Нийслэлийн цагдаагийн газраас өнөөдөр эцэг эхчүүдэд зориулсан уриалга гаргалаа. Өөрөөр хэлбэл шинэ он гарах гэж байгаа энэ өдрүүдэд эцэг эхчүүдийг архигүй баяраа тэмдэглэцгээе гэсэн уриалга гаргасан юм. Энэ ажилд Монголын сурагчдын холбоо ч хамтран ажиллаж байгаа аж.

Тэгвэл энэ сэдвийн хүрээнд Сурагчдын холбооны тэргүүн О.Сэлэнгээс цөөн хэдэн асуултанд хариулт авлаа.

-Энэ уриалгынхаа дагуу ямар ажлуудыг зохион байгуулах вэ?
-Хүүхэд гэдэг дуурайх урлаг эзэмшсэн, уран зоригийн эзэн гэж олон улсад тодорхойлсон байдаг. Учир нь хүүхэд эцэг, эхчүүдээ л дуурайдаг. Тэгэхээр хүүхдийнхээ хажууд бид баяр тэмдэглэж байна гэж архи тулгаж уух нь буруу юм. Уг нь бол шинэ жилийн баяр  гэдэг хүүхдийн баяр шүү дээ. Юуны тулд өвлийн өвгөн, цасан охин байдаг билээ. Тиймээс хүүхдийн баярыг хүүхдийн баяр шиг л байлгах хэрэгтэй.

Ямар нэгэн баяр ёслолоор л хүүхдийнхээ дэргэж архи уугаад байхаар хүүхдүүд эцэг, эхээсээ үлгэр дуурайлал авч бараг л арван жилээсээ архи хэлдэг болж байна. Өсвөр насны согтууруулах ундаа хэрэглэдэг хүүхдүүд ч сүүлийн үед эрс нэмэгдэж байгаа.

Энэ туршлагыг Америк улсад хэрэгжүүлж байсан байгаа юм. Эцэг эхчүүд нь өөрсдөдөө хүүхдүүддээ цаг зав гаргаж байсан нь амжилттай хэрэгжиж байсан байдаг. Цаашдаа хэрэгжүүлээгүй сургуулиуд дээр нь бид хариуцлага тооцож ажиллана. Мөн бүх хувийн сургуулиуд дээр ч хэрэгжүүлэхээр төлөвлөж байгаа.

-Хүүхэд архи хэрэглэсэн хэдэн жишээ дурдаж болох уу?
-Ганцхан жишээ дурдахад, өнгөрсөн онд тавдугаар ангийн хүүхэд эрүүлжүүлэгдсэн байдаг. Тэгвэл ийм зүйл дахин давтагдахгүйн тулд энэхүү уриалгыг эцэг, эхчүүд хэрэгжүүлэх хэрэгтэй. Энэ оны байдлаар 750 хүүхэд гэмт хэрэгт холбогдсон байна. Түүнээс 60 хувь нь архитай холбоотой.  Тэр дундаа гэр бүлийн орчинд эцэг, эхээ байхгүй үед архи дарс хэрэглэх тохиолдлууд гарсан. Түүнчлэн хүүхдийн зуслангууд дээр хүртэл ийм байдал ажиглагдсан. Өөрөөр хэлбэл,зуслан дээр гарсан ахлах ангийн сурагчид архи хэтрүүлэн хэрэглэсэн явдал гарсан.  Ер нь архи хүүхдийнхээ хажууд хэрэглэнэ гэдэг жижиг зүйл юм шиг боловч том зүйлийн эхлэл болдог. Цаашдаа бүх баяруудыг архигүй, айрагтай тэмдэглэдэг болох хэрэгтэй байна.

-Гэр бүлд архидан согтуурсаны улмаас хүүхэд гэмтэж бэртэж тохиолдол гардаг. Тэгвэл гэр бүлийн хүрээний архидан согтуурсанаас болж хохирч байгаа хүүхэд хэр олон байдаг вэ?
-Гэр бүл архидан согтуурч байгаа асуудлаас болж голчлон тухайн гэр бүлийн гишүүд эрүүл мэнд, сэтгэлзүйгээр хохирдог. Гэр бүлийн хүчирхийлэлд байгаа хүүхдүүд зан харилцааны өөрчлөлттэй болж, гэмт хэрэг зөрчилд холбогдох, гэрээсээ дайжих олон эрсдлийг дагуулдаг. Ер нь архидалтаас үүдэлтэй гэр бүлийн хүчирхийлэл нийгэмд их байна. Өнгөрсөн сарын байдлаар 2300 гаруй хүн гэрээсээ агсан тавьж эрүүлжүүлэгдсэн гэхээр тэнд өнөөх л хүүхдийн асуудал хөндөгдөж байгаа шүү дээ.

-Аливаа гэмт хэрэгт холбогдсон хүүхдийн эцэг, эх нь архины хамааралтай байдаг гэсэн зүйл яригддаг. Ер нь хүүхдийн хүмүүжил , сэтгэлзүйд энэ байдал хэр нөлөөлдөг юм бол?
-Нийслэлийн хэмжээнд тэнэмэл байдлаар амьдарч байгаа 100 гаруй хүүхдээс судалгаа авч, нөхцөл байдлын үнэлгээ хийхэд ихэвчлэн гэр бүлийн гишүүний хэн нэгэн архины хамааралтай, архидалтаас үүдэлтэй хүчирхийлэл байдгаас гэрээсээ дайжсан дүгнэлтүүд гардаг.