Хөгжлийн бэрхшээлтэй  хүүхдүүдэд зориулсан лифттэй автобусыг анх удаа монголд оруулж ирлээ. Энэхүү  лифттэй  автобусыг 70 дугаар  сургуульд  хүлээлгэн өгсөн юм.  Харин  29,116, 25,63, 55 дугаар тусгай сургуулиудад тус бүр нэг, нэг энгийн автобус өгчээ. Эдгээр автобуснаас зургаа нь энгийн автобус, нэг нь тэргэнцэртэй хүүхдүүдэд зориулсан лифттэй автобус юм байна.  Энгийн автобус нь 26 хүний суудалтай бөгөөд тус бүр 98 сая төгрөгийн үнэтэй аж.

 Уг автобус хүлээлгэж өгөх ажиллагаа Нийслэлийн Сүхбаатар дүүргийн  Сонсголын бэрхшээлтэй хүүхдийн 29 дүгээр сургууль дээр болсон юм. Арга хэмжээнд БСШУЯ-ын төлөөлөл болон тусгай сургуулийн захирлууд,  29 дүгээр сургуулийн сурагчид оролцлоо.

Автобус хүлээж авч байгаа сургуулийн хүүхдүүд  ихэд  баярлаж байв.  Энэ үеэр шинэхэн автобус хүлээж авсан  Нийслэлийн Сүхбаатар дүүргийн  сонголын бэрхшээлтэй хүүхдийн 29 дүгээр сургуулийн захирал Б.Батсайхантай уулзаж зарим зүйлийг тодрууллаа.

Тэрбээр “Нийслэлийн хөгжлийн бэрхшээлтэй хүүхдэд сургалт явуулж байгаа зургаан сургууль  нэгэн зэрэг автобустай болж байна.  Цаашид автобусны тоо нэмэгдэх байх. Автобустай болсноор хөгжлийн бэрхшээлтэй хүүхдүүдийг хичээлд нь хүргэж, авахад чухал хувь нэмэр болоод зогсохгүй нийгмийн асуудалд нь тодорхой хувь нэр болж байгаа юм.  Манай сургуулийн хүүхдүүдээс хамгийн хол гэртэй нь Нарангын гол, Бэлх, Улиастай гэсэн  чиглэлүүд байдаг. Сургуулийн маань хувьд 310 хүүхэдтэй. Эдгээрийн 160 хүүхэд дотуур байрандаа амьдардаг. Үлдсэн хүүхдүүд нь гэрээсээ хичээлдээ явдаг. Өмнө нь гэрээсээ хичээлдээ явдаг хүүхдүүдийг  хоёр микро автобусаар зөөдөг байсан” гэлээ.

Харин БСШУЯ-ын старатегийн бодлого төлөвлөлтийн газрын мэргэжилтэн н.Ганболд “Цаашид алслагдсан дүүргүүдэд автобус олгох ажлыг үргэлжүүлээд, үе шаттайгаар хэрэгжүүлээд явна.  Энэхүү зургаан автобусанд 700 сая төгрөгийн хөрөнгө оруулалт хийсэн байгаа. Тусгай сургуулиуд нэг, хоёр автобустай байгаа. Харин 25 болон 70 дугаар сургуульд автобус байхгүй байсан.  Тэгвэл  өнөөдөр өөрийн гэсэн автобустай болж  байна" гэв.
      

Боловсрол  шинжлэх ухааны яамнаас боловсролын  чанарын шинэчлэлийн хүрээнд хөгжлийн  бэрхшээлтэй сурагчдын зориулалтын  сурах бичиг, тоног  төхөөрөмжөөр хангаж,  коллеж, их, дээд сургуульд  элсэн суралцах боломжийг  дээшлүүлэх  зорилт тавин ажиллаж байна.  Энэхүү зорилтод ерөнхий боловсролын  тусгай сургуульд автобусны үйлчилгээ нэвтрүүлэх  ажил  ч тусгагдсан байгаа.  Уг ажлын хүрээнд БШУЯ энэ жил улсын төсвийн  хөрөнгө оруулалтаар 700 сая төгрөгийн өртөг бүхий долоон  автобус худалдан авч сургуулиудад нийлүүлж байгаа  аж.
 
Улсын хэмжээнд хөгжлийн бэрхшээлтэй 1300 хүүхэд сургуулийн өмнөх боловсролын байгууллагад, 15770 хүүхэд сургуульд суралцаж байна.  Улмаар  тусгай сургууль зургаа байгаагаас харааны бэрхшээлтэй хүүхдийн нэг, сонсголын бэрхшээлтэй хүүхдийн нэг, оюуны хөгжлийн бэрхшээлтэй хүүхдийн дөрвөн сургуульд нийтдээ 1600 хүүхэд суралцаж байна. Ерөнхий боловсролын сургуульд суралцаж  байгаа нийт хүүхдийн 50 орчим хувь нь буюу 7064 нь харааны бэрхшээлтэй гэж бүртгэгдсэн байдаг аж.
   
Юутай ч автобустай болоод сэтгэл өндөр байгаа сурагчид болоод багш нар энэ үеэр сэтгэгдлээсээ хуваалцлаа.
Сурагч "Манай хичээл өглөө 08.30-д ордог болохоор гэрээсээ 07.30 гэж гардаг. Замдаа түгжирч явсаар байгаад өглөө бүр хичээлээсээ хоцордог. Ийм гоё шинэ автобустай болсондоо баяртай байна. Микронд явахаар шахалдаад хэцүү байдаг. Буух ёстой газраасаа хоцорч бууна. Тэгээд л хичээлээсээ дандаа хоцорчихдог юм. Одоо хичээлээсээ хоцрохгүй, микронд чихэлдэж явахгүй гэж бодохоор сайхан байна".
 
Багш "Би 116 сургуулийн дуу хөгжмийн багш хийдэг.  Өнөөдөр үнэхээр их сэтгэл хөдөлж байна. Яагаад гэвэл манай сургуулийн сурагчид болоод багш нар хүүхдүүдээ дагуулаад нийгэмшүүлэх зорилгоор хөдөө орон нутаг болон хот дотор явах шаардлагатай тулгардаг. Мөн эмнэлэг явах үе ч гарна. Сая бид нар хүүхдүүдтэйгээ автобусаа гараараа тэмтэрч, харах нэг нь харцгааж инээд хөөрөөр дүүрэн л байна даа. БШУЯ-ны хамт олонд үнэхээр их баярлалаа. Ер нь бид бүгдийг ойлгож буй бүх хүмүүстээ баярлалаа" гэж байлаа.
 
 Эцэг эх "Манай хүүхэд  70 дугаар сургуульд сурдаг. Энэ сургуульд хүүхдэд зориулсан нэг ч автобус байдаггүй байсан. Одоо тусгай автобустай  болж байгаад ихэд баярлаж байна. Тусгай сургуульд суралцаж  байгаа хүүхдийн хамгийн хүнд асуудал автобус унааны асуудал. Нийтийн  тээврийн  хэрэгслээр тэр бүр явж чаддаггүй.  Таксинд суухад  нэг өдөрт 15 мянган төгрөг гардаг. Бид тэр бүр таксигаар хүүхдүүдээ зөөх боломж байдаггүй" гэв.