Хүний бие организм цаг агаар, улирлын өөрчлөлтөд янз бүрээр хямарч байдаг. Өвөл, зун хоёр харьцангуй тогтвортой цаг агаартай улиралууд бол хавар намрын улиралд хүний бие ирж буй цаг агаарын өөрчлөлтөд дасан зохицох шаардлага гардаг байна.

"Хавар цагийн хямрал" дараах шинж тэмдэгүүдтэй. Үүнд:

-Өвлийн хүйтэн улирлыг даван туулахад хүний бүх «нөөц» дуусч, түүний нөхөн сэлбэлт үгүй болно. Иймээс л бие суларч, дархлаа буурдаг бөгөөд үүний үр дүнд архаг хууч  өвчин эмгэгүүд сэдэрдэг аж.

-Хүмүүс өвөл цагаар дасгал хөдөлгөөн хийх нь багасдаг. Ингэснээр хөдөлгөөний дутагдалд орж ядарч сульдах, нозоорох, булчин, үе мөчөөр өвдөх гэх зэрэг шинж тэмдэгүүд илэрдэг байна.

-Атмосферийн даралтын огцом өөрчлөлтөөс болж  толгой өвдөх, бие эвгүй оргих, даралт ихсэх, багасах байдал ажиглагддаг.

-Дээр хэлсэнчлэн хахир хатуу өвлийг давахын тулд хамаг л нөөцөө барсан хүний бие организм амин дэмийн дутагдалд ордог аж. Амин дутагдалд орсноор нойр хүрэх, ажлын чадвар буурах, ядрах гэсэн шинж тэмдэгүүд илэрдэг байна.

Хэрэв таньд "Хавар цагийн хямрал" нүүрлэсэн гэж үзэж байвал дараах зөвлөгөөг хэрэгжүүлээд үзээрэй.

    1. Ихэнх хүмүүс хавар болохоор турж жингээ хасахаар хоолны дэглэм барьж эхэлдэг. Гэтэл эсрэгээрээ хавар хоолныхоо орц , нэр төрлийг олшруулж 3-4 удаа хооллох хэрэгтэй. Харин амттан, өөх тосноос татгалзаарай.

    2. В группын витаминууд таны тайван бус байдлыг багасгаж, мэдрэлийн системийг хэвийн байдалд оруулахад туслахаас гадна, арьс үсний өнгийг сэргээж өгнө. Энэ төрлийн витаминыг та мах, аарц, бяслаг, соёолсон улаан буудай, шинэхэн  навчит ногооноос  (яншуй, шанцай гэх мэт) авах болно.

    3. Нойр хүрч нозоорох, ханиад томуу хүрэх нь С витамины дутагдлаас шалтгаалдаг. С витаминыг нохойн хошуу, нэрс, чацаргана, цитрусын төрлийн жимс болох лимон, жүрж мөн дарсан байцаа зэргээс та их хэмжээгээр авах боломжтой.

    4. Эхлээд халуун дараа нь хүйтэн шүршүүрт ор, эсвэл дуртай хөгжмөө сонсож дасгал хийсэн ч болно.

    5. Тод гэгээтэй өнгийн хувцас өмсөж өөрөө өөртөө өнгөний эмчилгээ хийгээрэй.

    6. Аль болох алхаж явахыг хичээ.

   7. Түр амсхий. Ажлын цагаар «түр завсарлага» хийгээрэй багахан хэмжээний дасгал хийх, хэсэгхэн хугацаанд цай, кофе ууж  хамт ажиллагсадтайгаа «дэмий ярих» эсвэл коридороор алхах гээд юу ч байж болно.

   8. Амттан идэх. Банан эсвэл хэсэгхэн шоколаданд таны сэтгэл санааг сэргээх гайхалтай хүч нуугдаж байдагийг та мэдэх үү? Учир нь эдгээр бүтээгдэхүүнд антидепрессант болох триптофан агуулагддаг.

    9. Хаврын улиралд тохиолдох сэтгэлийн хямралын шатгааныг шинжлэх ухааны зүгээс бүрэн төгс тайлбарлаагүй ч хэрэв ийм хямрал нэг сараас дээш хугацаанд үргэлжлэх эсвэл жилээс жилд байнга удаан хугацаагаар давтагдаж байвал та заавал эмчид хандаарай.

    10. Хэрэв та ходоод гэдэсний ямар нэгэн эмгэгтэй бол энэ улиралд  хооллолтондоо заавал анхаарах хэрэгтэй. Учир нь хавар ходоодны шарх үрэвсэл сэдрэх магадлал өндөртай байдаг.

24tsag.mn