МУИС-ийн Удирдах зөвлөлийн 2013 оны 11 дүгээр сарын 08-ны өдрийн хурлаас “МУИС-ийн одоогийн бүтэц зохион байгуулалтыг өөрчилж, байгаль нийгэм хүмүүнлэгийн ухааны чиглэлийн, хуулийн чиглэлийн, бизнесийн чиглэлийн, хэрэглээний шинжлэх ухааны чиглэлийн нэгж бүтэцтэй байх нь зүйтэй гэж үзсүгэй” хэмээн тогтоож МУИС-ийн бүтэц зохион байгуулалтын өөрчлөлтийн бэлтгэл ажлыг хангаж, шинэ бүтэц, зохион байгуулалтын төслийг боловсруулах ажлын хэсгийг томилож, ажлын хэсэгт “МУИС-ийн шинэ бүтэц зохион байгуулалтын төслийг багш, оюутны оролцоог ханган боловсруулж, 2013 оны 12-р сарын 15-ны дотор Удирдах зөвлөлд танилцуулахыг” үүрэг болгосон.

МУИС-ийн бүтцийн өөрчлөлтийн төсөл боловсруулах ажлын хэсгийг  Удирдах зөвлөлийн тогтоолын хавсралтаар баталсан 35 гишүүн дээр бүрэлдэхүүн сургууль тус бүрээс 2 багш, МУИС-ийн Хамт олны зөвлөлөөс 2 төлөөлөгч, МУИС-ийн Оюутны холбооноос 2 төлөөлөгч буюу нийт 31 багш, 1 ажилтан, 2 оюутан нэмж, нийт 67 хүний бүрэлдэхүүнтэй (Хавсралт №1) өргөтгөн байгуулсан. Мөн ажлын хэсэгт тэнхим бүрийн оролцоог хангах зорилгоор бүрэлдэхүүн сургууль бүр дээр сургуулийн захирал, тэнхимийн эрхлэгч нараас бүрдсэн дэд хэсгүүдийг (14) байгуулсан болно.

Ажлын хэсгийг зорилго, чиг үүргийнх нь дагуу Ерөнхий хороо (9 гишүүнтэй), Байгаль, нийгэм, хүмүүнлэгийн салбар хороо (34 гишүүнтэй), Хэрэглээний шинжлэх ухааны салбар хороо (17 гишүүн), Бизнесийн салбар хороо (10 гишүүнтэй), Хуулийн салбар хороо (3 гишүүн), Сургалтын албыг өөрчлөн байгуулах салбар хороо (6 гишүүн), Эдийн засаг, төсөв санхүү, бүртгэлийн албыг өөрчлөн байгуулах салбар хороо (5 гишүүн), Ажлын алба (4 гишүүн) болгон зохион байгуулсан ба Байгаль, нийгэм, хүмүүнлэгийн салбар хороог дотор нь Ерөнхий хэсэг (13 гишүүн), Байгалийн ухааны хэсэг (10 гишүүн), Нийгмийн ухааны хэсэг (10 гишүүн), Хүмүүнлэгийн ухааны хэсэг (9 гишүүн) болгон зохион байгуулсан болно. Салбар хороо тус бүрд ахлагч, нарийн бичиг томилсны дээр, Байгаль, нийгэм, хүмүүнлэгийн ухааны салбар хороонд ахлагчаас гадна, зохицуулагч, нарийн бичиг, мөн байгаль, нийгэм, хүмүүнлэгийн хэсэг тус бүрт ахлагч, нарийн бичиг томилон ажиллуулав (Хавсралт №1).

МУИС-ийн бүтцийн өөрчлөлтийн төсөл боловсруулах ажлын удирдамжийг (Хавсралт №2) боловсруулан Ерөнхий хороогоор хэлэлцүүлэн, захирлын тушаалаар баталсан болно. Ажлын хэсгийн анхны нэгдсэн хуралдааныг 11-р сарын 26-ны өдөр хуралдуулж, гишүүдэд ажлын хэсгийн зохион байгуулалт болон ажлын хэсгийн удирдамжийг танилцуулан, тараасан. Хуралдааны явцад гарсан саналыг харгалзан ГГС-ийн багш О. Алтансүх, Д. Мягмарцэрэн нарыг Байгаль, нийгэм, хүмүүнлэгийн салбар хороонд нэмэн оруулав.

Ажлын явцад Ерөнхий хороо 3 удаа, Байгаль, нийгэм, хүмүүнлэгийн салбар хороо 2 удаа, Байгаль, нийгэм, хүмүүнлэгийн салбар хорооны Ерөнхий хэсэг салбарын хэсгүүд, дэд хэсгүүд, болон бусад салбарын хороодтой нийтдээ 21 удаа хуралдаж тодорхой шийдэлд хүрсэн болно. Мөн Байгалийн ухааны хэсэг 3 удаа, Нийгмийн ухааны хэсэг 6 удаа, Хүмүүнлэгийн ухааны хэсэг 5 удаа тус тус хуралдсан байна. Бизнесийн салбар хороо 2 удаа, Хэрэглээний шинжлэх ухааны салбар хороо 5 удаа, Хуулийн салбар хороо 2 удаа тус тус хуралдсан байна. Салбар хороод, салбарын хэсгүүд ажлын тайлангуудаа 12 дугаар сарын 02-ны өдөр Ерөнхий хороонд ирүүлсэний үндсэн дээр Ерөнхий хороо тайлангуудын үндсэн дээр эцсийн саналыг нэгтгэн боловсруулж, 12 дугаар сарын 03-ны өдөр болсон ажлын хэсгийн нэгдсэн хуралдаанаар хэлэлцэж:

    МУИС-ийн байгаль, нийгэм, хүмүүнлэгийн ухааны салбарын сургуулиуд (МКС, ФЭС, ХХИС, ББС, ГГС, МХСС, НШУС, ОУХС, ГХСС, УБС) болон зарим холбогдох тэнхимүүдийг нэгтэн өөрчлөн зохион байгуулж Урлаг/ Шинжлэх ухааны факультет (Faculty of Arts and Sciences);
    Байгалийн ухааны сургуулиудын зарим тэнхим, хөтөлбөрүүд болон Мэдээлэлийн технологийн сургуулийг нэгтгэн, өөрчлөн зохион байгуулж Хэрэглээний шинжлэх ухаан, инженерийн сургууль (School of Applied Sciences and Engineering);
    Хууль зүйн сургууль болон зарим холбогдох тэнхимийг нэгтгэн, өөрчлөн зохион байгуулж Хуулийн сургууль (Law School);
    Эдийн засгийн сургууль, Худалдааны сургуулийг нэгтгэн, өөрчлөн зохион байгуулж Бизнесийн сургууль (Business School);
    ОУХС-ийн олон улсын харилцааны хөтөлбөр, ЭЗС-ийн төрийн удирдлагын хөтөлбөрийн үндсэн дээр Олон улсын харилцаа, нийтийн удирдлагын сургууль (School of International Relations and Public Administration) (Хавсралт №3)

тус тус байгуулах саналыг Удирдах зөвлөлд өргөн барихаар шийдвэрлэв.

Тайлбар:

    ОУХС-ийн олон улсын харилцааны, ЭЗС-ийн төрийн захиргааны хөтөлбөрүүд нь  тус бүр мэргэжлийн хөтөлбөр,
    Монгол улсын нийтийн албыг МУИС-ийн шинэлэг хөтөлбөрөөр бэлтгэгдсэн мэргэжилтэнүүдээр бэхжүүлэх;
    Бодлого боловсруулах үйл явцад МУИС-ийн эрдэм шинжилгээ, судалгааны чадавхийг дайчлах;
    Бодлого боловсруулах байнгын шинжтэй тинк-танк институцийг бий болгох  зэрэг зорилгын үүднээс Олон улсын харилцаа, нийтийн удирдлагын сургуулийг шинээр байгуулах  болсон саналыг Удирдах зөвлөлд оруулах нь зүйтэй гэж шийдвэрлэсэн болно.