"Монгол HD" телевизийнхэн Монголын сэтгүүлзүй гэж худалдагдсан салбар. Сэтгүүлчид нь гэж худалч хүмүүс гэдгийг олон нийтэд ойлгуулахыг оролдсон нэвтрүүлгийн дуулиан одоо ч намжаагүй байна.

Улмаар  "Монгол HD" телевиз хэвлэл мэдээллийн салбарыг “хийх” гэж байгаад өөрсдөө  олон нийтийг төөрөгдүүлсэн, сэтгүүлзүйг доромжилсон үйлдэл гаргасан болж орхив.

 Тэгвэл хэнийх нь буруу гэдгийг ШӨХТГ-аас ч нотлоод өгөв бололтой. Учир нь ШӨХТГ-ын дарга О.Магнай “Монгол HD” телевизээс болж хохирсон, нэр хүндээ алдсан гэсэн ямар ч компани, хэвлэл мэдээлэл, сэтгүүлч манайд хандаж болно. Хуулиараа бол “Монгол HD” телевиз зар сурталчилгааны хууль зөрчсөн хэмээн мэдэгдсэн.

Тодруулбал, О.Магнай “Монгол Улс зар сурталчилгааны тухай хуультай. Тиймээс тухайн сурталчилгаатай холбоотой хариуцлагыг зар түгээсэн хуулийн этгээд хүлээх ёстой.  Өөрөө хэлбэл, “Монгол HD” бүх хариуцлагыг хүлээх ёстой.  Зарим иргэд дээрх мэдээллээс болж сэтгэл санааны хохирол учирсан гэж үзвэл надад хандаж болно. Мөн нэр хүндэд нь халдсан хэвлэл мэдээллийн аль нэг байгууллага нийтээрээ хохирсон, эсвэл сонины захиалагчид худлаа мэдээллийг тавьснаас болж хохироосон гэж үзэж буй тохиолдолд манай байгууллагад хандаж болно. Хуулиараа Макдоналдс Монголд нээгдэх тухай ташаа зарыг олон нийтэд түгээж, иргэдийг мэхэлсэн "Монгол" НD телевиз хариуцлага хүлээх ёстой. Нэр төрд халдах асуудал ч гэсэн хуулиар зохицуулагддаг. Хэрэв тэдгээр нэр бүхий хэвлэл мэдээллийн байгууллага нэр хүндэд нь халдсан гэж үзэж байгаа бол шүүхэд хандаж, асуудлаа шийдүүлэх эрх нь нээлттэй. Тухайн мэдээллийг нийтэд түгээхдээ мөнгөө төлж, зар сурталчилгааны журмаар нийтлүүлсэн бол зар сурталчилгааны хуулиар л асуудал шийдэгдэнэ. Тэгэхээр миний ойлгож байгаагаар зарыг өгсөн байгууллага буюу "Монгол" НD телевиз зартай холбоотой үүссэн нөхцөл байдлыг бүрэн хариуцна. Ер нь ямар ч мэдээллийг нийтэд түгээхдээ эхлээд хуулиа судлах хэрэгтэй гэдгийг сануулах хэрэгтэй байх” гэж хэлэв.

Тэгвэл "Макдоналдс" компанийн манай бүсийг хариуцсан салбараас нэр хүндийг нь ашигласан хэмээн гомдол  гаргах гэж байгаа талаар баттай эх сурвалж мэдээлсэн юм.

  Тодруулбал, "Макдоналдс" компани нь “Монгол HD” телевизээс их хэмжээний ам.доллар нэхэхээр бэлтгэж байгаа талаар эх сурвалж мэдээллээ.  Учир нь тус телевиз нь  "Макдоналдс”-ын нэрийг ашиглахдаа зөвшөөрөл аваагүй юм байна. Тиймээс тэд Олон улсын шүүх болон Оюуны өмчийн газар хандах гэж байгаа аж.

Өөрөөр хэлбэл "Макдоналдс"-ын БНХАУ дахь Азийн бүс нутаг хариуцсан салбараас зөвшөөрөл аваагүй.  Лого, шошго ашиглаж зүй бусаар гутаан доромжилсон сурталчилгаа явуулсан учир ийн тэд шүүхэд өгөхөөр болжээ.

Тэд сэтгүүл зүйг бохир байна гэдгийг илчлэхийн тулд арваад сонин, телевиз, сайтад 400-1 000 000 төгрөгийг нэг өдөрт гаргасан байдаг. Ингэснээр тэд булхайг таниулж, бохирыг ил болгоно гэж бодсон ч юм эсэргээрээ эргэчих шиг боллоо.