Монголын сэтгүүл зүйн дээд шагнал болох "БАЛДОРЖ" шагналын эзнээр "Өнөөдөр" сонины сэтгүүлч Ж.Тэгшжаргал тодорлоо. "БАЛДОРЖ" шагналын шилдгийн шилдэг бүтээлийн эзнийг тодруулаад тав дахь жилтэйгээ золгож байгаа бөгөөд шагналын эзэн уран бүтээлчийг тодруулахын тулд Шүүгчдийн зөвлөл жилд дөрвөн удаа хуралдаж, шүүн тунгаадаг. Нэрт сэтгүүлч, зохиолч Ц.Балдоржийн дурсгалд зориулан санаачилсан, “Монголын Пулитцер”-ийн эзнийг тодруулах ёслолд Монголын үе үеийн Төрийн тэргүүн нар нэг дор цуглардаг Энэ удаагийн шагнал гардуулах ёслол өчигдөр Улаанбаатар ресторанд болж өнгөрлөө. Дэд байрт “EAGLE NEWS” телевизийн мэдээллийн хөтөлбөр шалгарав. Дэлхийд алдартай CNN-ийн хөтөлбөрийн форматыг Монголд нутагшуулахыг зорьж, “Мэдээний өрөө”, “Ийглийн мэдээ”, “Үдшийн мэдээ”, “Халуун сэдэв”, “Үг үйлдэл”, “Газар дээрээс нь”, “Бадарчийн Жаргалмаа” зэрэг хөтөлбөрийг мэргэжлийн өндөр түвшинд бэлтгэж байгаа учир тус телевизийн Мэдээллийн албаны хамт олонд 2013 оны БАЛДОРЖ шагналын Дэд байр буюу Тусгай шагналыг хүртээжээ.
Тэдгээрийн ард жагссан “Шилдэг 10”-ыг танилцуулбал:
Осорын ОТГОНЖАРГАЛ МҮОНТ “Усгүй Монгол”, “Модгүй Монгол” нэвтрүүлгүүд
2012 оны БАЛДОРЖ шагналт Гомбожавын ОТГОНБАЯР “Үндэсний шуудан” сонин “Биднээс холдон буй Оюутолгойн ирээдүй”, “Фракцын засаглал“ нийтлэл
Хайнжамцын БҮРЭНТОГТОХ “Үндэсний шуудан” сонин “Үндэстний энергетик”, “Их үргээлгэ” нийтлэл
Дуламын ЦЭРЭННАДМИД, Чанцалын ҮЛ-ОЛДОХ “Зууны мэдээ” сонин “Мантуушийн маапаан”, “Хөсөр хаяж, алдаж асгасан газрын тос” хамтын бүтээл
Дамдины ОТГОНЖАРГАЛ “Өнөөдөр” сонин “Төслийг тушсан төмөр чөдөр” нийтлэл
Галсанбаатарын ДЭЛГЭРЦЭЦЭГ “Өдрийн сонин” МИАТ компанид мөнгө угаасан албан тушаалтнуудын хэргийн талаарх цуврал нийтлэл
Бямбын ЕРЭНТЭЙ “Үндэсний шуудан” сонин “Шагнал, шагнал, бас дахин шагнал”, “Би бол хүчирхийлэл, гишгэчихнэ шүү холдоорой” нийтлэл
Энхбаатарын ХҮРЭЛБААТАР “Өдрийн сонин” “Хүүгээ тэвэрсэн ээж үхэлтэй тэмцэлдэн урссаар ОХУ-ын хил давжээ” цуврал сурвалжлага, “Хустайн нуруунд 13 буга агнажээ” нийтлэл
Төрбатын БАЯРХҮҮ “MN-25 дугаар суваг” телевиз “Амьдралаа гэж...” баримтат уран сайхны цуврал нэвтрүүлэг
Бямбадоржийн АЗЗАЯА “Өдрийн шуудан” сонин Хүүхдийн паркийн газрын асуудлаар бичсэн цуврал нийтлэл
“Балдорж” сангийн шилдэг бүтээлийн ёслолын ажиллагааны талаарх дэлгэрэнгүй сурвалжлагыг бид ирэх даваа гаригийн дугаартаа нийтлэх болно
Эх сурвалж: Өнөөдөр сонин
