"Буянт -Ухаа" хороололд орон сууц худалдан авах хүсэлтэй иргэдийг өнөөдрөөс эхлэн ТҮЦ машинаар бүртгэж эхэллээ. Засгийн газраас 1 м.кв нь 1.280.000 төгрөг гэж зарласан энэхүү хороололд орон сууц худалдан авах ажиллагаа 2 үе шаттай бөгөөд шаардлага хангасан иргэд юуны түрүүнд ТҮЦ машинд бүртгүүлэх юм.
ТҮЦ машинд бүртгүүлэхдээ:
Иргэд Улаанбаатар хотод болон аймгийн төвүүдэд байгаа ТҮЦ машинд байршуулсан “Орон сууцны захиалга” гэсэн цэсээр дамжуулан бүртгүүлнэ. /Бүртгүүлэхдээ иргэний цахим үнэмлэхтэйгээ очих ёстойг анхаарна уу/
ТҮЦ машин иргэдийг бүртгэхдээ иргэний бүртгэлтэй холбоотой мэдээллийг мэдээллийн сангаас шүүн бүртгэх бөгөөд хэрэв тухайн иргэн шаардлагад нийцээгүй бол машин автоматаар татгалзсан хариу өгөх аж.
Мөн та бүртгүүлэхдээ асуулгын дагуу үнэн зөв хариулж бүртгүүлэх ёстой. Эс тэгвэл таныг бүртгэлээс хасах юм.
Хэрэв та ТҮЦ машинд амжилттай бүртгүүлсэн бол бүртгэлийн хоёр дахь шатны ажиллагаа эхэлнэ. Үүнд ТҮЦ машинд бүртгүүлсэн иргэдийн мэдээллийг шалгаж шаардлагатай бол хасах, хүсэлт гаргасан иргэдээс сугалаанд хамрагдах иргэдийн нэрсийн жагсаалтыг гаргах, энэхүү жагсаалтаас орон сууц худалдан авах эрх хожигчийг сугалаагаар тодруулах зэрэг багтана.
ТҮЦ машины бүртгэлийн ажиллагаа дууссаны дараа дор дурдсан мэдээллийг холбогдох эрх бүхий байгууллагуудын мэдээллийн сангаас шүүлт хийн шалгаж, сугалаанд оролцох эрх бүхий хүсэлт гаргагчдын нэрсийн тодруулж, тухайн иргэнд нь мэдээллэх гэнэ.
Үүнд:
- хүсэлт гаргагч иргэн өмнө нь болон одоо орон сууц эзэмшиж байсан болон байгаа эсэх,
- банк санхүүгийн байгууллагад орон сууцны зээлтэй эсэх,
- банк санхүүгийн байгууллагад чанаргүй зээлийн өртэй эсэх,
- нийгмийн даатгалын шимтгэлийг сүүлийн 2 жил тасралтгүй төлж байсан эсэх,
- төрийн албан хаагчийн хувьд төрийн байгууллагад ажиллаж байгаа эсэх.
- Хөгжлийн бэрхшээлтэй иргэдийн хувьд Засгийн газрын журманд заасан шаардлагад нийцэж байгаа эсэх
Хэрэв ТҮЦ машины бүртгэл болон 2 дахь шатны нягтлан шалгах ажиллагаагаар үндэслэлгүйгээр бүртгэлээс хасагдсан гэж үзэж байгаа иргэн байвал гомдлоо энэ сарын 30-ний өдрийн дотор ТОСК-ийн Хуулийн хэлтэст бичгээр гаргаж болох бөгөөд Засгийн газрын журмын шаардлагыг бүрэн хангаж байгаагаа нотлох бичиг баримтыг хавсарган ирүүлэх аж.
Захиалгын хүсэлт гаргасан иргэдийн мэдээллийг бүрэн шалгаж дууссаны дараа сугалаанд оролцох нэрсийг эцэслэн гаргах бөгөөд үүний дараа сугалааг явуулах хугацаа, журмыг олон нийтэд мэдээллэх юм байна.
ТҮЦ машин бүртгэл энэ сарын 24-ний өдрийн 18 цаг хүртэл явагдана.
Улаанбаатар дахь ТҮЦ машины байршил
Баянзүрх дүүрэг | Хороо | Байршил |
14-р хороо | Сандэй худалдааны төв | |
18-р хороо | Офицеруудын ордон | |
23-р хороо | Хужирбулан /Дэлгүүр/ | |
Баянгол дүүрэг | 7-р хороо | Төв вокзал |
Сонгинохайрхан дүүрэг | 20-р хороо | Орбитын эцэс /дэлгүүр/ |
11-р хороо | Хөтөлийн буудал /дэлгүүр/ | |
16-р хороо | 32-ын буудал, Миний дэлгүүр | |
31-р хороо | СХД-ийн 31-р хорооны байр | |
Сүхбаатар дүүрэг | 12-р хороо | Мэдээлэл технологийн үндэсний парк |
1-р хороо | 32-ын тойрог Номин худалдааны төв | |
Төв шуудан | ||
Хан-Уул дүүрэг | 2-р хороо | Хан-Уул дүүргийн үйлчилгээний төв |
10-р хороо | Чингис хаан ОУНО буудал | |
8-р хороо | Яармагийн дэнж /дэлгүүр/ | |
Чингэлтэй дүүрэг | 11-р хороо | 17-ын дэлгүүр |
4-р хороо | Тэнгис кино театр | |
18-р хороо | 7 буудлын эцэс худалдааны төв | |
| ||
