Нийслэлийн Иргэдийн Төлөөлөгчид улирал тутам өөрсдөдөө 10 сая төгрөгийн урамшуулал олгох журмыг нийлж суугаад баталсан талаар бид өмнө нь мэдээлж байсан. Тэгвэл бидэнд үүнээс илүү ноцтой баримт олдлоо. Тодруулбал, ирэх нэгдүгээр сарын 1-ны өдрөөс эхлэн дээрх дээр нэмэгдэж аймаг, дүүргийн ИТХ-ын бүх төлөөлөгч нар улирал бүр 5 сая төгрөгийн урамшуулал авахаар болжээ. Энэ нь албан ёсоор батлагдсан бөгөөд тогтоол нь хүртэл гарсан байна. Нийслэлийн есөн дүүрэг нийтдээ 500 төлөөлөгчтэй. Харин 21 аймагт ойролцоогоор 800 /аймгуудын албан ёсны вэб сайтаас авсан тоо/ төлөөлөгч ажилладаг аж. Үүнээс харвал тэд төсвийн олон тэрбум төгрөгөөр туйлах нь. Гэхдээ яг хэдэн төгрөгийг халаасалахыг тодорхой болгохын тулд бүгдээрээ нэгэн тоо бодъё.

    Нийслэлийн Тамгын газарт нийтдээ ИТХ-ын 45 төлөөлөгч байдаг. Хүн бүрт 10 сая төгрөг өгдөг гэхээр нэг улиралд 450 саяаар төлөөлөгчдөө эрхлүүлдэг байна. Ингээд энэ тоогоо дөрвөн улиралд үржүүлбэл 1.8 тэрбум төгрөг өгдөг гэсэн үг. /Одоо өгч байгаа/

    Харин нийслэлийн есөн дүүрэг, 21 аймаг нийлээд 1300 төлөөлөгчтэй. Тэгээд хүн бүрт 5 сая төгрөг ирэх сарын 1-ээс өгөөд эхэлбэл улиралд 6.5 тэрбум төгрөгийг урамшуулалд явуулна гэсэн үг. Ингээд энэ тоогоо 4 улиралдаа үржүүлээд үзвэл 26 тэрбум төгрөг болно.  Эцэст нь нийслэл болон хөдөөний төлөөлөгч нар нийлж байгаад 30 орчим урамшуулал нэрээр халаасална гэсэн үг юм. 

    Зүгээч ч үгүй нийслэлийн ИТХ-ын 45 төлөөлөгч нь 2014 онд энэ мөнгөө нэг дахин нэмж 20 сая болгохоор ярьж эхэлсэн талаар зарим эх сурвалжууд мэдээлж байна. Ингээд эрхэм төлөөлөгчдийн авдаг мөнгө нэг дахин нэмэгдэж, хот хөгжих эх үүсвэр тодорхой мөнгөн дүнгээр хорогдлоо гэсэн үг. 30 орчим тэрбум төгрөгөөр юу хийж болох вэ. 90 цэцэрлэг, бас овоо хэдэн сургууль барьж болно.  2013 оны улсын төсөвт 100 гаруй хүүхэд хүмүүжих  нэг цэцэрлэг барихад 280 сая төгрөг төсөвлөсөн гэж тооцоолбол 27 тэрбум төгрөгөөр нийтдээ 90 цэцэрлэг барих боломжтой гэсэн үг. Цэцэрлэг, сургууль бол хамгийн наад захын жишээ. Үүнээс өөр олон бүтээн байгуулалтын ажлыг нийслэл болон хөдөөд өрнүүлж болно.

     Гэтэл ИТХ-ын тэргүүлэгчид  үүний оронд өөрсдийгөө эрхлүүлж байна. Төсөв бүрдэхгүй энэ хэцүү үед татвар төлөгчдийн мөнгөнд хэтэрхий үрэлгэн байдлаар хандаад байгаа юм биш үү Д.Баттулга дарга аа. ИТХ-ын төлөөлөгчдөд цалингаас гадна урамшуулал нэрээр 30 гаруй тэрбум төгрөгийг зүгээр л бэлэглэж байгааг иргэд шүүмжилж байна. Уг нь урамшууллыг тодорхой хэмжээний ажил хийсэн, сайн ажилласан хүнд олгодог. Гэтэл иргэд дүүрэг, хороогоо хариуцсан ИТХ-ын төлөөлөгчөө таних ч үгүй явж байна цаана чинь.

Яагаад гэвэл, дүүрэгтэйгээ танилцаж, ажил, аян өрнүүлдэггүй болоод тэр шүү дээ. Гэтэл Нийслэлийн удирдлагууд ажлаа хийж мэддэггүй нөхдүүдийг арав, хорин саяар нь эрхлүүлээд л. Энэ бол татвар төлөгч бидний мөнгө.