Манай шүүх эмнэлэгийн эмч нар гайхмаар, эргэлзээ төрүүлэхээр, нэгэн сонирхолтой дүгнэлт гаргасан тухай энд дэлгэрүүлье. 

Хоёр жил орчмын өмнө буюу 2010 оны есдүгээр сарын 3-нд Нийслэлийн гуравдугаар амаржих газарт гурав дахь хүүхдээ төрүүлсэн Э.Хонгорзул бүсгүйн гэдсэнд эмчлэгч эмч нар нь метр хэртэй самбай даавууг мартан оёсон тухай бид өмнө нь мэдээлж байсан. Цэргийн төв эмнэлэгт хагалгаа хийлгэж нарийн гэдэснээсээ метр хэртэйг тайруулсан бүсгүй өнөөдөр хүний асрамжинд, өдөр хоногийг маш хүндхэн өнгөрөөж байна.  Хариуцлага алдсан эмч Н.Оюунгэрэл, Н.Батзаяа, сувилагч Н.Ганчимэг нарыг ажлаас нь халж, тэдэнд БЗД-ийн Цагдаагийн газраас эрүү үүсгэн шалгаж эхлээд байсан билээ. Гэтэл тус хэрэг яг шүүхэд шилжихийнхээ өмнө шүүх эмнэлэгийн  дүгнэлтээс болж хэрэгсэхгүй болох дээрээ тулххд байна.

Тодруулбал "Э.Хонгорзулыг нэг метр хэртэй урт самбай даавууг өөрөө амаараа залгисан" гэсэн дүгнэлтийг шүүх эмнэлэгийн эмч нар гаргажээ.

Тиймээс энэ талаар тодруулахаар бид Г.Хонгорзул бүсгүйн гэрээр очлоо. Нэг үеэ бодвол эмэгтэйн оюун ухаан орж гарахаа больсон байна. Нэгдүгээр эмнэлэгт хэвтээд бие нь нилээн дээрдсэн бүсгүй хөл дээрээ зогсож явдаг болсноос гадна нь биеийн жин нь 10 гаруй кг-аар нэмэгджээ.
 
Гэтэл хэд хоногийн өмнөөс бүсгүйн биеийн байдал нь доройтож, эхэлсэн байна. Өдөр бүр дусал тариа хийлгэж байгаа гэнэ. Дусал тариагаа хийлгэхгүй бол гар хөлийн шөрмөс нь татаж, эрүү ам нь ээрч унадаг болсон тухай гэр бүлийнхэн нь ярьсан юм. Уг нь хэд хоногийн өмнө дүүргийн эмнэлэгт хэвтээд эмчлүүлээд гарчээ. гэнэ. Гэтэл бие нь огт дээрдээгүй ба гэртээ байгаатай адил байсан тухай тэрээр өөрөө ярилаа. Уг нь нэгдүгээр эмнэлэгт хэвтэж дахин эмчлүүлмээр байгаа ч бүсгүйг тус эмнэлэгийнхэн хүлээж авахгүй байгаа учраас ЭМ-ийн дэд сайд Ж.Амарсанаад хэвтүүлж өгөхийг хүссэн өргөдлөө хүргүүлжээ. Одоо хариуг нь хүлээж сууна. Дээрээс нь “Марль амаараа залгисан” гэсэн шүүх эмнэлэгийн дүгнэлтийг хараад сэтгэл санаагаар унаж, тавгүйтэж байгаа гэнэ. Ядарч сульдсан бүсгүйн яриа тун бүдэг сонсогдох тул үргэлжлүүлэн нөхөр Ж.Ганхуягтай ярилцлаа.

Ж.Ганхуяг: Шүүх эмнэлэг ганц ч шинжилгээ аваагүй мөртлөө дүгнэлт гаргасан байсан

- Та нар шүүх эмнэлэгийн дүгнэлттэй хэзээ танилцсан бэ?

- Манай эхнэрийн хэрэг дээр ажиллаж байгаа байцаагч нь энэ сарын 9-ний шөнө манайд шүүх эмнэлэгийн дүгнэлтийг бариад орж ирсэн. Ерөнхийдөө “Ийм дүгнэлт гарсан байна” гэж танилцуулаад явсан. 10-ны өглөө дөнгөж ажил эхлэх үед байцаагчтайгаа уулзаад шүүх эмнэлэгийн дүгнэлтийг хувилж авъя гэхэд “Прокурор руу аль хэдийн шилжүүлсэн” гэж хэлсэн. Шөнө дүгнэлт бариад явж байсан хүн чинь хэдийд нь прокурорт аваачаад өгчихдөг юм. Шөнөөр манай хуулийнхан ажилладаг болчихсон юм уу. Эндээс үзэхэд хэрэг хийсэн эмч нар нь, байцаагч шүүх эмнэлэгтэйгээ хуйвалдаж байгаад энэ хэргийг нуун дарагдуулах санаатай байна. Шүүх эмнэлэгийн дүгнэлтэд "Өөрөө марль залгисан" гэсэн дүгнэлт гарсан байсан. Эмч нар нь хариуцлага алдаагүй гэсэн дүгнэлтийг гаргасан байна лээ. Ард түмэн бүгд мэдэж байгаа учраас бид цааш заргалдана гэж бодож байгаа. Энэ хэргийг нуун дарагдуулаад өнгөрчих гэсэн бодолтой байна.  Бид тэнэг хүмүүс биш шүү дээ. Ийм дүгнэлт гаргаж л байдаг. Ж.Амарсанаа сайд руу ярьсан чинь “Ямар сонин юм бэ гээд инээж байсан. Өргөдөл бичээд хүрээд ир” гэсэн. Уг нь прокурорт хэрэг нь шилжих үед шүүх эмнэлэгийн дүгнэлт гарч байсан. Тэр дүгнэлтэд “100 хувь эмч нарын буруугаас болсон. 70 хувийн хөдөлмөрийн чадвараа алдсан гэсэн дүгнэлтийг гаргасан” байсан.

- Э.Хонгорзул энэ дүгнэлтийг хараад их хямарсан гэсэн?

- Биеийн байдал нь сайнгүй байхад ийм дүгнэлт гаргасан. Бид нарыг яаж зовоох гээд байгаа юм бүү мэд. Бид нар бүгд дотроо бухимдсан байдалтай байна. Өөрөөс нь ганц ч шинжилгээ аваагүй байж эрүүл мэндийн дүгнэлт гаргаж болдог юм  уу.

- Өвдөж эхэлснээс нь хойш ер нь хэдэн төгрөгийг эмчилгээнийн зардалд өгчихөөд байна?

- Таван сая гаруй төгрөг зарцуулсан. Бид энэ хүнийг хөл дээр нь босгохын төлөө урд хормойгоо авч хойд хормойгоо нөхөж байна. Хүнээс мөнгө зээлж байна. Банкнаас ч гэсэн жаахан зээл авсан. Бид хоёр хоёулаа “Да” хүрээ дээр лангуу ажиллуудаг байсан. Цөөхөн хэдэн төгрөг банкинд хураасан байсан. Тэр мөнгөө хуу хамаад л хэрэглэсэн. Өдөрт би таксинд яваад жаахан хэдэн төгрөг олоод л эм тарианд  өгч байна.

- Хариуцлага алдсан эмч нар хэдэн төгрөг өгсөн бэ?

- Хоёр сая гаруй төгрөг авсан. Одоо тэр эмч нар руу  залгаад ч утсаа авахгүй байгаа.

- Цаашид эрүүл саруул болож эдгэрнэ гэсэн найдварыг эмч нар хэлж байна уу?

- Гэдэс залгуулах хагалгаанд ахиж орно. Нэгдүгээр эмнэлэгт үзүүлэхэд “Өмнөх гэдэс залгасан мэс заслын шарх нь сайн эдгээгүй байна. Сарын дараа орж магадгүй” гэсэн. Бие султай болохоор эдгэрэлт нь удаан байна. Уг нь энэ хагалгаанд орчихвол идэж уусан юм шингээд хурдан хөл дээрээ босоод ирнэ гэж эмч нар хэлсэн. Одоо бол идэж, уугаад л шууд гаргаж байгаа.

- Нэгдүгээр эмнэлэг эмчилгээг хэр сайн хийсэн бэ?

- Маш сайн хийсэн. Нэгдүгээр эмнэлэгт хэвтэж эмчлүүлээд бие нь их сайхан болдог юм. Дүүргийн эмнэлэг бол эмчилгээ үнэхээр муутай. Одоо дахиж нэгдүгээр эмнэлэгт хэвтүүлмээр байна.

- Та бүгд өмгөөлөгч авахаар хөөцөлдөж байна уу?

- Энэ хэрэг дээр ажиллаж байгаа байцаагчаас нь бид нар намар “Өмгөөлөгч авах уу” гэж асуухад “Эрүүл мэндийн байгууллагын буруугаас болж ингэсэн учир өмгөөлөгч авах хэрэггүй. Шүүх хурал болоод буруутай хүмүүс нь тодорхой болно” гэж хэлсэн. Тэгэхээр нь бид өмгөөлөгч аваагүй. “Та өмгөөлөгч авах хэрэггүй гэсэн биз дээ” гээд одоо хэлэхээр “Мэдэхгүй. Би тэгэж хэлээгүй” гээд байгаа. Одоо өмгөөлөгч авъя л гэж бодож байна.

- Танай гэр бүлийн уур амьсгал ер нь ямар байна?

- Манай хоёр бага хүүхэд хөдөө байгаа. Том охин маань ээждээ тусалж байна. Хувцсыг нь угаах, үсийг нь самнахаас эхлээд асаргаа их шаардагддаг. Манай гэр бүл хоёр гурван хэсэг салчихсан тусдаа амьдарч байна. Хоёр хүүхэд маань хөдөө. Эхнэр том охин маань хадам ээжийнд амьдарч байна. Би гэртээ байна. Хонгороо ээж дээрээ байсан нь нь арай дээр юм.

Харин шүүх эмнэлэгийн дүгнэлтийг гаргасан /ШЭШХ/-ийн ахлах зэргийн шинжээч эмч Ц.Ганболд “Э.Хонгорзулын хэргийн материал, өвчний түүхээс харахад “Э.Хонгорзулын нарийн гэдэс, бүдүүн гэдсийн уулзварт марль нь орсон байсан. Тэгэхээр нь эмч нар гэдсэнд нь үүссэн шархаар нь гэдсэн доторх самбааг нь гаргав. Тэгээд шархтай гэдсийг тайрав” гэж бичсэн байна. Э.Хонгорзул кесарева хийлгэсэн. Эмч нар марлиа хэвлийн хөндийд үлдээгээгүй. Марль хэвлийн хөндий биш гэдэснээс гарч ирсэн. Гэтэл Э.Хонгорзулаас гарсан марль хоол боловсруулах эрхтэнд орсон байсан. Энэ марль амны хөндийгөөр, эсвэл шулуун гэдсээр орсон гэсэн үг.” гэж хэлжээ.

Тус хэргийн үнэн зөвийг тогтоолгохын тулд дахин шинжилгээнд ороход бэлэн байгаагаа Э.Хонгорзул ч хэлж байна.