Одоогоос жил гаруйн өмнө “100 мянган айлын орон сууц хөтөлбөр” нэртэй иргэдийг орон сууцжуулах үйл ажил­лагаа ид өрнөж байв. Жилийн зургаан хувийн хүүтэй зээлийг төрөөс олгож, иргэд барилгын компанитай гэрээгээ хийж, урьдчилгаагаа төлсний дараа зээлээ авна гэсэн гурван талын оролцоотой хөтөлбөр хэрэгжиж эхэлсэн юм.

    Харамсалтай нь энэ хө­төлбөр сонгуулийн дараа­гаас сураггүй болсон. Өнөөдөр улстөрчдийн энэхүү үйлдлээс болж 200 гаруй иргэн гу­дамжинд гарах дээрээ тулаад байгаа.

Тэгвэл Засгийн газар өнгөрсөн долоо хоногт хуралдаж иргэдэд олгох найман хувийн хүүтэй зээлийн ерөнхий журмыг баталсан билээ. Харин зургаан хувийн хүүтэй зээлнээс болж төрд итгэх итгэлгүй болсон иргэд найман хувийн хүүтэй зээлийн талаар илүү дэлгэрэнгүй, бодит  мэдээллийг авахыг хүсч  манай сайтад хандсан юм. Тиймээс бид энэ удаад найман хувийн хүүтэй орон сууцны талаар бодит мэдээллийг та бүхэнд хүргэхийг зорьлоо.

Орон сууцтай болох гэсэн хэн бүхэнд нээлттэй

   Энэхүү орон сууцны зээлд дунд буюу дундаас дээш орлоготой иргэд хамрагдах боломжтой.  80 мкв-аас ихгүй талбайтай шинээр ашиглалтанд орсон  болон одоо ашиглаж байгаа хуучин орон сууцнаас иргэд сонголтоо хийх болж байгаа юм байна. Иргэд орон сууцаа сонгоод 20 хүртэлх жилийн хугацаатай, жилийн найм дээр нэмэх, хасах нэг хувийн хүүтэй зээлээр худалдаж авах аж. Иргэд сонголтоо хийгээд ямар компаниас, хэдэн мкв талбайтай орон сууц авах сонголтоо хийгээд банктай гэрээ байгуулах нь. Арилжааны бүх банкинд найман хувийн хүүтэй зээлд хамрагдах эрх нт бүрэлдчихсэн байгаа аж.

Их хэмжээний бэлэн мөнгөтэй болж чадаагүй залуу гэр бүлд зориулж 10-30 хувийн урьдчилгаатай

  Өмнө нь орон сууцны урьдчилгаа төлбөрт 30 хувийг төлж байж зээлжих эрх үүсдэг байсан. Харин одооноос 10-30 хүртэлх хувийн урьдчилгаа төлөх шаардлага тавьж байгаа юм байна. Энэ нь ялангуяа залуу гэр бүлийн хувьд их хэмжээний бэлэн мөнгөтэй болж чадаагүй байдаг ч ажил эрхэлж байгаагийн хувьд зээлийг тогтмол төлөөд байх боломжтой гэдэг үүднээс урьдчилгаанд 10-30 хувийн хязгаар гаргаж өгсөн байна.

Энэ сард найман хувийн хүүтэй зээл авах боломжтой

  Иргэд сарынхаа орлогыг тооцоолж, банкаар баталгаажуулснаар хэдэн мкв талбайтай орон сууц авах боломжтой вэ гэдгээ шийдэх аж. Журмаар сард төлөх зээлийн хэмжээ нь өмнөх сарын орлогын 45 хувиас хэтрэхгүй байх шаардлага тавигдсан юм байна. Ямартаа ч орон сууцаа сонгоод, 10 хувиа бүрдүүлээд банктайгаа хэлэлцэж тохирсон иргэд энэ сардаа ч орон сууцны зээлдээ хамрагдах боломжтой юм.

Монголбанкны мөнгөний байдал, арилжааны банкуудын хүсэлтийг  харгалзаад санхүүжилтийг шийднэ

  Эхний ээлжинд “Чингис” бондоос 800 тэрбум төгрөг оруулж төслийг хэрэгжүүлэхээр заагдсан юм. Арилжааны банкууд Монголбанктай гэрээ хийсний үндсэн дээр эрхээ нээлгэх гэнэ.  Монголбанкны мөнгөний байдал, арилжааны банкуудын хүсэлтийг харгалзаад санхүүжилтийг нь шийдэх аж.
Барилгын үнийг  тогтворжуулах үүднээс барилгын салбарынханд хөнгөлтэй зээл олгож байгаа.
 Хувиараа ажил хийдэг, бизнес эрхэлдэг хүмүүс орлогоо нотлох ёстой юм. Өөрөөр хэлбэл ажил эрхлэлтийн байдал, бараа бүтээгдэхүүний борлуулалт, орлого зэргээ банканд нотолно.

“100 мянган айлын орон сууц” хөтөлбөрт хамрагдаад байрандаа орж чадаагүй иргэдэд найман хувийн хүүтэй зээл давуу эрх олгохгүй

  “100 мянган айлын орон сууц” хөтөлбөрт хамрагдаад байрандаа орж чадаагүй 200 гаруй өрх бий. Тэгвэл тэдгээр иргэд энэхүү зээлд хамгийн түрүүнд хамрагдана гэсэн яриа чих дэлсэх болсон. Харин албаны хүмүүсийн тайлбарлаж буйгаар тэдгээр хүмүүст давуу эрх байхгүй. Бусдын адил л зээл авах боломжтой аж.

Гишүүд жилийн  8 /±1/ хувийн хүүтэй зээлийг энэ долоо хоногоос эхлэн олгох ёстой гэж үзлээ

    УИХ дахь Ардчилсан намын бүлгийн ээлжит хуралдаан болж, дөнгөж сая завсарлалаа. Тус хуралдаанаар хэд, хэдэн чухал асуудлыг хэлэлцсэний зэрэгцээ Засгийн газрын мэдээллийг сонссон байна. Мэдээллийн дагуу гишүүд Засгийн газарт хандан иргэдийг орон сууцжуулах хөтөлбөртэй уялдаж гарч байгаа жилийн  8 /±1/ хувийн хүүтэй зээлийг энэ долоо хоногоос эхлэн олгох ёстой гэж үзжээ. Тиймээс Засгийн газар иргэдэд энэхүү ипотекийн зээлийг энэ долоо хоногоос эхлэн арилжааны банкуудаар дамжуулан олгох ажлыг зохион байгуулна гэж УИХ дахь Ардчилсан намын бүлгийн дарга Д.Эрдэнэбат мэдэгдлээ.

  2012 оны байдлаар манай улсын нийт хүн амын 23,8 хувь, Улаанбаатар хотын хүн амын 40 хувь нь орон сууцанд, үлдсэн хэсэг нь гэр хороололд амьдарч байгаа гэсэн судалгаа байдаг аж. Орон сууцны эрэлт, нийлүүлэлтийг дэмжих, санхүүжилтийн тогтвортой тогтолцоог бий болгох, иргэдийг орон сууцжуулах зорилгоор эл журмыг баталсан юм.