна. Өөрсдөө олборлож чадахгүй тул Хятадын “Петро чайна дачин тамсаг” компанитай бүтээгдэхүүн хуваах гэрээ хийсээр олон жил болжээ. Харин энэ хооронд Хятадын “Петро чайна дачин тамсаг” компанитай холбоотой асуудал олон үүссэн ч тэгэсхийгээд илж өнгөрөөгөөд байдаг. Өнгөрсөн бямба гарагт 50 гаруй монгол ажилчин ажил хаясан. “Монгол-93” шатахууны түүхий эдийг хангадаг 300 цооногийн үйлдвэрлэл зогссон тул дарга нар анхаарлаа хандуулахаас өөр аргагүй болоод байгаа. Тиймээс удирдлагууд болон Засгийн газрын төлөөлөлтэй өнөөдөр Улаанбаатарт гурван талт гэрээ хийхээр болсон. Нэгэнт хэлэлцээр хийх болсон тул ажил хаялт зогссон гэх мэдээлэл гарсан ч энэ нь газар дээр огт өөр байгаа юм. Засгийн газрын удирдлагууд өөрсдөө л хэлэлцээрт орно гэж яриад байгаагаас Дорнодын ажилчидад тийм боломж одоогоор алга. Учир нь тэднийг Улаанбаатарт ирсэн хойгуур хятад ажилчид өөрсдөө ажлаа эхлүүлэх бодолтой байгаа аж. “Петро чайна дачин тамсаг” компани аль болох монгол ажилчдыг гаргаж, хятадуудыг ажиллуулах сонирхолтой байдгийг ажил хаясан иргэд хэлж байлаа. Тиймээс Улаанбаатар явсан хойгуур нь ажлаа эхлүүлчихвэд зориг гаргаж ажлаа хаясан монголчуудад ямар ч ашиггүй болох гээд байгаа хэрэг.

  “Монгол-93” гэж баахан хөөрцөглөж байсан дарга нар одоо дахин нэг удаа Тамсаг руу нүдээ нээгээд харах хэрэгтэй болоод байна.

   Тамсагийн монгол ажилчид өөрсдөөс нь хэд дахин илүү цалин авдаг хятад ажилчидтай барьцаагүй ч 40 өдөр ажиллаад 400 мянган төгрөг авдаг байдлаа өөрчлөхийг хүсчээ. Энэ хүсэлтээ удрдлагууддаа гаргасан ч “за” гэж хойшлуулсаар жил гаруйн нүүр үзсэн байна. Оны өмнө цалин нэмсэн ч 10 мянган төгрөгөөр ахиулжээ. Мөн тэднийг ажил хаялт зарлаж эхлэхэд хятад дарга нар нь ихэд сүрдүүлсэн тухай орон нутгийн сэтгүүлч мэдээлсэн юм. Хятад дарга нар нь “ажил хаялтаа зогсоохгүй бол та нарыг гэмт хэрэг холбоно” гэж сүрдүүлснийхээ дагуу монгол ажилчдыг хулгай хийсэн гэж мэдээлжээ. Цагдаа ирээд шалгахад тэр нь худал мэдээлэл нь батлагдаж. Мөн “Хятад ажилчныг буудсан” гэж цагдаад мэдээлсний дараахан нөгөө “буудуулсан” хүн нь ажилчдын кампт алхаж явсан гэх. Энэ мэтээр монгол ажилчдыг хэрүүл маргаанд уруу татахыг оролджээ. Тэнд аймгийн төвөөс гурван цагдаа очиж хяналт тавьж байгаа ч хятад дарга нарын "ажил хаялтаа зогсоовол шоронд оруулахгүй шүү" гэх сүрдүүлэг үргэлжилсээр байгаа аж.

    Ер нь “Петро чайна дачин тамсаг” хятад ажилчдын толг нэмэгдүүлэх сонирхолтой байдаг. Удахгүй бас хэдэн зуун хятад ажилчин оруулж ирүүлэхээр ярьж байгаа дуулдсан. Хятад ажилчдыг зуучлан авчрах нь орон нутгийн дарга нарт бас нэгэн бизнес болсон бололтой.Өчигдөр Дорнодын Засаг даргын шуурхай зөвлөгөөн дээр 50 иргэн нь ажил хаяад хоёр хонож байхад дарга нар нь санаа тавилгүй мэдээллийг нь ангайж сонсоод өнгөрсөн тухай хов хүргэе. Харин өнөөдрөөс Дорнодын дарга нар хөдөлгөөнд орж байгаа сурагтай.  Ямартаа ч  баахан шоу хийсэн “Монгол 93”-ынх нь түүхий эдийн олборлолт зогссон тул Уул уурхайн яам, Газрын тосны газрын дарга нар анхаарал тавих нь лавтай. Гэхдээ газрын тосондоо биш монгол ажилчидаа анхаараасай.