2013 онд ШӨХТГ-т тендертэй холбоотой 23 гомдол, мэдээлэл ирж байсан бол өнөөдрийн байдлаар 32 гомдол ирээд байгаа аж. Энэ нь өнгөрсөн жилтэй харьцуулахад энэ оны эхний саруудын гомдлын тоо эрс нэмэгдсэнийг харуулж байна.

Тендерийн тухай хуульд 2011 онд өөрчлөлт оруулаад, 2012 оноос мөрдөж эхэлсэн юм байна. Тэгэхээр энэ хуулинд тендерийн баримт бичигтэй холбоотой  буюу тендерт өрсөлдөөнийг хязгаарласан ямар нэг зүйл байна гэж иргэд үзвэл тендерийн нээлтийг хийхээс өмнө ШӨХТГ-т гомдлоо гаргаж болох аж.

Харин тендерийн шалгаруулалттай холбоотой гомдлыг мэдэгдлээ авсанаас  хойш таван хоногийн дотор Төрийн захиргааны удирдах байгууллагад гаргах юм байна.

Юутай ч яг ямар гомдол мэдээлэл давамгайлж, хэрхэн шийдсэн талаар ШӨХТГ-ын Өрсөлдөөний зохицуулах хэлтсийн дарга Л.Ган-Өлзийгөөс тодруулахад "Манайд ирсэн 32 гомдол нь Худалдан авах ажиллагааны газраас зарласан 9 тендер, яамдуудаас ирсэн 9 тендер, төрийн өмчит үйлдвэрийн газраас гаргасан 8, аймаг нийслэлээс зарласан 6 тендертэй холбоотой гомдлууд. Дээрх 32 гомдлоос 13-ыг нь тендерийн баримт бичигт өөрчлөлт оруулах журмаар шийдсэн.

Тендерийн тухай хуулийн 6.1-т тендерийн гол зарчим өрсөлдөх, тэгш боломжийг бүрдүүлэх ёстой гэж заасан байдаг. Гэтэл зарим тендерүүдэд шалгуур үзүүлэлт, босго нь их өндөр байдаг. Тухайлбал, 200 сая төгрөгний төсөвтэй барилгын засварын ажлын тендер зарлагдахад тухайн тендерт оролцогчдод сүүлийн гурван жилд хийж гүйцэтгэсэн ажил нь 2-5  тэрбум төгрөг байна гэх мэтээр шалгуур заачихсан байдаг. Энэ нь илт өрсөлдөөнийг хязгаарлаж,  өрсөлдөх боломжийг нь хаасан зөрчил үүсгэж байгаа хэрэг.

Мөн тендерийн тухай хуулийн 11.1.3-т ямар нэг бараа, үйлчилгээ үзүүлдэг аж ахуй эрхлэгчийн нэр, эсвэл тухайн бүтээгдэхүүний нэр, марк тэмдэгийг зааж тендерийг зарлаж болохгүй гэдэг байтал хууль зөрчсөн зүйл байсаар байгаа. Түүнчлэн, тендерийн нээлт хийхээс өмнө манайд гомдол ирүүлээгүй  учир 13 гомдлыг шалгах боломжгүй гээд буцаасан" гэв.