Монголын Үндэсний Бөхийн Холбоо үзэгчидтэй "дайн" зарлажээ.

Тэд бөхийн дэвжээ рүү ус, ундааны сав шиддэг асуудлыг "фашист" аргаар дарахаар шийдсэн байна. Тухайлбал бөхийн хорхойтон та дараагийн барилдаанаас эхлэн Бөхийн өргөө рүү ус, ундаа авч орж болохгүй. Мөн Бөхийн өргөөг бүрэн камержуулсан учир та ямар нэгэн зүйл шидвэл бөх үзэх эрхээ хасуулж мэдэх юм.

Энэ хэргийн учир зангилааг эхнээс нь тайлбал өнгөрсөн долоо хоногийн амралтын өдөр болсон "Богдхан хайрханы хишиг" барилдаанд шөвгийн дөрөвт үлдсэн улсын харцага Ц.Содномдорж, улсын гарьд Д.Рагчаа нарын барилдаан маргаантай болж улмаар бөхийн хорхойтнууд эсэргүүцлээ илэрхийлж уусан ундаа усныхаа сав лаазыг дэвжээ рүү шидчихжээ. Угаас жилийн жилд яригддаг дээрх асуудлыг энэ  барилдаанаас хойш таслан зогсоохоор  Монголын Бөхийн холбооны тэргүүн Р.Нямдорж хатуу шийдсэн юм байх.

Тэрээр энэ талаар “Манай холбоо энэ тал дээр хатуу байр суурь баримтлана. Дээрх болчимгүй үйлдлийг зогсоож болох юу байна түүнийг нэвтрүүлэх болно. Тухайлбал энэ сарын 29-нд болох барилдаанаас эхлэн ус, ундаатай үзэгчийг бөхийн өргөө рүү нэвтрүүлэхгүй байхаар тогтсон. Үзэгчид маань уух зүйлээ заалан дотроос аягаар худалдан авдаг болно. Мөн Монгол бөхийн өргөөний тодорхой хэдэн цэгт камер суурилуулсан. Үүний тусламжтайгаар  хог, лааз шиддэг этгээдийг илрүүлэх юм. Ингээд ч зогсохгүй тэднийг хэн бэ гэдгийг нь олж тогтоон дараагийн барилдаанд оруулахгүй байхаар арга хэмжээ авна” гэжээ.

Спортын ертөнцөд талуудын маргаан, үзэгчдийн бухимдал бол энгийн үзэгдэл. Сонирхолтой байлгая гэвэл бүр байх ч ёстой зүйл. Энд би дэлхийн хамгийн олон үзэгчтэй спорт хөлбөмбөгийн фанатуудыг жишээ болгомоор байна. Тэдэнд ус, ундааны сав шидэх бол энүүхэнд. Хайртай баг, тамирчдынхаа эсрэг ямар ч үйлдлийг фанатууд таслан зогсоохоор тэмцдэг. Бүр хоорондоо зодолддог. Тэглээ гээд тэднийг ус, ундаа уухыг хориглож, хөлбөмбөг үзэх эрхийг хассан шийдвэр хэзээ ч гарч байгаагүй.

Бөхийн хорхойтнууд дээрх шийдвэрийг байж боломжгүй зүйл хэмээн үзэж байгаа бөгөөд ингэхээр бөх үзэх хүн олдохгүй хэмээн бухимдацгааж байна. Ингээд зогсохгүй энэ спортыг хөгжүүлэх үүрэг хүлээдэг Монголын Үндэсний бөхийн холбоо эсрэгээрээ үзэгчгүй болгох алхам хийсэнд дургүйцэж, тус холбооны тэргүүн Р.Нямдоржийг огцрох ёстой гэж үзэх хүмүүс ч байгаа юм.

Үнэхээр ч МҮБХ үзэгчдийг фашист аргаар дөнгөлж байхын оронд барилдааныг шударга явуулахад анхаарч ажиллавал илүү дээргүй юу.