Улсын ерөнхий прокурорын газрын дэргэдэх “ Сургалт, судалгааны төв”-өөс прокурор, ажилтнуудын  магистр, докторын зэрэг хамгаалсан болон одоо суралцаж байгаа судалгааг улсын хэмжээнд авч нэгтгэлээ.

Прокурорын байгууллагад доктор 2, магистр 169 ажиллаж байгаа бол одоо доктрантурт 7, магистрантурт  133 прокурор ажилтан тус тус суралцаж байна. Доктор, магистр хамгаалсан сэдвийг судалгаанаас ангилж үзвэл үндсэн хуулийн эрх зүйгээр 3, эрүүгийн эрх зүйгээр 34, эрүүгийн байцаан шийтгэх эрх зүйгээр 26, прокурорын хяналтын чиглэлээр 13, бусад сэдвээр 95 прокурор, ажилтан хамгаалсан байна.

Прокурор Б.Өнөрмаа ХБНГУ-ын Триерийн их сургуульд, УЕПГ-ын ахлах референт Г.Ууганболор БНХАУ-ын ӨМИС-д докторын зэрэг, Нийслэлийн Прокурорын газрын хяналтын прокурор У.Эрдэнэтуяа БНСУ-ын Хандуны Хуулийн сургуульд, хяналтын прокурор М.Батжаргал Тайвань улсын Минг Чуны их сургуульд, Дүүргийн 1-р Прокурорын газрын хяналтын прокурор Д.Уянга Англи улсын Ноттеигем-Трентийн их сургуульд магистрийн зэрэг тус тус хамгаалсан бол Оросын Холбооны Улсад 17 прокурор магистрийн зэрэг хамгаалжээ.

Судалгааг нэгтгээд Сургалт, судалгааны төвөөс доктор, магистр хамгаалсан прокурор, ажилтнууд болон одоо суралцаж байгаа прокурор, ажилтнуудын дунд эрдэм шинжилгээний бага  хурал, төрөл бүрийн хэлэлцүүлэг, уралдаан зохион байгуулах, одоо суралцаж байгаа прокурор ажилтнуудад  судалгаа хийх аргачлал, үндэслэлийн  талаар их, дээд сургуулиудын эрдэмтэн багш нараар хичээл заалгаж, зааварчилгаа, зөвлөгөө өгөх ажлыг шат дараатайгаар зохион байгуулахаар төлөвлөжээ.