Хууль сахиулах бодлогын хэрэгжилтийг зохицуулах газрын дарга Г.Оюунболдоос цагдаагийн албаны хууль болоод дотоодын цэргийг татан буулгах асуудлаар ярилцлаа.

-Цагдаагийн албаны тухай хуулийн хэрэгжилт хэр байна ?

- Цагдаагийн алба бол Монгол улсад буй хамгийн том агентлаг. Цагдаагаас өөр том агентлаг манай улсад байхгүй шүү гэдгийг ойлгох хэрэгтэй. 8000 хүнтэй нэг агентлагыг ганцхан өдөрт өөрчлөнө гэж байхгүй.  Хамгийн багадаа найман жил үргэлжилнэ.  Хууль хэрэгжүүлнэ гээд маргааш нь үр дүнг нь харах гээд, буруу явж байна гэж шүүмжлээд байдаг нь их учир дутагдалтай зүйл. Тухайлбал, удахгүй таван жил суманд ажилласан цагдаад 30 сарын цалингийн хэмжээний нэмэгдэл өгөх журам нь батлагдах гэж байна.  Гол нь хэрэгжиж эхлэж буй хоёр гуравхан сарын хугацаанд буруу зөрүү ойлгож тайлбарлах, яаран дүгнэлт хийхэд арай эрт байна.

-Дөрөвдүгээр сараас Дотоодын цэргийг ЦЕГ-тай нэгтгэнэ гэсэн. Энэ талаар?

-Дотоод цэрэг гэдэг ойлголт дөрөвдүгээр сарын 1-нээс байхгүй болно. Гэхдээ татан буугдах биш шилжиж байгаа хэрэг. Дотоодын цэргийн тухай хууль хүчингүй болж буйтай холбоотойгоор нь цагдааруугаа шилжинэ. Өмнө нь байсан энэ бүтэц олон нийтийн аюулгүй байдлыг хангах албанд харьяалагдан ажиллана гэсэн үг. Угаасаа дотоодын цэргийн албан хаагчид чинь цагдаагийн алба хаагчид шүү дээ. Үүнтэй холбоотойгоор 1000 орчим хүнийг сургах нүсэр ажил явагдаж байна. Өөрөөр хэлбэл тэд цэргийн дэг, цэргийн хуулиар явдаг байсан бол одоо цагдаагийн хуулиар үүрэг хүлээнэ гэсэн үг. Тэгэхээр эдгээр хүмүүсийг цагдаагийн албан хаагчийн ёс зүйд сургахаас гадна ёс зүйн мэдлэг  эзэмшүүлэх шаардлагатай болж байна.  Үе шаттайгаар сургах шаардлагатай байна. Дотоодын цэргүүд цагдаагийн алба хаагчид болсоноор иргэнтэй харьцаж, үүрэг хүлээх болно. Тэгэхээр иргэнтэй зөв харьцах дадалд сургах шаардлагатай байгаа. Ийм зүйлгүйгээр цэрэг хүний үүднээс иргэнтэй харьцаж болохгүй. ЦЕГ энэ ажлыг хийгээд явж байна.