Монгол Улсын төсвийн тухай хуульд нэмэлт оруулах тухай, Засгийн газрын тусгай сангийн тухай хуульд нэмэлт оруулах тухай хуулиудын төслийг Газрын тосны тухай /шинэчилэн найруулсан/ хуулийн төслийг дагалдан УИХ-д өргөн мэдүүлсэн бөгөөд өнөөдрийн /2013.12.12/ нэгдсэн хуралдаанаар энэхүү хуулиудын төслийн хэлэлцэх эсэхийг гишүүд хэлэлцсэн юм.

   Хууль санаачлагчийн илтгэлийг Уул уурхайн сайд Д.Ганхуяг танилцуулж, Эдийн засгийн байнгын хорооны санал, дүгнэлтийг УИХ-ын гишүүн Д.Гарамгайбаатар танилцуулсан.

   Хууль санаачлагчийн мэдээлэл болон байнгын хорооны санал дүгнэлттэй холбогдуулан хуралдаанд оролцсон гишүүд асуулт асууж, хариулт авч дууссаны дараа зарим гишүүд үг хэллээ. Тухайлбал, гишүүн С.Баярцогт Монгол Улсын төсвийн тухай хуульд нэмэлт оруулахыг хэлэлцэхийг дэмжиж байна, харин Засгийн газрын тусгай сангийн тухай хуульд нэмэлт оруулахыг хэлэлцэхийг дэмжихгүй байна гээд энэ хоёр хуулийн төслийг салгаж, тус тусад нь санал хураалгах горимын санал гаргалаа. Энэ саналын дагуу гишүүдийн саналыг хураалгахад олонхи нь дэмжээгүй учир байнгын хорооноос гаргасан томъёоллоор санал хураалт явуулсан ч мөн л олонхи гишүүд дэмжсэнгүй. Ингээд Газрын тосны тухай /шинэчилэн найруулсан/ хуулийн төслийг дагалдан өргөн мэдүүлсэн Монгол Улсын төсвийн тухай хуульд нэмэлт оруулах тухай, Засгийн газрын тусгай сангийн тухай хуульд нэмэлт оруулах тухай хуулиудын төслийг хэлэлцэх шаардлагагүй гэж үзээд хууль санаачлагчид нь буцаахаар боллоо хэмээн УИХ-ын Хэвлэл мэдээлэл, олон нийттэй харилцах хэлтэс мэдээлэв.