Жил бүрийн гуравдугаар сарын 15-ныг дэлхий нийтээр “Хэрэглэгчийн эрх ашгийг хамгаалах өдөр” болгон тэмдэглэдэг.  НҮБ-аас энэ өдрийг 1985 онд анх зарласан байдаг. ШӨХТГ-ын хувьд энэ өдрийг гурав дахь жилдээ албан ёсоор тэмдэглэн өнгөрүүлж байгаа. Тэгвэл тэд энэ жилийн хувьд “Үүрэн телефоны хэрэглэгчдийн эрх ашгийг хамгаалъя” гэсэн уриатай ажиллаж байна.

Өнөөдөр дэлхийн хэмжээнд 7 тэрбум гаруй хүн гар утас хэрэглэж байгаа. Харин манай улсаас ч багагүй хүн гар утас хэрэглэж, түүнийхээ ашиг шим, хор уршгийг мэдэрч байдаг. Тиймээс ШӨХТГ-аас үүрэн телефоны оператор компаниудын үйл ажиллагаанд хяналт тавьж, шударга өрсөлдөөнийг бүрдүүлэх чиглэлээр тодорхой ажлуудыг хийсээр байгаа.

Олон улсын хэрэглэгчийн эрх ашгийг хамгаалах байгууллагаас энэ өдрийг тохиолдуулан таван үндсэн чиглэлээр зөвлөмж гаргасан байна. Эдгээр нь Монголд өнөөдөр тулгамдаж буй асуудлууд юм.

Нэгд, гэрээний эрх, үүргийн асуудал байна. Хэрэглэгч бүхэн компанитайгаа гэрээ байгуулдаг. Энэ нь эрх тэгш гэрээ байж чадаж байна уу, үгүй юү гэдгийг эргэж харах хэрэгтэй байгаа юм. Компаниуд иргэдтэй гэрээ байгуулахдаа зөв мэдээлэл өгч байна уу гэдэг чухал. Учир нь иргэд мэдээлэл дутмагаас болоод хохирох явдал гардаг.

 Хоёрт, үйлчилгээний чанарыг сайжруулах хэрэгтэй. Манай улсад энэ талын зөрчлүүд ихээр гардаг. Адаглаад гар утасны сүлжээ тасардаг явдал бий.

Гуравт, төлбөр тооцоог үнэн зөв хийх. Компаниуд төлбөр тооцоон дээрээ шударга хандах нь чухал байна. Багцын үйлчилгээ гэх зэрэг үйлчилгээний төрлүүдэд дутагдалтай зүйл гарч байгаа.

 Дөрөвт, хэрэглэгчийн хувийн нууцыг хамгаалж чадаж байна уу гэдэг асуудалд анхаарах хэрэгтэй байна. Нууцыг хангах нь иргэдийн хууль ёсны эрхийн асуудал юм. Цаашлаад төрийн нууцтай хамааралтай ч зүйл гардаг.  Манайд гадаадын хөрөнгө оруулалттай үүрэн телефоны компаниуд бий. Энд мэдээллийн аюулгүй байдал, хамгаалалт зайлшгүй чухал юм.

Тавд, иргэдийн санал, гомдолыг чирэгдэлгүй, шуурхай барагдуулдаг байхыг зөвлөж байна.

Гагцхүү энэ зөвлөмжийн дагуу ШӨХТГ ажлаа явуулж, зөрчлийг багасгах тал дээр анхаарах юм.