Өнөөдөр  Шударга өрсөлдөөн, хэрэглэгчийн төлөө газраас хэвлэлийн хурал хийж Ерөнхийлөгчийн сонгуульд АН-аас нэр дэвшигч Ц.Элбэгдоржийг Сонгуулийн тухай хууль зөрчиж, хууль бус сурталчилгаа явуулсан гэх МАН-ын гомдлын дагуу хийсэн шалгалтын дүгнэлтийг танилцууллаа.

Өнгөрсөн хугацаанд ШӨХТГ-т МАН-аас Ерөнхийлөгчийн сонгуультай холбоотой асуудлаар гурван удаа гомдол ирсэн байна.

Нэгдүгээрт: "NBS" телевизтэй холбоотой гомдол ирсэн байна. Тус телевизийн мэдээний албаныхан МАН-аас нэр дэвшигчийн “Эвийг эрхэмлэнэ” уриаг “Эдийг эрхэмлэнэ” болгож олон нийтэд цацсан тул арга хэмжээ авч өгнө үү гэсэн гомдол ирсэн байна. Гомдлын дагуу ШӨХТГ-аас "NBS" телевизэд хандсаны дагуу сэтгүүлч Майцэцэг, Т.Оюумаа нарт хариуцлага тооцож нэг сарын цалинг нь хассан байна. Мөн NBS телевиз эфирээрээ уучлалт гуйж, залруулга гаргажээ.

Хоёрдугаарт: “Монгол тулгатны 100 эрхэм” нэвтрүүлэгт Ерөнхийлөгч Ц.Элбэгдорж оролцсон нь хууль бус үгүйг шалгаж өгөхийг хүссэн гомдлыг ШӨХТГ-т ирүүлсэн байна. О.Магнай энэ талаар ярихдаа “Энэ талаар ардын намын нөхдүүд телевизээр нэг өөр зүйл ярьсан. Надад нэг өөр утга агуулгатай бичиг явуулсан. Ж.Сүхбаатар тус нэвтрүүлгийг хууль зөрчсөн гэж ярьж байсан. Харин надад илгээсэн бичигтээ "NTV" телевизийг л хааж өгөөч гэсэн байсан” гэсэн юм. Тэрээр мөн “Мониторингоор тус нэвтрүүлэг нь бүх сувгаар гарсан гэж ойлгогдож байгаа. Гэхдээ тэд зөвхөн "NTV" телевизийг хааж өгөөчээ” гэсэн юм. ШӨХГТ-аас гомдлын дагуу шалгалт хийж Ц.Элбэгдоржийг хууль зөрчөөгүй гэсэн дүгнэлтийг гаргажээ. Учир нь Монгол улсын Ерөнхийлөгчийн сонгуулийн тухай хуулийн 33.2-т зааснаар сонгуулийн сурталчилгаа гэдэгт тухайн нэр дэвшигч этгээд сонгуулийн мөрийн хөтөлбөрөө нийтэд тайлбарлан таниулах үйл ажиллагааг багтааж ойлгодог байна. Гэтэл Ерөнхийлөгч Ц.Элбэгдоржийн оролцсон “Монгол тулгатны 100 эрхэм” нэвтрүүлгийн агуулгыг хянаж үзэхэд Ц.Элбэгдорж нь өөрийн сонгуулийн мөрийн хөтөлбөртэй холбоотой аливаа нэг яриа, тайлбар хийгээгүй байна гэж үзсэн байна.

Мөн NTV телевизийн тусгай зөвшөөрлийг түтгэлзүүлэх боломжгүй гэж ээ.

Гуравдугаарт: Ц.Элбэгдорж нь Өвөрхангай аймагт иргэдтэй уулзсан уулзалтаа телевизээр шууд дамжуулсан гэсэн гомдлыг Өвөрхангай аймгийн МАН-аас ирүүлсэн байна. Тус санал гомдол өнгөрсөн лхагва гаригт ирсэн  учраас гомдлыг шалгаж байгаа аж. Бүх гомдлыг хуулийн дагуу шалгаж байгаа хэмээн ШӨХТГ-ын дарга О.Магнай хэллээ.