Улаанбаатар хотын замын хөдөлгөөний ачааллыг бууруулах ажлын хэсэг, Захирагчийн ажлын алба, зах, худалдааны төвүүдийн удирдлагууд замын хөдөлгөөний ачааллыг бууруулахад хамтран ажиллахаар болж санамж бичигт гарын үсэг зурсан. Талууд санамж бичигт гарын үсэг зурснаар зөвхөн замын хөдөлгөөний ачааллыг бууруулахад хамтран ажиллаад зогсохгүй нийслэлийн Засаг даргын 2013-2016 оны үйл ажиллагааны хөтөлбөрийг хэрэгжүүлэх, хотын тохижилт, өнгө үзэмжийг сайжруулах, нийгмийн дэг журам хангуулах, түрээслэгчид, ажиллагсад, иргэдийн эрүүл, аюулгүй орчинд ажиллаж, амьдрах нөхцөлийг бүрдүүлэх зэрэг томоохон кампанит ажлыг эхлүүлэх боломжтой болж байгаа юм.
Улаанбаатар хотын Захирагчийн ажлын албаны Хүнс худалдаа үйлчилгээний хэлтсээс санамж бичгийг тухайн зах, худалдааны төвийн орчин нөхцөлд тохируулан өөр өөрөөр боловсруулсан юм. “Нарантуул” худалдааны төвийн хувьд хашаан дотор хөдөлгөөн зохицуулах 20 ажилтныг шинээр авч 2 ээлжээр ажиллуулна гэдгээ мэдэгдсэн бөгөөд хуучин хүнсний захын урд хэсэгт худалдаа явуулж байгаа түрээслэгчдийг шилжүүлж зогсоолын талбайг чөлөөлүүлэх, өргөтгөлийн баруун талын тусгаарлах түмбийг авч 4 хэсэгт төв зах руу орсон гарц гаргах, захаас гарах гарцны тоог нэмэгдүүлэн түгжрэл үүсгэхгүйгээр шуурхай үйлчлэх зохицуулалтын арга хэмжээ авах, захын урд талын төв хаалга руу орох гарцыг хааж тээврийн хэрэгслийг зүүн талаар нь буцаж эргүүлэн өргөтгөлийн хаалга болон төв хаалгаар нь оруулах, захын хашаанаас Нарны зам руу гарах баруун урд хаалганы хойд талын төлбөртэй зогсоолыг чөлөөллөх зэрэг зохион байгуулалт хийж эхлээд байна.
Цаашид түрээслэгч нарын автомашиныг зогсоолын талбайд байрлуулахгүй байх, эко орчин бүрдүүлсэн давхар зогсоолоор шийдвэрлэх зэргээр зохион байгуулалтын арга хэмжээ авч ажиллахаас гадна Халдвар судлалын үндэсний төв рүү гарч байгаа хойд хаалга орчмын шороон замыг тэгшилж, урд талын төв хаалганы орчимд эвдрэлтэй зам талбайг засварлах, орох гарах гарц, зогсоолын талбайн хөдөлгөөний аюулгүй байдлыг хангасан тэмдэг байрлуулж, тэмдэглэгээ хийх юм. Түүнчлэн нийтийн тээврийн бага оврын микроавтобусыг захын зүүн урд хэсэгт зогсоож, зөвхөн хойд талын хаалгаар гаргах нөхцөлийг бүрдүүлж, том оврын автобусыг үйлчилгээнд нэмж оруулах, зах орчмын орох, гарах гарц болон автомашины зогсоол дээрх эмх замбараагүй ил задгай худалдаа, үйлчилгээг цэгцлэх, шаардлагатай тохиолдолд холбогдох байгууллагуудтай хамтарч ажиллах юм.
Мөн НИТХ-ын Тэргүүлэгчдийн дагуу ойр орчмын 50 м хүртэлх нийтийн эзэмшлийн зам талбайгаа бүрэн хариуцаж хог, цас, мөсийг тогтмол цэвэрлэж, хальтиргаа гулгаа үүсгэхгүй, орчныг бохирдолгүй цэвэр байлгах үүргийг “Нарантуул”-ын удирдлага хүлээснээс гадна галын аюулгүй байдлыг хангах, байнгын харуул хамгаалалтыг сайжруулах, барилга байгууламжийн гадна талд галын гидрантуудыг суурилуулна гэдгээ илэрхийлээд байгаа юм гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.
