Нийслэлийн Засаг дарга бөгөөд Улаанбаатар хотын захирагч Э.Бат-Үүл өнөөдөр сэтгүүлчидтэй зангиагүй уулзалт хийж, “Найрсаг Улаанбаатар” хөтөлбөрийн талаар танилцууллаа. Найрсаг Улаанбаатар хөтөлбөр нь 2014-2020 оны хооронд хэрэгжих бөгөөд хоёр үндсэн зорилготой юм байна. Тухайлбал “Монгол туургатны соёлын аялал жуулчлалын төв”, “Бизнес аялал жуулчлалын төв” болох зорилт тавьжээ. Энэ хоёр зорилгоо хэрэгжүүлэхийн тулд “Сэтгэл татам Улаанбаатар”, “Өрлөг түүхт Улаанбаатар”, “Найрсаг Улаанбаатар” гэсэн дэд хөтөлбөрүүдийг хэрэгжүүлэх юм байна. 

Нийслэлийн иргэд гэр бүлээрээ, хамт олон, найз нөхдөөрөө идэвхтэй амрах орчныг бүрдүүлж, сонгодог урлагийг хотын аялал жуулчлалын гол бүтээгдэхүүн болгон сурталчилж, соёл урлаг, үзвэр үйлчилгээний газруудын менежментийг сайжруулах юм байна. Түүнчлэн Үндэсний их баяр наадмыг 7-14 хоногийн хугацаанд үргэлжилдэг мега эвент болгон өргөжүүлж Монгол туургатны соёл, спортын наадам гэсэн агуулга хэлбэрээр зохион байгуулдаг болох аж. Мөн Олон улс, тив, дэлхийн хэмжээний урлаг, спортын тоглолт, наадмуудыг жилийн турш зохион байгуулах юм байна.

Харин “Өрлөг түүхт Улаанбаатар”-ын хүрээнд Монгол наадам цогцолбор, Гандангийн дэнжийг соёлын дүүрэг болгож, Усан парк, амьтны хүрээлэн, Их Майдар цогцолбор, Зайсан цогцолбор, Түмэн хишигтэн цогцолборыг шинээр байгуулах юм байна. Харин архитектурын өвөрмөц шийдэлтэй, дурсгалт газруудыг сэргээн засварлах, хотын түүхтэй холбогдох онцлог газруудыг тэмдэгжүүлэх, тохижуулах, жуулчдад ээлтэй мэдээллийн дэд бүтэц, тохижилт, Жуулчны гудамжны тохижилт, соёлын аялал жуулчлалын үзмэр бүхий амралт, аялал жуулчлалын цогцолборуудыг барьж байгуулах юм байна. Мөн нийслэлийн Налайх дүүрэгт “аялал жуулчлалын жишиг суурин” байгуулахаар төлөвлөжээ. Хотын аялал жуулчлалын онцгой үзмэр, түүх соёлын дурсгалт газруудыг олон улсын түвшинд хүргэж тохижуулах ажлыг хийх аж.

Гандангийн дэнжийг шашин, соёл, гар урлалын дүүрэг болгон хөгжүүлэх зорилт тавьжээ. Харин “Монгол наадам” цогцолборыг аялал жуулчлалын хотхон болгон өргөжүүлэх юм байна. Мөн жуулчдыг татахад нөлөөлдөг зүйл бол үйлчилгээний ажилтнуудын зан харьцаа байдаг. Тиймээс “Инээмсэглэх Монгол - Найрсаг УБ” аяныг зохион байгуулж нийслэлийн иргэд, нийтийн болон төрийн үйлчилгээнийхэн хамрагдах юм байна. Мөн HUB буюу урамшууллын хөтөлбөрийг хэрэгжүүлэх аж.

2030 он гэхэд нийслэл хот 5 сая жуулчин хүлээн авах томоохон зорилт тавьж байгаа аж. Сүүлийн үед дэлхийн нийтийн жуулчдын хандлага Ази, номхон далайн бүс рүү чиглэж байгаа гэсэн судалгаа гаргажээ. Дэлхийн хүн амын өсөлт, техник, технологийн дэвшилттэй холбоотой жуулчдын тоо нэмэгдсэн байна.

Нийслэлийн Аялал жуулчлалын газрын дарга Э.Баттулгаас зарим зүйлийг тодрууллаа.

-“Найрсаг Улаанбаатар” хөтөлбөрийг хэрэгжүүлэхэд үйлчилгээний ажилчдын зан харьцааг өөрчлөх ихээхэн шаардлагатай байна. Энэ жилээс эхлээд энэ тал дээр ямар арга хэмжээ авч байгаа вэ?

-Энэ жил “Сайн байна уу, Баярлал, Уучлаарай” гэсэн нэртэй сургалтуудыг явуулна. Эдгээр ажил маань төрийн үйлчилгээнээс эхэлнэ. Дараа нь үйлчилгээ, нийтийн тээвэр, худалдааны үйлчилгээнд нэвтрүүлнэ.

-Жуулчдын аюулгүй байдлыг хангах талаас ямар арга хэмжээ авах вэ?

 -2013 онд жуулчдын эсрэг үйлдэгдсэн гэмт хэрэг зөрчлийн тоо 4,3 хувиар өссөн байгаа юм. Эдгээр зөрчлийн 80 орчим хувь нь нийслэл хотод болсон. Ялангуяа халаасны хулгай, хүний бие махбодид санаатайгаар гэмтэл учруулах, дээрэмдэх, танхайрах гэсэн хэргүүд зонхилж байгаа. Дэлхийн эдийн засгийн форумаас гаргасан судалгаагаар өнгөрсөн жил манай улс гадаадын иргэдэд хамгийн таагүй ханддаг 10 орны нэгээр нэрлэгдсэн. Дээр нь жуулчдын ихэнхи нь хэрэглэдэг хөтөч ном байдаг. Энэ номонд Улаанбаатар хотын жуулчдын аюулгүй байдал талаас нь анхааруулсан хэд, хэдэн зүйл бичигдсэн байна лээ. Тухайлбал Улаанбаатар хотод цагдаагаас тусламж хүссэний хэрэггүй. Халаасны хулгайчаас болгоомжил, мөн согтуу залуучуудаас болгоомжил гэж анхааруулсан байдаг. Тэгээд төгсгөлд нь жуулчид аль болох Улаанбаатар хотод нь олон хонолгүйгээр хөдөө орон нутгийг зориорой гэж бичсэн байдаг. Харин 100 жилийн өмнө хамгийн ядуу монгол айл ч гэсэн жуулчдыг элэгсэг дотноор хүлээж аваад эрвийх, дэрвийхээрээ дайлах болно. Ёсыг нь дагавал гэр нь танайх гэж ярьж байсан байгаа юм. Мөн Майский Монголд ууртай эрэгтэй хүнийг харна гэдэг боломжгүй зүйл гэж ярьж байсан байгаа юм. Тэгэхээр жуулчдын аюулгүй байдал талаас нь анхаарах, цагдаагийн байгууллагатай хамтарч ажиллана.

-Жуулчдын хажуугаар цагаачлах хүчнийхэн орж ирээд байдаг. Энэ асуудлыг хэрхэн зохицуулах вэ?

-Хотын дарга Э.Бат-Үүл: Жуулчин гэж яагаад яриад байгаа вэ гэхээр жуулчин хэзээ ч харладаггүй. Манайд жуулчин, цагаач хоёрыг хольж ойлгоод байгаа юм. Энэ дээрээ арга хэмжээг авдаггүй. Аялал жуулчлалын компаниуд тухайн оронд жуулчин үлдээсэн бол дахиад тэр орны жуулчныг авахгүй. Тэгэхээр компаниудын бизнес алдагдалд орно шүү дээ. Тийм учраас жуулчдаа үлдээхгүй. Хууль бусаар орж ирж цагаачлаад байгаа хүмүүс аюул учруулаад байгаа. Үүнийг бид цэгцлэх ёстой. Маш их жуулчин орж ирж байгаа үед хүчний байгууллагаа бэхжүүлнэ. Олон жуулчин орж байгаа юм чинь эрсдэлтэй.

-5 сая жуулчин хүлээж авна гэхээр нэлээдгүй хугацааны дараа оруулж ирэх тооцоолол байх?

-5 сая жуулчин ирвэл одоо бол даахгүй шүү дээ. Метро, тусгай зориулалтын зам, байшин барилгаа бариад 2030 онд авна гээд байгаа юм. Бүх дэд бүтцээ шийдвэрлэнэ. Мөн жуулчдыг татахын тулд чөлөөт худалдааны бүс байгуулна. Дэлхийн брэндүүдийг татваргүй худалдаалах бүс гэсэн үг.