“Оюутны өргөө” буюу та бидний нэрлэж заншсанаар "Мянган оюутны байр" өнөөдөр нээлтээ хийлээ. Байрны нээлтэд БШУ-ы дэд сайд Б.Ургамалцэцэг, МОХ-ын ерөнхийлөгч Х.Батсайхан тэргүүтэй албаныхан оролцсон юм.

Тус байр нь нэг нь 500 оюутны багтаамжтай А, В гэсэн хоёр блок барилгаас бүтнэ. Нийтдээ 11 давхар бөгөөд подвалийн давхарт ажилчдын өрөө нэг давхарт офисс үйлчилгээний өрөөнүүд байрлах бол үлдсэн есөн давхарт нь оюутнууд амьдрах аж.

Хоёр барилгад нийлээд 252 оюутан амьдрах өрөө байгаа ба өрөөний дотор зохион байгуулалтын хувьд хоёр өрөө дундаа нэг ариун цэврийн өрөө, гал тогооны өрөөтэй байх юм. Нэг оюутанд 890 мянган төгрөгний тохижилт ноогдож байгаа бөгөөд ор, ширээ, сандал, хувцасны шүүгээ зэрэг модон эдлэлүүдийг үндэсний үйлдвэрлэгчид хийж гүйцэтгэсэн байна. Түүнчлэн ус цахилгааны мөнгийг оюутнууд өөрсдөө төлнө хэмээн яригдаж байсан ч дээрх зардлыг улсаас бүрэн төлөхөөр болжээ.

Энэ үеэр МОХ-ын ерөнхийлөгч Х.Батсайханаас бид дараах тодруулгыг авсан юм.

Х.Батсайхан:Нэмж 3000 мянган оюутны байр барих шаардлагатай

-Шинэ оюутны байранд орох хүсэлтэй оюутнуудад ямар шаардлага тавьж байгаа вэ? Мөн тэд хаана хандах уу?
-Бид 38 их дээд  сургуулийн 968 оюутныг оруулах квот батласан. Хамгийн гол нь оюутан өөрийнхөө сургуулийн оюутны үнэмлэх цахим үнэмлэх байранд орох хүсэлтээ илэрхийлсэн өргөдөлөө МОХ болон Мянган оюутны байрны захиргаанд ирж тавих бүрэн боломжтой. Өнөөдрийн байдлаар 210 оюутан А блок байранд орсон байгаа. Маргаашнаас эхлэн Б блок буюу нөгөө байрны эхний оюутнууд орж эхэлнэ. Оюутнуудад тавьж байгаа хамгийн гол шаардлага нь хөдөө орон нутгаас УБ хотод ирж суралцаж байгаа оюутнууд байх ёстой. Их дээд сургуульд квот тогтоосон. Энэ квотод ойрын өдрүүдэд дахин зохицуулалт хийнэ.

-УБ хотод нийт хичнээн оюутан ирж суралцаж байгаа вэ?
-Хөдөө орон нутгаас нийтдээ 57 мянган оюутан ирж суралцаж байгаа. Эдгээрээс оюутны байранд орох хүсэлтээ илэрхийлсэн 18 мянган оюутан байна гэсэн судалгаа байдаг. Тэдгээрээс 13.700 оюутан оюутны дотуур байраар хангагдаад байна. Мөн УБ хотод 45 оюутны байр байгаа 46 дахь оюутны байр нь энэ мянган оюутны байр өнөөдөр нээлтээ хийлээ. Төлбөрийн хувьд 467 000 төгрөг байгаа. Сарын 68 мянган гэсэн үг. Оюутнууд маань 2-оос дээш сараар нь төлбөрөө хийх боломжийг олгож байгаа. 6 сарын 30 хүртэл амьдарч болно. Цаашид их сургуулиуд хотоос нүүгээд гарчихвал энэ байрыг залуу хосуудад зориулсан хэлбэрээр ашиглаж болно.

-Цаашид хичнээн оюутны байр шинээр баригдах вэ?
-УБ хотод нэмж 3000 мянган оюутны байр зайлшгүй барих шаардлагатай. Мөн 1950-иод онд баригдсан оюутны байруудад МХЕГ-ын дүгнэлтээр нураах акт гарчихлаа. Тэгэхээр эдгээр байруудыг нурааж газар дээр нь шинээр яг ийм загварын оюутны байр барих төсвийг цаашид бүрдүүлэхээр УИХ-ын нэр бүхий гишүүдэд хүргүүлсэн байгаа.