Монголчууд нэг үеэ бодвол бэлгийн цөөнх буюу ижил хүйстнүүдийн талаар ойлголттой болж, эрхийнх нь тухай ярьдаг болсон. Гэсэн ч бэлгийн чиг хандлагаар нь гадуурхах, дарамтлах явдал нуугдмал хэрнээ байсаар байгааг “BBC” агентлагийн сэтгүүлч Анна Брессанин хөндсөн байна. Монголд бэлгийн дарамтанд өртөж, хүнд амьдрал туулж байгаа 36 настай У гэгч залуу АНУ-аас цагаачлах, орогнох эрх хүсч байгаа талаар бичжээ.

  У нь Улаанбаатар хотод амьдардаг, нягтлан бодогчийн ажил хийдэг байсан нэгэн. Тэрбээр ажил дээрээ өөртэйгээ ижил бэлгийн чиг хандлагатай нэгэнтэй танилцжээ. Гэвч тэдний харилцаа сүүлдээ хүчирхийлэл болон хувирч, У-г зодож дарамтлан бусдад хэлвэл ижил хүйстэн гэдгийг нь хамт олон, гэрийнхэнд нь зарлана хэмээн сүрдүүлэх болжээ. Монголд ижил хүйстнүүдийн эсрэг хууль байхгүй ч тэрбээр цагдаад очихоос эмээж, бүтэн зургаан сарын турш хүчирхийлэл дунд амьдарсан байна. Тиймээс Монголд өөрийн хүссэнээр биш, нуугдмал амьдарч байгаа тэрбээр найман жилийн өмнөөс АНУ-д амьдрах, албан ёсоор ажил хөдөлмөр эрхлэх эрх хүсчээ. Уг нь У энэ хүсэлтийнхээ хариуг АНУ-ын цагаачлалын шүүхээс өнгөрсөн даваа гарагт авах ёстой байсан ч гай газар доороос гэгчээр жил, бүр түүнээс ч илүү хугацаагаар хүлээх хэрэгтэй болсон аж. Учир нь АНУ-ын сенат ирэх жилийн төсвөө баталж чадаагүйгээс төрийн байгууллагууд нь үүдээ хаах болсон. Үүний нэгэн адил цагаачлалын шүүх нь ч бас ажиллахгүй байгаа. Тиймээс бүтэн найман жил хүлээсэн У-гийн АНУ-д орогнох найдвар хэрхэх эсэх нь дахин тодорхойгүй болжээ. АНУ-д У шиг шалтгаанаар цагаачлалын эрх хүсэгчид олон байдаг аж.

    Монголд өөрийгөө ил цагаан гей эсвэл лесби гээд зарладаг хүн хуруу дарам цөөн. Ижил хүйстнүүдийн эрхийг хамгаалах байгууллага байдаг ч энэ мэт У шиг бэлгийн дарамт, хүчирхийлэлд чимээгүй өртөж яваа олон хүн байгааг хэлдэг. Энэ нь монголчуудын сэтгэлгээ ижил хүйстнүүдийг хүлээж авахад бэлэн бус байдагтай холбоотой хэмээн тайлбарлах нь бий. Мэдлэг боловсролтой, эрүүл саруул ч бэлгийн чиг хандлагаасаа болж дарамтанд амьдарч байгаа олон монголчууд ч цөөнгүй байдаг бололтой.