Нийслэлийн ИТХ-ын Тэргүүлэгчдийн ээлжит хуралдаанаар Нийслэлийн нийтийн тээврийг 2020 он хүртэл хөгжүүлэх хөтөлбөр, сангийн журам батлах тухай асуудлыг хэлэлцлээ.

  Нийтийн тээврийн үйлчилгээнд 2009 онд улсын төсвийн хөрөнгө оруулалтаар 400 автобус худалдан авсан байна. Эдгээр 400 автобусны өмчлөлийн асуудал одоог хүртэл шийдэгдээгүй, төлбөрийг эргэн төвлөрүүлж, төвлөрсөн  хөрөнгөөр парк шинэчилж байх зорилгоор “Нийслэлийн нийтийн тээврийн парк шинэчлэлтийн сан”-г  байгуулсан боловч Засгийн газрын тусгай сангийн тухай хуулийн холбогдох заалттай зөрчилдөж, захиран зарцуулах байдал өнөөдрийг хүртэл тодорхойгүй байна. Үүнийг шийдвэрлэхийн тулд орон нутгийн төсвийн хөрөнгө, аж ахуйн нэгж, байгууллагуудаас эргэн төлөлтөд төвлөрүүлэх хөрөнгө, бусад буцалтгүй тусламж, дэмжлэг хандив зэрэг эх үүсвэрүүдээс бүрдэх санг байгуулж, орон нутагтаа бие даан захиран зарцуулж байх шаардлагатай байна. Нийслэлийн нийтийн тээврийг 2020 он хүртэл хөгжүүлэх хөтөлбөрийг баталснаар салбарын эрх зүйн орчинг боловсронгуй болгох, дэвшилтэт техник технологийг нэвтрүүлэх, нийтийн тээврийн салбарыг хөгжүүлэхэд шаардлагатай төсөл, хөтөлбөрийг санхүүжүүлж, Улаанбаатар хотын иргэдийн тээврийн үйлчилгээний эрэлт, хэрэгцээг хангасан аюулгүй, соёлтой, шуурхай тээврийн үйлчилгээний тогтвортой системийг бий болгох юм. "Тээврийн үйлчилгээг шинэ шатанд гаргах, зөв зохион байгуулалтаар үр дүнтэй ажиллах шаардлагатай байна. Тйимээс нийслэлийн иргэд стандартын шаардлага хангасан шинэ тээврийн хэрэгслээр үйлчлэх нөхцөлийг бүрдүүлэх, нийтийн тээврийн үйлчилгээ эрхлэгч аж ахуйн нэгж байгууллагуудын чадавхийг бэхжүүлэх, тэдгээрийг дэмжин ажиллах зорилгооор “Нийслэлийн нийтийн тээврийн салбарыг хөгжүүлэх сан” байгуулах зайлшгүй шаардлагатай" байна гэж Нийслэлийн Засаг даргын орлогч Н.Гантөмөр хэллээ. Өнгөрсөн долдугаар сард НИТХ-аар чуулганаар төсөвт өөрчлөлт оруулах тухай тогтоолын дагуу нийслэлийн нийтийн тээврийг хөгжүүлэх парк шинэчлэх сангийн 20 тэрбум төгрөгийг энэ оны төсөвт суулгасан байна. Өнөөдрийн байдлаар 600 гаруй он хуучирсан том оврын автобус иргэдэд үйлчилж байна. Харин худалдан авахаар төлөвлөж байгаа залгаа автобус нь олон хүн тээвэрлэх хүчин чадалтай гэдгийг албаныхан хэлсэн юм. Нийслэлийн нийтийн тээврийг цогцоор нь хөгжүүлэх, иргэдэд таатай үйлчилгээг бий болгох боломжтой болох уг сангийн даргаар Нийслэлийн Засаг дарга ажиллах бөгөөд зөвлөлийн нарийн бичгийн дарга гишүүд нь НЗД-ын Тамгын газар, Өмчийн харилцааны газар, Тээврийн газрын холбогдох албан тушаалтнуудаас бүрдэнэ. Нийслэлийн ИТХ-ын Тэргүүлэгчид хэлэлцээд Нийтийн тээврийн санг байгуулахаар болж, дэд хөтөлбөр, сангийн журмыг хавсралтаар баталлаа гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.