1990-1995  хооронд өөрөөс нь үл хамаарах шалтгааны улмаас ажил хөдөлмөр эрхлээгүй буюу эрхлэх боломжгүй байсан иргэдийн ажилласан жил тасарсныг ажилласнаар нөхөн тооцох эрх зүйн орчныг бүрдүүлэх зорилтыг Засгийн газрын хөтөлбөрт тусгасан. Энэ дагуу "Ажилласан жил, тэтгэврийн даатгалын шимтгэлийг нөхөн тооцох  тухай" хуулийг УИХ-аасч баталсан билээ. 

Тиймээс энэхүү хуулийг хэрэгжүүлэх журмыг Хүн амын хөгжил, нийгмийн хамгааллын сайд баталж, ажилласан жил, тэтгэврийн даатгалын шимтгэл нөхөн тооцуулахаар хүсэлт гаргасан иргэдийг бүртгэх ажлыг өнгөрсөн оны 11 дүгээр сарын 15-ны өдрөөс энэ оны аравдугаар сарын 1-ны өдрийг хүртэлх хугацаанд орон даяар зохион байгуулсан.

Тэгвэл энэ хугацаанд улсын хэмжээнд 494.8 мянган иргэн ажилласан жил, тэтгэврийн даатгалын шимтгэлээ нөхөн тооцуулах хүсэлт гаргажээ. Үүнээс 24 хувь нь тав хүртэлх жилээр, 76 хувь нь 5-11 жилээр ажилласан хугацаагаа нэмэгдүүлэх боломжтой болсон байна. 1990-2000 оны нийгмийн шилжилтийн явцад ажил олдохгүйн улмаас ажил хөдөлмөр эрхлэх боломжгүй байснаас орлогогүй, тэтгэврийн даатгалд хамрагдаагүй иргэдийг энэ хуулийн үйлчлэлд хамруулсан.

Харин 1191-1994 онуудад дөрөв ба түүнээс дээш хүүхэдтэй эхчүүд болон 27 ажил ажилласан эмэгтэйчүүд, 32 ажил ажилласан эрэгтэйчүүдийг нас харгалзахгүйгээр тэтгэвэрт гаргаж байсан. Тэгвэл эдгээр иргэдийн ажилласан хугацааг 7 хүртэл жилээр нэмэгдүүлэн тооцох боломжтой болжээ. Уг нөхцлөөр тэтгэвэрт хамрагдах 41 мянган иргэн байгаагийн 82 хувь нь эмэгтэйчүүд бөгөөд ажилласан хугацааг нь нөхөн тооцох бүртгэл, судалгааны ажлыг 2014 хоёрдугаар сарын 1-ээс эхлүүлж, иргэн бүрээр ажилласан хугацааны нэмэгдлийн баталгаажуулалтыг хийсний дараа 2015 оны нэгдүгээр сарын 1-ээс эхлэн холбогдох тэтгэврийн нэмэгдлийг эдгээр иргэдэд тооцож олгох юм байна.