“Мобиком”корпорацийн талаарх гомдол, шүүмжлэл сүүлийн хэдэн жил нэлээдгүй гарах болсон. Тиймээс ч “Мобиком”-оос зарим иргэд татгалзаж эхэлж байна. Мөн татгалзахыг ч нэгэндээ уриалах боллоо. Тун удахгүй иргэд “Мобиком”-ын гадаа суулт зарлаж худалдаж авсан дугаар, утас зэргээ буцаан өгч,  төлсөн мөнөө  эргүүлэн өгөхийг шаардаж магадгүй байдалд хүрчихээд байна. Хэрэв “Мобиком”-ын  гадна иргэд эсэргүүцлээ илэрхийлээд эхэлвэл түүнд нэгдэхийг хүсч байгаа мянга мянган хүн ч байгаа юм.

“Мобиком” нийгэмд ядуу баяны давхаргыг бий болгохын зэрэгцээ, хэтэрхий иргэдийг “шулдаг” гэдгийг өдгөө хэн хүнгүй л мэддэг болж. Мөн хэрэглэгчдийг мэдээлэл дутмаг байгаагаар нь далимдуулж ашиг орлого олох зэвсгээ болгодгийг ч хэлэх хэрэгтэй биз ээ.

Тэд иргэдийг туйлширсан бодлоосоо салж чадахгүй гэж үзэн нийгэмд дураарай авирлаж байдаг. Учир нь манай иргэд хуучин, анхны гэсэн бүхнээ үгүй хийхийг хүсдэггүй. Тиймдээ ч шууд шийдвэр гаргаж хуучин дугаар, анхны сонголтоо “устгаж” чаддагүй. Харин үүнийг нь “Мобиком”-ынхон мэдэж байгаа учир басамжилтайгаар ажиглаж суудаг.

Сүүлдээ бүр “Мобиком” Хэрэглэгчдийн эрх ашгийг хамгаалах нийгэмлэгүүдийн нэгдсэн холбоо, Шударга өрсөлдөөн хэрэглэгчийн төлөө газар зэргээс хүргэж байгаа албан бичиг, сануулгыг авч хэрэгжүүлэхээ ч  болив. Хийх ёстой ажлаа хийж, шаардлага тавьж байгаа албан байгууллагуудыг ч ингэж үл тоож байгаа юм чинь иргэдийг басамжлах нь арга ч үгүй биз гэх хүн ч олон байна.

Одоогоор Хэрэглэгчдийн эрх ашгийг хамгаалах нийгэмлэгүүдийн нэгдсэн холбоонд “Мобиком” корпорацитай холбоотой гурван асуудлыг шийдвэрлэж өгөхийг иргэдийн зүгээс хүсдэг байна.

Нэгдүгээрт, Мөнгөөрөө нэгж худалдаж авчихаад ах дүү, хамаатан, найз нөхөддөө өгөхөөр давхар нэгж унаад байна гэж. Өөрөөр хэлбэл 1000 төгрөгийн нэгж худалдаж аваад 500-г нь хэн нэгэн рүү явуулахад тухайн иргэнд 500 төгрөг үлдэх ёстой. Гэтэл иргэнд 450 төгрөг л үлддэг. Энэ нь  мөнгөөрөө нэгж худалдаж авчихаад дахиж алдагдалд ороод байна гэсэн үг.

Хоёрдугаарт, “Card plus” гэх үйлчилгээг  15 мянган төгрөгөөр сарын турш сүлжээндээ үнэ төлбөргүй ярих эрхтэй гэдэг. Хязгааргүй ярих эрхтэй гэдэгт нь хууртаад, нэг сар чөлөөтэй ярих гэж байтал 20 эсвэл 25 хоноод эрх нь дуусчихдаг. Гомдол мэдүүлээд очиход “Та эрхээ дууссаны дараа мессэж илгээгээд хоногоо гүйцээ” гэдэг байна. Цөөн хэрэглэгч эргэж лавлаж учрыг нь олдог. Түүнийг мэддэгүй хүмүүс ярианы эрх дуусчихаж гэж ойлгоод байдаг. Тэгээд л монжуулаад байдаг, түүнийг “Мобиком” өөрсдөө тайлбарладаггүй.

Харин гуравдугаарт,  “Мобиком” корпораци барьцаа хөрөнгө авдаг явдал. Дараа төлбөрт хэрэглэгч болохын тулд барьцаа мөнгө өгдөг. Тэр нь хэрэглэгчийн дансанд орохгүй, компанийн дансанд ордог. Уг нь барьцааны мөнгө хувь хүний дансанд байрших ёстой. Барьцааны үүргээ биелүүлээгүй тохиолдолд “Мобиком” авна, биелүүлсэн үед хэрэглэгч өөрөө авна. 10 гаруй тэрбум төгрөг барьцаа нэрээр “Мобиком”-ийн дансанд орж байгааг дээрх байгууллагаас тооцоолсон байдаг.

Энэ мэт “Мобиком”-ын гаргадаг зөрчил дээрх гурваар зогсохгүй харин ч цааш хөврөх юм.  Тэгэхээр “Мобиком” бүх хэрэглэгчдээ хуурч, өөсрдөө их хэмжээний ашгийг олдог энэ башир аргаа хэзээ таслан зогсоох вэ. Иргэдийг “эд нар биднийг яаж ч чадахгүй”, холбогдох байгууллагуудыг “Бид дөнгөчихнө” гэж басамжилсаар үйл ажиллагаагаа цааш нь үргэлжлүүлсээр байх уу?

“Мобиком”-д албан шаардлага хүргүүлсэн байгууллагуудын амыг эвтэйхэн таглаж, шүүхдэж заргалдах гэсэн хүмүүсийн амыг ч тагласаар байгаа нь “Мобиком”-ыг шүүх, хуулийнхан ч дийлэх ээ больсон гэснийг илтгэж байгаа хэрэг  үү?