Нийслэлийн Онцгой байдлын газар 2013 онд иргэдийг гамшгаас хамгаалах, урьдчилан сэргийлэх, албаны ажил үйлчилгээний чиглэлээр авч хэрэгжүүлсэн үйл ажиллагаагаа дүгнэлээ.

Тайлангийн хурлын үеэр Нийслэлийн Онцгой байдлын газрын даргын зөвлөлийн гишүүд эрхэлсэн ажилдаа амжилт гарган, хамт олноо хошуучлан ажилласан Хөдөлмөрийн аварга -5, 2013 оны Шилдэг хамт олон-1, Шилдэг албан хаагч-11, Нийслэлийн Засаг даргын “Хүндэт жуух”, Нийслэлийн “Тэргүүний ажилтан” , Нийслэлийн Иргэдийн Төлөөлөгчдийн Хурлын “Хүндэт үнэмлэх”, “Хүндэт өргөмжлөл” шагналуудыг гардуулж, 2014 онд иргэдийг гамшгийн аюулаас урьдчилан сэргийлэх, аврах, хор уршгийг арилгах, хойшлуулшгүй сэргээн босгох хуулиар хүлээсэн хүндтэй бөгөөд хариуцлагатай үүргээ нэр төртэйгөөр биелүүлж, эрхэлсэн ажилдаа оюун ухаан,ур чадвар, сэтгэл зүтгэлээ зориулан ажиллахыг хүсэн ерөөж байлаа.

Өнгөрсөн онд  Нийслэлийн Онцгой байдлын газарт аюулт үзэгдэл, техникийн холбогдолтой ослын нийт 3349 дуудлага бүртгэгдсэнээс  аюулт үзэгдэл, техникийн  холбоотой ослын  564, объектын гал түймрийн 2780, ой хээрийн түймрийн  5 дуудлага ирсэн байна.Ирсэн дуудлага бүрт техникийн сааталгүй, тактикийн алдаагүй ажиллаж болзошгүй гамшгийн аюулаас  1747 хүний амь бие,  10 тэрбум 62 сая төгрөгийн эд хөрөнгийг авран хамгаалсан байна.

Улаанбаатар хотын Гамшгаас хамгаалах ерөнхий төлөвлөгөө, Нийслэлийн гамшгаас хамгаалах 16 алба, Дотоодын цэргийн гамшгаас хамгаалах төлөвлөгөөг боловсруулан баталгаажуулж, батлагадсан төлөвлөгөөний дагуу дүүргийн Онцгой байдлын  хэлтсүүд Гамшгаас хамгаалах төлөвлөгөөгөө шинэчлэн боловсруулж улирал бүр тодотгол хийж ажиллалаа.

Нийслэлийн Онцгой байдлын газраас 35 удаагийн Гамшгаас урьдчилан сэргийлэх  шалгалтыг зохион байгуулж нийт 10377 байгууллага аж ахуйн нэгж, 33633 айл өрхөд галын аюулаас урьдчилан сэргийлэх үзлэг шалгалт хийж, гал түймрийн хэрэг зөрчилд хүргэж болзошгүй 55003 зөрчил илрүүлэн, 10655  зөрчлийг үзлэг шалгалтын явцад арилгуулах арга хэмжээ авсан байна.

Мөн аж ахуйн нэгж байгууллага, иргэдэд 7 тэрбум 493 сая 400 мянган  төгрөгийн хохирол учирч,  уурхайн ослоор 8, үйлдвэрийн ослоор 2,  ахуйн ослоор 3,  барилгын ослоор 1, үерт 1,  усны ослоор 5, хүн дарагдсан 1,  гал түймэрт  өртөж  28,  нийт  49  хүн нас барж,   45 хүн түлэгдэж,  ахуйн болон зам тээврийн осолд  бэртэж гэмтсэн 129 хүнд  эмнэлгийн анхан шатны тусламж үзүүлэн, 185  хүнийг эмнэлэгт хүргэж, 80 цогцосыг цагдаагийн байгууллагад шилжүүлж ажилласан байна.

Өнгөрсөн онд тохиолдсон Нарантуул 1, 2 худалдааны төв, Сандэй худалдааны төвүүдэд гарсан гал түймэр , Хан-Уул дүүгийн 10 дугаар хорооны нутаг дэвсгэрт гарсан Мал, амьтны гоц халдварт боом өвчин, Сүхбаатар дүүргийн 6, 8, Баянгол дүүргийн 20 дугаар хороонд гарсан,  сум галт хэрэгсэлтэй холбоотой дуудлагуудаар  нийслэлийн Онцгой байдлын газраас холбогдох арга хэмжээг цаг алдалгүй шуурхай зохион байгуулснаар болзошгүй  аюулаас иргэдийн амь бие, албан байгууллагын өмч хөрөнгийг авран хамгааллаа.

Нийслэлийн Онцгой байдлын  газар,  харъяа анги салбарууд албан хаагчдынхаа ажиллах орчин нөхцлийг сайжруулах чиглэлээр 133 сая төгрөгийн засвар тохижилтын  ажил хийж гүйцэтгэлээ.

Япон улсад үйлдвэрлэсэн "ISUZU" маркийн иж бүрэн тоноглогдсон 840 сая иен буюу 14,2 тэрбум төгрөгийн өртөгтэй 22 машин,  ОБЕГ-аас аврах ажиллагааны тусгай зориулалтын Аса-20 маркийн камаз,  старекс маркийн 3ш, БНСУ-ын буцалтгүй тусламжаар старекс любера маркын 2ш машин,  нийт -28 автомашинаар  автопарк  шинэчлэлт хийснээр гамшгаас хамгаалах чадавхийг  нэмэгдүүлж ажилласан байна.

Нийслэлийн Онцгой байдлын газар, Нийслэлийн Цагдаагийн газартай хамтарсан удирдамжийн дагуу  06 дугаар сарын 20-ны өдрөөс эхлэн Аврах ангийн бие бүрэлдэхүүн Туул голын эрэг дагуу завьт  эргүүл шалгалтыг хийж уер усны аюулаас урьдчилан сэргийлэх сэрэмжлүүлгийг ард иргэдэд хүргэснээр усны ослын дуудлагын тоо 81 хувиар, усанд осолдсон хүний тоо 64,5 хувиар буурсан  үзүүлэлттэй байна.

Мөн Баянзүрх, Баянгол, Сонгинохайрхан, Чингэлтэй, Хан-Уул дүүргийн Онцгой байдлын хэлтсүүд хамтарч Чингэлтэй дүүргийн 19 дүгээр хороо Шадивлангийн зуслангийн ногоон бүсэд, Хан-Уул дүүргийн 10 дугаар хороо Жаргалантын амны тусгай хамгаалалтын бүсэд  ой, хээрийн түймрээс урьдчилан сэргийлэх, түймэртэй тэмцэх нэгдсэн дадлага сургуулийг 2013 оны 5 дугаар сарын 3, 22-ны  өдрүүдэд  төрийн болон хувийн хэвшлийн нийт  12 байгууллага, шуурхай албаны 11 автомашин, 158 ажилтан албан хаагч, 72 ажилчин  нутгийн иргэд  хамрагдсан дадлага сургууль зохион байгуулж хуурайшилт ихтэй өдрүүдэд эргүүл, пост гаргаж ажиллуулсны үр дүнд ой, хээрийн  түймрийн дуудлагын тоо өмнөх оноос өсөөгүй эерэг үзүүлэлттэй гарсныг онцлон тэмдэглэж байна.