Эрчүүд эмэгтэйчүүдийг ойлгоход бэрх улс гэдэг. Бүсгүйчүүд ч бас эрчүүдийг яг яах гээд байгаа нь мэдэгддэггүй хүмүүс гэж тодорхойлдог.

Үнэндээ бие биедээ юу хүсч байгаа, ямар байгаасай гэж бодож буйгаа шууд л хэлчихдэг бол аль алинд нь эсрэг хүйстнээ ойлгоход тийм ч төвөгтэй биш. Бид л өөрсдийгөө оньсого болгочихоод өрөөлөөр таалгах гэж оролдоод байдаг нь харилцан ойлголцоход хэцүү байдалд хүргэдэг. Эмэгтэйчүүд юу хүсдэгийг бид өөрсдөө сайн мэднэ. Харин эрчүүдийн хүсдэг зүйлс бидний төсөөлж байгаагаас ч цөөхөн.

1. Шууд утгаараа ойлгогдох үгс
Бүсгүйчүүд хэлэх гэсэн санаагаа шууд утгаараа ойлгогдохоор биш, заавал цааш ухаж бодох хэрэгтэй үгсээр илэрхийлдэг нь хосуудын хоорондох асуудлын талаас илүү хувийг үүсгэдэг хүчин зүйл. Маш тойруу утгаар хэлсэн үгнийхээ дараа “Би чамд ойлгуулах гэж хамаг аргаа барлаа. Чи ямар мэдрэмжгүй юм бэ?” гэж гомдоллодог нь эрчүүдэд дарамт мэт санагддаг. Бүсгүйчүүдийг өмнөө дэлгээтэй тавьсан ном шиг уншдаг шалиг залуу биш л бол эрчүүд ихэвчлэн хэлсэн үгний цаад утгыг ойлгохдоо маруухан байдаг билээ.

Жишээ нь: Найз залуудаа би өнөөдөр мөнгөний асуудалтай байгаа гэдгээ ойлгуулахдаа “Аав намайг унтаж байхад яваад, унтаж байхад л ирчихээд огт таарахгүй юм. Хэдэн өдөр таараагүй, мөнгөгүй болох гээд баларч байна аа” гэх маягаар бүсгүйчүүд далд санаагаа ойлгуулах гэж үздэг ба үүнийг сонсож суусан найз залуу нь “Өө тийм үү? Надаас авчих” гэж хэлэхгүй л бол сэтгэлээр унаж, түүний мэдрэмжгүйг гайхаж эхэлдэг. Эмэгтэйчүүд бидний хувьд дээрх өгүүлбэрийг хаанаас нь ч харсан “Мөнгөгүй байна. Туслаарай” гэсэн нь илэрхий байгаа ч үнэхээр үүнийг ойлгодоггүй залуус бий. Үнэхээр шүү. Тийм болохоор тойруулж, тогшуулж, ойлгуулах гэж ядаж байхаар шууд л хэлчих. Нэгэнт л та хоёр хайртай хос, нэгэн биений хоёр тал мөн бол шүү дээ.

2. Магтаал сайшаал
“Эхнэр маань намайг хогоо гаргаж хаях төдийд ч санаачлагатайг минь гайхаж магтдаг. Ингэх бүрт нь урам ороод л хийж өгнө шүү дээ. Эхэндээ үүнийг анзаардаггүй байсан чинь ер нь тэрний маань намайг гэрийн ажил хийлгэх “тактик” нь юм шиг байна лээ. Гэхдээ л сонсоход сайхан байдаг юм.” - Ганболд / 33 настай /
Хүүхдүүдийг загнаж биш магтаж байж илүү сайн болгодог шиг эрчүүдийг ч гэсэн магтах хэрэгтэй. Хамгийн гол нь өөрийнхөө амнаас гардаггүй үгийг хэрэглэж, хиймэл сонсогдохоор байж болохгүй.

3. Хааяа ч гэсэн товч тодорхой байх
“Орой ажлаасаа ирэх бүрт эхнэр маань өдөр юу болсон, яасныг нэгд нэгэнгүй асууж шалгаадаг. Өдөр 4 удаа утсаар ярихдаа би уг нь хангалттай л илтгэсэн баймаар юм. Гэхдээ үгүй юм шиг байна лээ. Тэгээд л ээждээ тайлангаа тавьж байгаа сургуулийн банди шиг ярих бас өдөр аль хэдийнэ сонсчихсон үйл явдлуудынхаа дэлгэрэнгүйг нэмж сонсох хэрэгтэй болно доо. “Гудамжинд явж байсан чинь манайхтай адилхан нохой хөтөлчихсөн залуу явсан. Чамайг уу гэж андуурах шахсан шдээ.” гэх мэтчилэн. Үүнийг нэг л сонссон бол болоо биз дээ?” Төмөрбаатар / 40 настай /
Өдөр тутмын жижиг сажиг үйл явдлуудыг бүгдийг нь хамж шимж ярих, хаана явааг нь байнга асууж шалгаах, юу хийснээ, хийж байгаагаа илтгэж байхыг шаардах, найзуудынхаа амьдралын асуудлыг нэгд нэгэнгүй ярих гэх мэт бүгдийг “дэлгэрэнгүй” байлгах гэсэн хүслийнхээ тунг нь тааруулдаг байгаасай гэж залуус боддог аж.

4. Инээмсэглэл
“Хайртай бүсгүйгээ инээлгэх нь миний хувьд хамгийн сайхан зүйл. Би түүнийг аз жаргалтай байлгаж чадаж байна шүү дээ. Харин өөр эрийн дэргэд ч инээмсэглээд байх нь тийм ч таатай санагддаггүй шүү. хэхэ” Уртнасан /26 настай/

Өөрийнх нь хийсэн зүйлээр мөн байгаагаар нь бахархаж, жаргалтай буйгаа илтгэж инээмсэглэдэг байхыг залуус хүсдэг. Бүсгүй хүний инээмсэглэл нь л хамгийн ихээр чимдэг шүү дээ.
“Эмэгтэй хүн инээх ёстой гэх хууль гаргая
Эмэгтэй минь инээх тал дээр битгий гуйлгаарай
Инээхийг чинь сонсоод дуулгавартай
болсон залуу тасалдуулахгүй байх даалгавартай
Инээ, чи эргүүлж хариу нэхээгүй атлаа
Эр хүнийг хүч хэрэглэхгүйгээр алгандаа багтаана” гээд дуу байна, цаад караокед чинь.

5. Юу хийхийг нь заахгүй байх
“Би лав ахиж жолооч эмэгтэйтэй болзохгүй байхаар шийдсэн. “Энүүгээр эргэх ёстой байсан биз дээ?”, “Энд машин тавьж болдоггүй ш дээ”, “Баруун тал руу нь дараач!” гэх мэт зааж зааварласан үгсийг дэргэдээсээ сонсмооргүй байна.” Ганзориг / 22 настай /

Ажил мэргэжил, спорт, машин техник гэх мэт тодорхой хэдэн зүйл дээр эрчүүд үргэлж удирдан жолоодогч нь байхыг хүсдэг болохоор үйлдлийг нь заахад тун дургүй. Тэр хэчнээн буруу хийж байсан ч гэсэн байнга зааварлах хэрэггүй.

6. Шинэ туршилт хийхэд бэлэн, халуухан секс
“Манай эхнэр секс хийх тийм ч дуртай биш. Орой бүр орондоо ороод аль болох хурдан унтахыг боддог. Хүүхдүүдээ гээд ядарч байгааг нь ойлгож байгаа ч сексийг бас нэгэн ажил мэт үзэж байгаа нь надад таалагддаггүй. Урьдны халуухан сексийг өгүүлж байна.” Батбаатар /33 настай /

Тэр чамайг шахамдуулаагүй байхад ч түүнийг хараад зүгээр л хүсдэг байсан шүү дээ. Түүнийгээ эргэн санаад түүндээ бас өөртөө боломж олгоорой.

7. Амттай хоол
Эрчүүдийг ходоодоор нь барьдаг гээд нэг үг байдаг даа. Энэ зуун хувь үнэн биш ч тодорхой хэмжээгээр үнэний ортой. Халуун дулаан гэр орон, амттай хоол бол эр хүний амар амгалан байх орчин. Харин тайван байгаа газраа л эрчүүд өөрийн гэр гэж мэдэрдэг. Хэрвээ гэр нь эл хуль, хоолонд нь сэтгэл шингээгүй байх юм бол тэр гэр шиг мэдрэмж төрүүлж чадах өөр газрыг хайх болно. Яг л бид нөхрийнхөө дэргэд нөмөр нөөлөг дутахад түүнийг өөр хүнээс эрдэг шиг.