Монголын Хуульчдын Холбооны Прокурорын Хорооны анхдугаар хурал өнөөдөр онлайн системээр улсын хэмжээнд болж өндөрлөлөө.

Прокурорын хорооны анхдугаар хуралд Монголын хуульчдын холбооны Ерөнхийлөгч Д.Батсүх, Прокурорын хорооны удирдах зөвлөлийн гишүүд, Улс, аймаг, нийслэл, тээвэр, дүүрэг, сум дундын прокурорын газруудад ажиллаж байгаа нийт прокурорууд оролцлоо.

Прокурорын хорооны хуралдааныг Улсын Ерөнхий Прокурорын туслах, Тамгын газрын дарга, Прокурорын Хорооны удирдах зөвлөлийн дарга Б.Үнэнбат нээж “Прокурор хорооны дүрэм-ийн нээлттэйгээр хэлэлцэн батлах гэж буйг танилцууллаа.

Хуульчийн эрх зүйн байдлын тухай хуульд заасны дагуу Прокурорын хорооны удирдах зөвлөлийн гишүүнээр 12 прокурор сонгогдон ажиллаж байгаа бөгөөд Прокурорын хорооны гишүүнээр улсын хэмжээнд ажиллаж байгаа 465 прокурор бүртгэгдсэн байна.

Хуралдаанд оролцсон Монголын хуульчдын холбооны ерөнхийлөгч Батсүх хэлсэн үгэндээ:  Прокурорын хороо нь анхдугаар хурлаа шинэлэг хэлбэрээр хийж байгаа нь  сайшаалтай байна. Хурлаар хэлэлцэх асуудалд санаачлагатай хандаж ажиллах нь чухал. Прокурорын хороо нь хуульчдын эрх зүйн байдлын тухай хуульд заасан сайн дурын 13 хорооны нэг юм. Тиймээс өөрийн дүрмээ сайтар боловсруулж батлах шаардлагатай“ гэдгийг онцлон тэмдэглэсэн бол Улсын Ерөнхий Прокурорын орлогч, Прокурорын хорооны Удирдах зөвлөлийн гишүүн Г.Эрдэнэбат “Эрх зүйн шинэчлэлийн хүрээнд Прокурор шинэчлэн өөрчлөгдөж байна. Прокурор хэрхэн хараат  бус байдлаар ажиллаж байна. Шударга ёсыг тогтооход хэрхэн нөлөөлж ажилласан гэдгээр олон нийт биднийг үнэлж дүгнэх болно. Прокурор гэмт хэргийн тухай гомдол мэдээллийг хүлээн авсан үеэс нь эхлэн ЭБШ ажиллагааны бүхий л үе шатанд хяналт тавьж ажиллаж байгаа нь та биднээс ихээхэн үүрэг хариуцлага шаардаж байна. Иймд өнөөдрийн хуралдаанаар хэлэлцэж байгаа асуудал нь Прокурорын хорооны гишүүдийн үүрэг хариуцлага, шинэчлэлд бодит нөлөө үзүүлсэн алхам болох учиртай“ гэдгийг цохон тэмдэглэлээ.

Харин Прокурорын хорооны удирдах зөвлөлийн гишүүн, Нийслэлийн прокурор Б.Баторших “Прокурорын хорооны анхдугаар хурлыг зохион  байгуулан хийж байгаа нь чухал ач холбогдолтой юм. Прокурор аливаа асуудалд үгээ чөлөөтэй хэлж санал бодлоо илэрхийлж байх нь чухал байдаг. Прокурорын хороо прокурорын эрх ашгийг хуулийн дагуу хамгаалж ажиллах шаардлагатай байгаа. Түүнээс гадна прокуроруудад тавигдах шаардлага өөрчлөгдөж байна. Прокурорууд дэлхийн  жишигт нийцсэн мэдлэгт тулгуурлан үйл ажиллагаагаа явуулах шаардлага ч мөн тавигдаж байна. Тиймээс энэ шаардлагад нийцсэн сургалтыг зохион байгуулах нь зүйтэй гэж үзэж байгаа юм. Прокурорын хорооны анхдугаар хуралд идэвхитэй оролцож өөрсдийн байр сууриа илэрхийлэн ажиллах чухал гэлээ.

Прокурорын хорооны анхдугаар хурлын эхэнд Прокурорын хорооны удирдах зөвлөлийн гишүүн Тээврийн прокурорын орлогч Н Батмөнх  Прокурорын хорооны дүрмийн төслийн талаар дэлгэрэнгүй танилцуулга хийсэн бөгөөд танилцуулгатай холбогдуулж аймаг, нийслэл, тээвэр, дүүрэг болон сум дундын прокурорын газарт ажиллаж байгаа прокурорууд дүрмийн төслийн талаар болон шинээр нэмэх, хасах заалтын талаар 25 санал гаргасныг Прокурорын хорооны дүрмийн төсөл боловсруулах ажлын хэсэг нэг бүрчлэн нарийвлан судлаж үзээд 15 саналыг дүрэмд нэмж тусгахаар шийдвэрлэлээ.

Анхдугаар хуралд  484 прокурор оролцохоос 384 прокурор буюу нийт прокурорын 85 хувь нь оролцож, дүрмийн төсөлд харьяа прокурорын газруудаас гаргасан саналыг тоолон бүртгэх тооллогын комиссийг байгуулж ажилууллаа.

Прокурорын хорооны анхдугаар хурлын явцад Прокурорын хорооны дүрмийн төслийн талаар онлайн системээр нээлттэй байдлаар санал хураалт явуулахад санал хураалтанд оролцвол зохих 381 прокуророос 372 прокурор Прокурорын Хорооны дүрмийг батлах талаар санал гаргаж 100 хувийн саналаар Прокурорын хорооны дүрмийг баталж, Прокурорын анхдугаар хорооны тогтоолыг батлан гаргалаа.

Прокурорын хорооны анхдүгаар хурал шинэлэг хэлбэрээр, нээлттэй, ажил хэрэгч байдалд болж өндөрлөлөө.