Мэргэжлийн хяналтын ерөнхий газар, Харилцаа холбооны зохицуулах хороо /ХХЗХ/ хамтран энэ онд хийж хэрэгжүүлэх ажлынхаа төлөвлөгөөг баталлаа. Төлөвлөгөөнд тусгагдсанаар хяналт шалгалт, хууль эрх зүйн орчин боловсронгуй болгох, сургалт семинар зохион байгуулах гэсэн гурван чиглэлээр найман ажил зохион байгуулах юм. Сүүлийн үед радио давтамжийн хэрэглээ, нөлөөлөл ихэссэн, нийслэлд эфирийн телевизийн чанартай холбоотой иргэдийн гомдол нэмэгдэж байгаа, шинээр баригдаж буй барилга байгууламжинд шугамын худаг, сувагчлал зэрэг тулгамдаж буй асуудлуудын талаар энэ үеэр яригдлаа.

Ялангуяа барилга байгууламжийг шинээр төлөвлөж, барихдаа сүлжээний худаг, сувагчлалыг хангалттай шийдэж өгдөггүй. Ингэснээр тухайн байранд шинээр кабелийн телевизийн үйлчилгээ оруулахдаа хана, тааз, шал нүхлэдэг байна. Энэ нь холбогдох стандарт, дүрэм журам хуучирсантай холбоотой хэмээн ХХЗХ үзэж байгаа аж.

ХХЗХ-нд Мэргэжлийн хяналтын улсын байцаагчийн зургаан эрх байдаг. Эдгээр байцаагчдын үнэмлэхийн мөн гардуулан өглөө. МХЕГ-ын даргын үүргийг түр орлон гүйцэтгэгч Д.Батмөнх улсын байцаагчийн эрхтэй хүн бүр Мэргэжлийн хяналтын байгууллагын хэрэгжүүлж буй шинэчлэлийн бодлоготой уялдаж ажиллаж, хааж, торгох биш зөвлөн туслаж, хөгжлийг дэмжин, хүндээ хүрч ажиллахыг хүсэв.