Байгууллагын шилдэг шалгаруулах ажил эцэст нь хүний аминд хүрч эхэлсэн талаар мэдээлэл гарсан. Тодруулбал, Орхон аймгийн Баян-Өндөр сумын нутагт гарчээ. Таван жил санхүүч хийсэн, өндөр настай ээж, өсвөр насны хоёр хүүхэдтэйгээ амьдардаг бүсгүй байгууллагынхаа шинэ жилд очихоор их л догдлон явсан  ч эцэст нь амиа алдсан байна.

Яг үүнтэй адилхан хэрэг мөн л нийслэлд гарсан аж. Байгууллагын шилдэг гэх өргөмжлөлөө тэврээд нас барсан эрийн хэрэг мөн л олныг цочирдууллаа. Талийгаач бага зэрэг балгадаг ч тэр өдөр эхнэртэй уухгүй гэж хэлээд гарчээ. Гэтэл дарга, цэргийн дайллага, найзуудын шилдэгтэй тулгах гэсэн хүндлэлд догдолсон тэрбээр, хэтрүүлэн уусан ч гэртээ харина хэмээн гарч одсон байна. Харамсалтай нь дан өмдтэй, зуны ботинктой тэрбээр, шилдэг гэх өргөмжлөлөө тэвэрсээр энэ хорвоог орхижээ.

Нэг нь шилдэг, болж нөгөөдүүл нь архиар дайлдаг бичигдээгүй хууль хэдхэн хоногийн зайтай хоёр хүний амийг авч одлоо. Баяр ёслол гэхээр л манай Монголчууд архи ууж, цэнгэлдэх дуртай. Тэгсэн хэрнээ биеэ хэрхэн авч явахаа мэддэггүй. Архиа хэтрүүлж уугаад хэл ам гаргана. Эсвэл янз бүрийн осол аваарт өртөнө. Цаад байгууллагынхан нь ч согтуу явж буй нэгэндээ хараа хяналтыг тавьж чаддаггүй. Улмаар согтсон хүмүүс хөдлөх, авто осолд өртөх, балмад этгээдийн гарт өртөх зэргээр эрүүл мэнд, амь насаараа хохирсоор байна.

Шинэ жилийн энэ өдрүүдэд архидан согтуурлаас үүдэлтэй гарч буй хэргүүдийн талаар ЦЕГ-ын Хэвлэл мэдээллийн төвийн ахлах байцаагч, ахмад Ё.Лхагвасүрэнгээс тодрууллаа.

-Архи согтууруулах ундаа хэтрүүлэн хэрэглэсэнээс осгож амиа алдах тохиолдол олноор бүртгэгдэх боллоо. Энэ долоо хоногт хэр байна?

-Өнгөрсөн амралтын өдрүүдэд архи согтууруулах ундаа ууснаас болж осгож амиа алдсан харамсалтай хэрэг дөрөв бүртгэгдсэн. Хөдөө орон нутагт гурав, Улаанбаатар хотод нэг бүртгэгдсэн. Шинэ жилийг тэмдэглэхдээ байгууллага хамт олон баярыг гоё болгох тал дээр нь хэт их анхаардаг.Тэгээд арга хэмжээ дууссаны дараа ажиллагсадаа аюулгүй гэрт нь хүргэх тал дээр компанийн удирдлагууд ажил зохион байгуулахгүй байна.

-Мөн согтуугаар тээврийн хэрэгсэл жолоодох хэрэг ихсэж байгаа гэж сонсогдсон?

-Энэ сарны 1-16-ний хооронд Замын цагдаагийн шөнийн эргэлтийн шалгалтаар 1160 хүн согтуугаар тээврийн хэрэгсэл жолоодож яваад журамлагдсан байна. Энэ хугацаанд 49 авто осол гарсан бөгөөд архи согтууруулах ундаа хэрэглэсэн үедээ осол хийсэн байна. 49-н авто ослын 70 хувь нь зөвхөн шинэ жилийн арга хэмжээнд оролцоод буцаж явахдаа гаргасан зөрчил байгаа. Архи согтууруулах ундааны зүйл хэрэглэсэн үедээ тээврийн хэрэгсэл барьж болохгүй гэдгийг хүн бүр мэддэг. Энэ дүрмээ сайн бариач ээ. Цагдаагийн албан хаагчид хүний муу үзэх гэж байгаа юм шиг санагдаад байж магадгүй. Ямарваа нэг баяр болохоор шалгалтын ажиллагааг эрчимжүүлээд, согтуу жолооч нарыг олноор нь журамлах ажил зохиодог. Яагаад гэвэл үүнээс болж хүний амь нас, эд хөрөнгө, эрүүл мэндэд хохирол учрах магадлал нь өндөрсөөд эхэлдэг. Хувь хүн, компани, байгууллага, хамт олноороо энэ байдалд анхаармаар байна гэдгийг цагдаагийн байгууллагаас дахин дахин анхааруулмаар байна.