Сүүлийн үед төрүүлсэн хүүхдээ хаях,  төөрүүлэх гэмт хэрэг Монгол Улсад нэлээд бүртгэгдэж байна. Хамгийн сүүлд л гэхэд хогийн пункерт хаягдсан хоёрхон хоногтой хүү,  хогийн цэг дээр хаягдсан нярай гэх мэт олон цочирдом хэргүүд гарсан. Тэгвэл төрүүлсэн үрээ төөрүүлж хаядаг эцэг, эхчүүдэд Монгол Улсын Эрүүгийн хуульд зааснаар мөнгөн торгууль, албадан ажил хийлгэж саатуулах улмаар хорих хүртэлх ял ноогдуулдаг юм.  Албаны хүний ярьж буйгаар  “Эрүүгийн хуулийн тусгай ангийн 117 дугаар зүйлд хүүхдээ эх нь төөрүүлсэн, хаясан бол гэмт хэрэг гэж заасан байгаа.  Энэ хуулийн хүндрүүлэх нөхцөлд зааснаар хүүхдээ хаяж, төөрүүлснээр хүүхэд нас барсан, хүнд хор уршиг учирсан бол 5 жил хүртэлх хугацаагаар хорих ял эдлүүлэх юм” гэв.

Энэ төрлийн гэмт хэргээс урьдчилан сэргийлэх чиглэлээр мөн хаягдсан хүүхдүүдийг хэрхэн асран хамгаалж байгаа талаар зарим нэгэн албаны хүмүүсийг яриаг хүргье.

Баянгол дүүргийн хэв журмын байцаагч Оюун: Хогийн пункерт хаягдсан нярайн эцэг, эхийг илрүүлсэн

 Баянгол дүүргийн хувьд эх, хүүхдийн эрүүл мэндийн төв 11 дүгээр хороонд байрладаг. Тийм учраас эх нь нярайгаа хаях тохиолдох их гардаг. Уг нь өмнөх онуудад оны хэмжээнд 5-6 хүүхэд бүртгэгддэг байсан бол энэ онд эхний хагас жилийн байдлаар найман хүүхэд хаягдсан байдалтай бүртгэгдсэн байгаа.  Одоогийн байдлаар эцэг эхийг нь олж тогтоох шалгалтын ажиллагаа явагдаж байгаа. Тухайлбал, хүүхдийн эрүүл мэндийн төвд хоёр хоногтой эрэгтэй нярай хүүхэд хаяж явсан хэргийг эзэн болох эцэг, эхийг нь олж тогтоогоод мөрдөн байцаах тасаг шалгаж байна.

Мөн Баянгол дүүргийн XV дугаар хороо 27-р байрны хогийн пүнкерт  хоёр хоногтой эрэгтэй хүүхэд хаясан тохиолдол бүртгэгдсэн. Эцэг эхийг нь олж тогтоосон бөгөөд шалгалтын ажиллагаа үргэлжилж байгаа.
Түүнчлэн бага насны хүүхдийг гудамжинд төөрүүлэх байдлаар үлдээж явсан тохиолдлууд бүртгэгдсэн.  Эх нь хүүхдээ хаях төөрүүлэх гэмт хэрэг нь Монгол Улсын Эрүүгийн хуулийн тусгай ангийн 117 дугаар зүйлд зааснааср 5 жил хүртэл хорих ялтай байдаг.

“Хүүхдийн төв” сувилалын дэд дарга Туяа: Хаягдсан хүүхдүүд дотор бүр нярайдаа ирсэн тархины саажилттай 5-13 насны хүүхдүүд байдаг

Манай “Хүүхдийн төв” сувилал бол өнөөдрийн байдлаар 65-66 хүүхэдтэй байгаа. Сүүлийн үед олдож ирсэн хүүхдүүд нэлээд байна. Одоо байгаа хүүхдүүдийн 40 орчим хувь олдсон, хаягдсан хүүхдүүд байгаа. Он гараад төрөхөд хаягдсан хүүхдүүд найм ирчихсэн байгаа юм. Манайд 0-3 насны орц, гудамжинд хаягдсан хүүхдүүд байгаа. “Хүүхдийн төв” сувилалын хувьд тураалтай, цус багадалтай, амьдралын баталгаажих түвшнээс доош амьдралтай хүмүүсийн хүүхдийг дүүргүүдийн захирамжаар хүлээн авдаг. Хаягдсан, олдсон хүүхдийг цагдаагийн тоотуутаар хүлээж авч үйлчилгээгээ явуулдаг. Хаягдсан хүүхдүүдийн тухайд бид 0-3 настай бол авна. Цагдаагийнхан хаягдсан хүүхдийн ар гэрийнхнийг 6 сарын хугацаанд эрэн сурвалжилдаг. Энэ хугацаанд эцэг, эх нь олдвол буцаагаад өгнө. Ихэнхдээ олдохгүй байдаг учраас манай төв орны эргэлт байхгүй байдаг. Хаягдсан хүүхдүүд дотор бүр нярайдаа ирсэн, тархины саажилттай  5-13 насны 10 хүүхэд байна. Энэ хүүхдүүд маш хүнд асаргаа шаарддаг. Улс авах газар байхгүй ийм хүүхдүүд манайд сувилагдаж байна. Сүүлийн үед эцэг, эхтэй мөртлөө хүүхдээ авахгүй тохиолдлууд гарч байна.

Хүүхдээ хаяснаараа эцэг, эхүүд өөрсдөө торны цаана сууж, харин хүүхэд өнчирч хоцордог.